ކަރަންޓީން ކުރި 3 މީހުންގެ ތެރެއިން 2 މީހަކު ދޫކޮށްލައިފި
15 ފެބުރުއަރީ 2020 | ހޮނިހިރު 03:42ދޫކޮށްލި 2 މީހުންގެ ޓެސްޓް ނަތީޖާވެސް ނެގެޓިވް
ފަރުކޮޅު ފުށީގެ ކަރަންޓީން ފެސިލިޓީ
ޗައިނާއަށް ދަތުރުކޮށްފައިވާތީ ރައްޖޭގައި ކަރަންޓީންކުރި 3 މީހުންގެ ތެރެއިން 2 މީހަކު ދޫކޮށްލައިފިއެވެ.
ހެލްތު މިނިސްޓްރީން ބުނެފައިވަނި ޑަބްލިއުއެޗްއޯއިން ކަނޑައެޅި މުއްދަތުގައި ޗައިނާއިން ވައިރަސް ފެނިފައިވާ ސިޓީއަކަށް ދަތުރުކުރި ފަރާތަކައް ވުމުން، ކޮރޯނާ ވައިރަސް ނެތްކަން ކަށަވަރުކުރުމަށް ކަރަންޓީން ކުރި 3 މީހުންގެ ތެރެއިން 2 މީހަކު ދޫކޮށްލާފައިވާ ކަމަށެވެ.
ފާއިތުވި 14 ދުވަހުގެ ތެރޭގައި ޗައިނާއަށް ދަތުރުކޮށްފައިވާތީ ފަރުކޮޅުފުށީގައި 3 ދިވެއްސަކު ކަރަންޓީން ކުރިއެވެ. އަދި އެ މީހުންގެ ގައިގައި ވައިރަސްގެ އަސަރު ނެތްކަން ކަށަވަރުކުރުމަށް ޓެސްޓް ހަދާފައިވާ އިރު، މިހާތަނަށް 2 މީހެއްގެ ޓެސްޓް ނަތީޖާ ލިބި އެ ދެމީހުން ބައްޔަށް ނެގެޓިވްކަން ވަނީ ކަށަވަރު ކުރެވިފައެވެ.
އަދި ކަރަންޓީންގައި ބަހައްޓާ 14 ދުވަހުގެ މުއްދަތު ހަމަވެގެން އެ ދެމީހުން ވަނި ދޫކޮށްލާފައެވެ.
ކޮރޯނާ ވައިރަސްއާއި ގުޅިގެން ދިވެހި ސަރުކާރުން ވަނީ ރައްކާތެރިކަމުގެ ފިޔަވަޅުތައް އަޅާފައެވެ. އެގޮތުން ދާއިމީ ކަރަންޓީން ފެސިލިޓީއެއް ޤާއިމުކޮށް، އެއަރޕޯޓް އަދި ސީ ޕޯޓުގައި ވަނީ ރައްކާތެރިކަމުގެ ފިޔަވަޅުތައް އަޅާފައެވެ. އަދި ކަމާބެހޭ ފަރާތްތައް ޢަމަލުކުރާނެ ގޮތުގެ ޕްލޭނެއް އެކުލަވާލާފައިވެއެވެ.
