އަންގާރަ 07 އޭޕުރިލް 2020
13 ރޭވަ
1441 ޝައުބާން 14
ފަތިސް 04:50
އިރުއަރާ 06:02
މެންދުރު 12:12
އަސްރު 15:15
މަޣްރިބް 18:15
އިޝާ 19:27
ކުޅިވަރު - ގައުމީ ކްރިކެޓް ޓީމު

ގައުމީ ކްރިކެޓް ޓީމު އޮމާނަށް ފުރައިފި

  • ވެސްޓާން ރީޖަން ޓީ20 ކްރިކެޓް މުބާރާތް އޮންނާނީ މި މަހުގެ 21-28 އަށް

އިސްމާޢީލް ޝާހް
ismaelschurh

ކ. މާލެ | 20 ފެބްރުއަރީ 2020 | ބުރާސްފަތި 19:09 | 2,087

ގައުމީ ކްރިކެޓް ޓީމު - އިސްމާޢީލް ޝާހް

އޭޝިއަން ކްރިކެޓް ކައުންސިލުން އިންތިޒާމުކޮށްގެން އޮމާނުގައި ބާއްވާ ވެސްޓާން ރީޖަން ޓީ20 ކްރިކެޓް މުބާރާތުގައި ވާދަކުރުމަށް ރާއްޖޭގެ ގައުމީ ކްރިކެޓް ޓީމު ފުރައިފި އެވެ.

އޮމާނުގައި ބާއްވާ މި މުބާރާތް ކުރިޔަށްދާނީ މިމަހުގެ 21 އިން 28 ގެ ނިޔަލަށެވެ. މި މުބާރާތުގައި ރާއްޖެ ހިމެނެނީ ބަހްރެއިން، އޮމާން އަދި ގަތަރާއެކު އެއް ގްރޫޕެއްގައެވެ.

އޮމާނަށް ފުރުމުގެ ކުރިން ރާއްޖެ ޓީވީއަށް ދިން އިންޓަވިއުއެއްގައި ކްރިކެޓް ބޯޑް އޮފް މޯލްޑިވްސްގެ ރައީސް މުހައްމަދު އަފްލާހު (އަފޫ) ވިދާޅުވީ މިދިޔަ އަހަރުގެ ފަހުކޮޅު އޮތް ސައުތު އޭޝިއަން ގޭމްސްއިން ފެށިގެން މި މުބާރާތަށް ތައްޔާރުވާން ފެށި ކަމަށާއި ޓީމަށް ބަދަލުތަކެއް އައިރު، މި މުބާރާތަށް ދާނީ ސައުތު އޭޝިއަން ގޭމްސްގައި ވާދަކުރި ޓީމަށްވުރެ ރަނގަޅު ޓީމެއް ކަމަށެވެ.

ޓީމުގެ ކޯޗު އިމާދު އިސްމާއިލް ބުނީ ޓީމުގެ ފަރިތަކުރުންތަކަށް ދަނޑު ލިބުމުގެ ދަތިކަން ދިމާވުމުން އެންމެ ރަނގަޅަށް ފަރިތަކުރުންތައް ނުގެންދެވުނު ނަމަވެސް، ކުޅުންތެރިން ވަރަށް ރަނގަޅަށް ތައްޔާރުވި ކަމަށެވެ. އަދި ރާއްޖެ އޮތް ގްރޫޕުގައި ވަރުގަދަ ޓީމުތަކެއް އޮތް ނަމަވެސް، ޓާގެޓަކީ އެއް މެޗުން ނަމަވެސް މޮޅުވުން ކަމަށެވެ.

މި މުބާރާތުގައި ރާއްޖޭގެ ގައުމީ ޓީމުގައި ބިދޭސީ ތިން ކުޅުންތެރިން ވަނީ ހިމަނާފައެވެ. އައިސީސީގެ ގަވާއިދުގެ ދަށުން މި މުބާރާތުގައި ބިދޭސީ ހަތަރު ކުޅުންތެރިން ހިމެނުމުގެ ފުރުސަތު ލިބެއެވެ.

ޓީމުގެ ކެޕްޓަން އައްޒާމް ބުނީ މިފަހަރުގެ މުބާރާތުގައި ވާދަކުރާ ސްކޮޑުގައި އައު ކުޅުންތެރިންތަކެއް ހިމެނޭ ކަމަށާއި، އަދި ކުޅުންތެރިން ތިބީ މި މުބާރާތަށް ވަރަށް ފުރިހަމައަށް ތައްޔާރުވެފައި ކަމަށެވެ. އަދި ބިދޭސީ ކުޅުންތެރިންނާއެކު މި މުބާރާތުގައި ރަނގަޅު ކުޅުމެއް ދެއްކޭނެ ކަމަށްވެސް ވަނީ ބުނެފައެވެ.

މުބާރާތުގައި ރާއްޖެ ކުޅޭ ފުރަތަމަ މެޗުގައި މިމަހުގެ 23 ވަނަ ދުވަހު ނުކުންނާނީ ގަތަރާ ދެކޮޅަށެވެ. ދެވަނަ މެޗުގައި 24 ވަނަ ދުވަހު ބަހްރެއިންއާ ދެކޮޅަށް ނުކުންނައިރު، ތިންވަނަ މެޗުގައި 25 ވަނަ ދުވަހު ރާއްޖެ ބައްދަލުކުރާނީ އޮމާނާ އެވެ.

އެންމެ ފަހުން އަޕްޑޭޓް ކުރީ: 1 ހަފްތާ ކުރިން | ރިވިއު ކުރީ: ޒިހްނަތު ހަސަން

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.