ސީރިޔާގެ ހުޅަނގު އުތުރު ޕްރޮވިންސް ކަމުގައިވާ އިދްލީބުގައި ހިނގަމުންދާ ހަމަނުޖެހުންތަކުން އެ ޕްރޮވިންސްގައި ދިރިއުޅެމުންދާ ޢާންމު ރައްޔިތުންނަށް ރައްކާތެރިކަން ލިބެންޖެހޭކަމަށް އިރާނުގެ ރައީސް ޙަސަން ރޫހާނީ ވިދާޅުވެއްޖެ އެވެ.
އިރާނުގެ ރައީސް މިހެން ވިދާޅުވެފައިވަނީ، ތުރުކީގެ ރައީސް ރަޖަބް ޠައްޔިބުއުރުދުޣާން އާ ފޯނުންގުޅުއްވާ ދެއްކެވި ވާހަކަފުޅެއްގައި ކަމަށް އިރާނުގެ ދައުލަތުގެ ޓީވީން ބުނެއެވެ. އިދްލީބުގައި ހިނގަމުންދާ ހަމަނުޖެހުންތަކުގައި ތުރުކީ އާއި ރަޝިޔާގެ ގުޅުންވަނީ ގޯސްވެފައެވެ. ދެ ޤައުމުގެ މެދުގައި އޮންނަ ގުޅުމަށް ބުރޫއަރާފައިވާއިރު އިރާނުގެ ރައީސް ވިދާޅުވެފައިވަނީ އިދްލީބުގެ ޙާލަތު މިހާރު ވަނީ ވަރަށް ބޮޑަށް ގޯސްވެފައިކަމަށެވެ.
އެތަނުގައި ޓެރަރިސްޓުން ހާލިހަދައިގެން އެބަތިބިކަމަށާއި އެހެންކަމުން އެތަނުގައި ދިރިއުޅޭ ޢާންމު ރައްޔިތުންނަށް ސަލާމަތާއި ރައްކާތެރިކަން ލިބެންޖެހޭނެކަމަށް ޙަސަން ރޫހާނީ ވަނީ ވިދާޅުވެފަ އެވެ.
ހޮނިހިރު ދުވަހު އުރުދުޣާން ވިދާޅުވެފައިވަނީ ރަޝިޔާގެ ރައީސް ޕުޓިން އަރިހުން އެޞަރަޙައްދު ދޫކޮށް ދިޔުމަށް އެދިވަޑައިގެންފައިވާކަަށެވެ. އަދި ސީރިޔާ ސަރުކާރާއި ތުރުކީން ވާހަކަދެއްކުމަށް ދޫކޮށްލުމަށް އެދިފައިވާކަމަށް އުރުދުޣާން ވިދާޅުވި އެވެ. މިދިޔަ ހަފްތާގެ ތެރޭގައި ވަނީ އިދްލިބްގައި ހިނގަމުންދާ ހަމަނުޖެހުންތަކުގައި ތުރުކީގެ ގިނަ ޢަދަދެއްގެ ސިފައިން މަރުވެފަ އެވެ. ބުރާސްފަތި ދުވަހު އެކަނިވެސް ތުރުކީގެ 33 ސިފައިން ވަނީ މަރުވެފައެވެ.
އަނެއްކޮޅުން އިދްލީބުގައި ހިނގަމުންދާ ހަމަނުޖެހުން ތަކާގުޅިގެން މިހަފުތާތެރޭގައި ޤައުމުތަކުގެ ލީޑަރުން މަޝްވަރާކުރުމަށް ބައްދަލުވުމެއް ބޭއްވުމަށް ވަނީ ހަމަޖެހިފަ އެވެ.
އިދްލީބުގައި ހިނގަމުންދާ ހަމަނުޖެހުންތަކާއި ގުޅިގެން މިހާތަނަށް އާއިރު މިލިއަނަކާ ގާތަށް މީހުންނަށް ވަނީ އެޞަރަޙައްދު ދޫކޮށް ދިޔުމަށް މަޖުބޫރުވެފަ އެވެ. އިދްލީބުގައި ހިނގަމުންދާ ހަމަނުޖެހުންތަކާއި ގުޅިގެން އދ އިން ބުނެފައިވަނީ ޙަމަލާތައް ވަގުތުން ހުއްޓާލުމަށެވެ. ނޫންނަމަ އެޞަރަޙައްދުގައި ލޭގެ ކޯރެއް އުފެދިގެންދާނެކަމުގެ އިންޒާރު އދ އިން ވަނީ ދީފައެވެ.
