ކޮރޯނާވައިރަސްގެ ސަބަބުން ދުނިޔޭގެ ބާޒާރުގައި ތެލުގެ އަގު ވެއްޓިދާނެ ކަމުގެ ބިރު އެބައޮތް: އައިއައިއެފް

ޗައިނާއާއި، އިރުމަތީ އޭޝިއާގެ ބައެއް ޤައުމުތަކުގައި ހަލުވިކަމާއެކު، ނޮވެލް ކޮރޯނާަވައިރަސް ފެތުރެމުންދާތީ އޭޝިޔާ ބައްރުގެ ޤައުމުތަކުން ތެލަށް އޮންނަ ޑިމާންޑު ކުޑަވަމުންދާ ކަމަށާއި، މީގެ އަސަރު ދުނިޔޭގެ ތެލުގެ ބާޒާރަށް ކުރާނެކަމުގެ ބިރު އެބައޮތްކަމަށް އިންސްޓިޓިއުޓް އޮފް އިންޓަރނޭޝަނަލް ފައިނޭންސް އިން ބުނެފިއެވެ.

ދުނިޔޭގެ މާލީ ޙާލަތު ވަޒަންކުރަމުންދާ އައިއައިއެފްގެ ޗީފް އިކޮނޮސްމިސްޓް، ގަރބިސް އިރޭޑިއެން ވިދާޅުވީ، ކޮރޯނާވައިރަސްގެ ކުރިން އެ އިދާރާއިން އަންދާޒާ ކުރީ މިއަހަރުގެ ތެރޭގައި ދުނިޔޭގެ ބާޒާރުގައި ތެޔޮ ފީފާއެއްގެ އަގު އެންމެ ދަށްވެގެން 60 އެމެރިކާ ޑޮލަރުގައި ހިފެހެއްޓޭނެ ކަމަށެވެ.

ކޮރޯނާވައިރަސް ފެތުރެންފެށިއިރު، ދުނިޔޭގެ ބާޒާރުގައި ތެޔޮ ފީފާއެއްގެ އަގު ހުރީ 64 ޑޮލަރަށެވެ. ނަމަވެސް ބަލިމަޑުކަން ފެތުރެން ފެށުމާއެކު، 60 ޑޮަލަރަށް އަގު ތިރިވެފައިވާކަމަށެވެ. މިހާރު އަގު ތިރިވަމުންދާ ޓްރެންޑަށް ބަލާނަމަ، ތެޔޮ ފީފާއެއްގެ އަގު 57 ޑޮަލަރަށް ތިރިވެދާނެކަމުގެ ބިރު އެބައޮތް ކަމަށް އައިއައިއެފްގެ ޗީފް އިކޮނޮސްމިސްޓް، ގަރބިސް އިރޭޑިއެން އަންދާޒާ ކުރެއެވެ.