ކުރެވުނު ހޭދައާއި ބަލާފައި ގައުމީ ކްރިކެޓް ޓީމުން ނެރުނު ނަތީޖާ ރަނގަޅުކަމަށް ކްރިކެޓް ބޯޑް އޮފް މޯލްޑިވްސްގެ ރައީސް މުހައްމަދު އަފްލާހު ވިދާޅުވެއްޖެ އެވެ.
ރާއްޖެ ޓީވީގެ ކުޅިވަރު ފައިލް ޕޮރޮގްރާމްގައި ވާހަކަދައްކަވަމުން އަފްލާހު ވިދާޅުވީ މީގެ ހަތަރު އަހަރުކުރިން ކްރިކެޓް ބޯޑާ ހަވާލުވިއިރު ބޮޑު ބަޖެޓެއް ބޯޑުގެ ރިޒާވުގައި ހުރި ކަމަށާއި، އެ ބަޖެޓުން ބޮޑު ބައެއް ހޭދަކުރީ ގައުމީ ޓީމަށް ކަމަށެވެ. އަދި ގައުމީ ޓީމަށް ކުރެވުނު ހޭދައާއި ބަލާފައި ނެރުނު ނަތީޖާތައް ރަނގަޅުކަމަށް ވެސް އޭނާ ވިދާޅުވިއެވެ. އެގޮތުން އަފްލާހު ބުނީ އެންމެ ފަހުން މެލޭޝިއާގައި ބޭއްވި އިންވިޓޭޝަން މުބާރާތުން ރާއްޖޭގެ ގައުމީ ފިރިހެން ކްރިކެޓް ޓީމު ރިހި މެޑަލް ކާމިޔާބުކޮށްފައި ކަމަށާއި، އެ މުބާރާތުން ރާއްޖޭގެ ކްރިކެޓް މިހާރު އޮތް ހިސާބު ފެންނާނެ ކަމަށެވެ.
ގައުމީ ޓީމަށް ކުރި ޚަރަދަކީ އިންވެސްޓްމެންޓެއް ކަމަށް ވިދާޅުވަމުން އަފްލާހު ވިދާޅުވީ ބަޖެޓް އެއް އެއްކޮށް އަދި ވެސް ހުސްނުވާ ކަމަށާއި ގައުމީ ޓީމާއި އެއްވަރަށް ކްރިކެޓް ޑިވެލޮޕްމެންޓަށް ވެސް ޚަރަދުކޮށްފައިވާނެ ކަމަށް އަފްލާހު ވިދާޅުވިއެވެ. މިހާރު ކުރެވުނު ހޭދައިން ކުޑަ ފައިދާއެއް ފެނުނު ކަމުގައިވިޔަސް ކުރިޔަށް އޮތްތާ ބޮޑު ފައިދާއެއް ފެނިގެންދާނެ ކަމަށެވެ. އަދި ކުރެވުނު ޚަރަދަކީ ބޭކާރު ޚަރަދެއް ނޫން ކަމަށާއި ކުރިޔަށް އޮތްތާ އައިސީސީގެ ފަންޑިންގ ވެސް ލިބިގެންދާނެ ކަމަށެވެ. އެހެންކަމުން ސަރުކާރަށްވެސް ލުއިވެގެންދާނެ ކަމަށް އަފްލާހު ވިދާޅުވިއެވެ.
ގައުމީ ކްރިކެޓް ޓީމުން ވަނީ ނިމިދިޔަ އަހަރު މެލޭޝިއާގައި އޮތް އިންވިޓޭޝަން މުބާރާތުން ރިހި މެޑަލް ކާމިޔާބުކޮށްފައެވެ. މީގެ އިތުރުން ނިމިދިޔަ އަހަރު ވަނީ ގައުމީ އަންހެން ކްރިކެޓް ޓީމެއް އެކުލަވާލާފައެވެ. މި ޓީމު ވަނީ ނިމިދިޔަ އަހަރު ނޭޕާލުގައި ބޭއްވި ސައުތް އޭޝިއަން ގޭމްސްގައި ވާދަކޮށްފައެވެ.
