ޔުވެންޓަސްގެ ޒުވާން ޓީމު ކަރަންޓީނުކޮށްފި

އިޓަލީގައި މިހާރު ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ޔުވެންޓަސްގެ 23 އަހަރުން ދަށުގެ ޓީމު ކަރަންޓީނުކޮށްފިއެވެ.

ޔުވެންޓަސްގެ 23 އަހަރުން ދަށުގެ ޓީމު ކަރންޓީނުކުރިއިރު، އެޓީމުގެ ފަރިތަކުރުންތައްވެސް ވަނީ މެދުކަނޑާލާފައެވެ. ޔުވެންޓަސްގެ ޒުވާން ޓީމު ކަރަންޓީނުކުރީ އެޓީމުން އިޓަލީގެ ތިންވަނަ ޑިވިޝަނުގައި އެންމެ ފަހުން ކުޅުނު މެޗުގައި ވާދަކުރި ކްލަބު ކަމަށްވާ ޕިއަނީސްގެ ތިން ކުޅުންތެރިއަކު ކޮރޯނާ ވައިރަހަށް ޕޮޒިޓިވް ވުމުންނެވެ. ޕިއަނީސްގެ ކުޅުންތެރިންގެ އިތުރުން އެ ޓީމުގެ މެނޭޖަރުވެސް ވައިރަހަށް ޕޮޒިޓިވް ވެފައިވާ ކަމަށް އިޓަލީގެ މީޑިއާތަކުން ވަނީ ރިޕޯޓުކޮށްފައެވެ.

ޔުވެންޓަސްގެ ޒުވާން ޓީމު ކަރަންޓީނު ކުރި ނަމަވެސް، އަދި މިހާތަނަށް އެޓީމުގެ ކުޅުންތެރިއަކަށް ވައިރަސް ޖެހިފައިވާ ކަމަށް ރިޕޯޓުކޮށްފައެއް ނުވެއެވެ.

އިޓަލީގައި މިހާތަނަށް ކޮރޯނާވައިރަހުގެ 1000 އަށް ވުރެގިނަ ކޭސް ފެނިފައިވާއިރު ވައިރަހުގެ ސަބަބުން 20 މީހުން ވަނީ މަރުވެފައެވެ. އިޓަލީން އަންނަނީ ސަލާމަތީ ގޮތުން ގިނަ ފިޔަވަޅުތަކެއް އަޅަމުންނެވެ. އެގޮތުން އިޓާލިއަން ލީގުގެ ގިނަ މެޗުތަކެއް މިހާރު ވަނީ ފަސްކޮށްފައެވެ. އަދި ގިނަ މެޗުތައް ސަޕޯޓަރުން ނުވައްދައި ކުޅެންވެސް މިހާރު ވަނީ ނިންމާފައެވެ.