މިއަހަރުގެ އޭއެފްސީ ކަޕްގެ ގްރޫޕް ސްޓޭޖުގެ ވާދަކުރާ ޓީސީ ސްޕޯޓްސް ކްލަބުން އިތުރު ތަމްރީނުތަކަށް ގަތަރަށް ފުރައިފި އެވެ.
އަންގާރަ ދުވަހު ޓްރެއިނިން ކޭމްޕަކަށް ޓީސީ ގަތަރަށް ފުރިއިރު، މި ކޭމްޕް ޓީސީއަށް ފަހިކޮށްދީފައިވަނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިންނެވެ. މީގެ ކުރިންވެސް އެފްއޭއެމްގެ އެހީގައި ޓީސީން ވަނީ ރާއްޖޭން ބޭރުގައި ޓްރެއިނިން ކޭމްޕެއް ފުރިހަމަ ކޮށްފައެވެ. އެގޮތުން މިދިޔަ އަހަރުގެ ޖުލައި މަހު ޓީސީން ވަނީ ސައުދީ އަރަބިއްޔާގައި ތަމްރީނު ފުރިހަމަކޮށްފައެވެ.
ކޭމްޕަށް ފުރުމުގެ ކުރިން މާލޭގައި ކުރިއަށް ގެންދިޔަ ފަރިތަކުރުންތަކުގައި ރާއްޖެޓީވީއަށް ދިން އިންޓަވިއުއެއްގައި ޓީސީގެ ކޯޗު މުހައްމަދު ޝާޒްލީ (ޝާޒް) ބުނީ އޭއެފްސީ ކަޕްގައި ޓީސީ ހިމެނޭ ގްރޫޕަކީ ވަރުގަދަ ގްރޫޕެއް ކަމަށާއި، ގްރޫޕްގައި ތިބީ ވަރުގަދަ ޓީމުތަކެއް ކަމަށެވެ. އެކަމަކު ޓީސީން މި މުބާރާތަށް މިހާރު ވަރަށް ފުރިހަމައަށް ތައްޔާރުވެފައިވާ ކަމަށްވެސް ބުންޏެވެ.
އޭއެފްސީ ކަޕްގެ ގްރޫޕް ސްޓޭޖަށް ޓީސީ ތައްޔާރުވާއިރު، އެޓީމުން ވަނީ މި މުބާރާތަށް ޓީމު ވަރުގަދަކޮށްފަ އެވެ. އެ ގޮތުން ކޯޗު ޝާޒްލީގެ އިތުރުން ޓީސީން ވަނީ ކްލަބު ގްރީން ސްޓްރީޓްސް އިން އަލީ އަޝްފާގު (ދަގަނޑޭ) އާއި ފޯކައިދޫ ފުޓްބޯލް ކްލަބުން އަލީ ޝާމިސް (ތޮއްޕޭ) އާއި ޕާކިސްތާންގެ ގޯލްކީޕަރު ހަނީފް ސާގިބް އަދި މިސްރުގެ ދެ ކުޅުންތެރިން ކަމަށްވާ ޚަލީލް ޖަމާލް އަދި މަހުމޫދު ސައީދު ގެނެސްފަ އެވެ. މީގެ އިތުރުން މާޒިޔާ އިން އަބްދުﷲ ހަނީފް (ބެންޖޯ) ހޯދިއިރު، ސެއިންޓް ވިންސެންޓްގެ ފޯވާޑެއް ކަމަށްވާ ކެސިއަސް މެލްކަމް ސްޓެވާޓް ވެސް ވަނީ ގެނެސްފަ އެވެ.
މިއަހަރުގެ އޭއެފްސީ ކަޕްގެ ގްރޫޕް ސްޓޭޖްގައި ރާއްޖޭގެ ޓީސީ ވާދަކުރާއިރު، މިއީ މި މުބާރާތުގެ ގްރޫޕް ސްޓޭޖުގައި ޓީސީ ވާދަކުރާނެ ފުރަތަމަ ފަހަރެވެ. މީގެ ކުރިން 2018 ވަނަ އަހަރު ޓީސީން ވަނީ މި މުބާރާތުގެ ޕްރިމިނަލަރީ ބުރުގައި ވާދަކޮށްފައެވެ.
އޭއެފްސީ ކަޕްގެ ގްރޫޕް އީ ގައި ހިމެނެނީ ރާއްޖޭގެ ޓީސީގެ އިތުރުން އިންޑިއާގެ އައި ލީގުގެ ޗެމްޕިއަން ޗެންނާއީ ސިޓީ އާއި ބަންގްލަދޭޝްގެ ބަޝުންދަރާ ކިންގްސް އެވެ. ދެން މި ގްރޫޕުން ފުރުސަތު ލިބޭނީ ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން ނުވަތަ އިންޑިއަން ސުޕަ ލީގުގެ ޗެމްޕިއަން ބެންގަލޫރު އެފްސީއަށެވެ.
އޭއެފްސީ ކަޕްގެ ގްރޫޕް ސްޓޭޖުގައި ޓީސީ ކުޅޭ ފުރަތަމަ މެޗުގައި އަންނަ މަހު 12 ވަނަ ދުވަހު ކުޅޭނީ ރަށުން ބޭރުގައި ބަންގްލަދޭޝްގެ ޗެމްޕިއަން ބަޝުންދުރާ ކިންގްސްއާ އެވެ.
