އިލެކްޝަން ކޮމިޝަން (އީސީ) ގެ މެމްބަރުންތަަކަކަށް އާންމު ފަރާތްތަކަކުން ބިރުދައްކައި، އިންޒާރުދިން މައްސަލަ ތަހުގީގު ކުރުމަށް ފުލުހަށް ހުށައަަޅައިފިއެވެ.

އެކަމާއި ގުޅިގެން ރާއްޖެ.އެމްވީއާ ވާހަކަ ދައްކަވަމުން އަކްރަމް ވިދާޅުވީ، އެ މައްސަލަ ހުށައެޅީ ހޮނިހިރު ދުވަހު ހެނދުނު ކަމަށެވެ. އަދި އީސީން އެދިއްޖެއްޔާ ސަލާމަތީ ކަންތައްތައް ފޯރުކޮށްދެނޭ ކަމަށް ފުލުހުން ބުނެފައިވާ ކަމަށެވެ. އަކްރަމް ވިދާޅުވީ، ފުލުހުންގެ އެހިއާއެކު އިންތިހާބު ސަލާމަތާއި ރައްކާތެރިކަމާއިއެކު ކުރިޔަށް ގެންދެވޭނެ ކަމަށެވެ.

އީސީގެ ނައިބް ރައީސް އަހުމަދު އަކްރަމް ހޮނިހިރު ދުވަހު ކުރައްވާފައިވާ ޓްވީޓެއްގައި ވިދާޅުވީ، ހުކުރު ދުވަހާއި ހޮނިހިރު ދުވަހު ކައުންސިލް އިންތިހާބަށް ފޯމް ހުށައަަޅަން ދިޔަ އާންމު ފަރާތްތަކުން އެ ކޮމިޝަންގެ މުވައްޒަފުންނަށް ބިރުދައްކާއި އިންޒާރު ދީފައިވާ ކަމަށެވެ.

އިންޒާރުދިން ފަރާތްތަކުގެ އެއްވެސް މައުލޫމާތެއް އަކްރަމް ހާމަކޮށްފައި ނުވާއިރު، އިންތިހާބުގެ މަސައްކަތުގައި ހަރަކާތްތެރިވާ މުވައްޒަފުންނަށް ބިރު ދައްކައި އިންޒާރު ދިނުމަކީ އީސީން ނުހަނު ކަންބޮޑުވާ ކަމެއް ކަމަށް އޭނާ ވިދާޅުވިއެވެ.

އޭނާ ކުރެއްވި އިތުރު ޓްވީޓެއްގައި ވިދާޅުވީ، ބިރު ދައްކައި އިންޒާރު ދިނުމަކީ މުޖުތަމައުގެ އަމާންކަން ގެއްލިދާނެ ކަމެއް ކަމަށާއި، ގޯސް ކަންކަން ތަކުރާރު ކުރަމުން ވާނީ ގޯސް ކަމަށެވެ. އެކަމަކު އިންސާފުވެރި އަމާން އިންތިހާބެއް ރައްޔިތުންނަށް ފޯރުކޮށްދޭނެ ކަމަށެވެ.

އީސީން ބުނީ، މުވައްޒަފުންނަށް ބިރުދައްކާފަދަ ކަންތައް ކުރާ ފަރާތްތަކާއި މެދު ގާނޫނީ ގޮތުން އެޅެން ހުރި ހުރިހާ ފިޔަވަޅެއް އަޅަމުންދާނެ ކަމަށެވެ.

އޭޕްރީލް މަހުގެ ހަތަރު ވަނަ ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބަށް ފޯމް ހުށައެޅުމުގެ ފުރުސަތު އީސީން ހުޅުވާާފައިވާއިރު، ގިނަ ފަރާތްތަކަކުން ދަނީ ފޯމް ހުށައަޅަމުންނެވެ. މި ފަހަރުގެ އިންތިހާބުގައި 6000 އަށް ވުރެ ގިނަ ކެނޑިޑޭޓުން ވާދަކުރާނެ ކަމަށް ލަފާކުރެވޭ ކަމަށް އީސީން ވަނީ ބުނެފައެެވެ.