އެއިރެއްގައި ވެރިކަމުގައި ހުންނަވާ ބޭފުޅަކީ ޑީއާރުޕީގެ ޒައީމް: ޖާބިރު
13 ފެބުރުއަރީ 2020 | ބުރާސްފަތި 14:54އެއިރަކު ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅަކީ ޑީއާރުޕީގެ ޒައީމުކަމަށް ޑީއާރުޕީގެ އަސާސީ ގަވާއިދުގައި ބުނާކަމަށް ޖާބިރު ވިދާޅުވޭ
ކާށިދޫ ދާއިރާގެ މެމްބަރު އަބްދުﷲ ޖާބިރު: ބުރާސްފަތު ދުވަހުގެ ރާއްޖެޓީވީގެ \"ފަށާއިރު\" ޕްރޮގްރާމްގެ ތެރެއިން
ދިވެހި ރައްޔިތުންގެ ޕާޓީ (ޑީއާރުޕީ)ގެ "ޒައީމް"ގެ މަގާމަކީ އަބަދުވެސް އޭރަކު ވެރިކަމުގައި ހުންނަވާ ބޭފުޅަކަށް އަރުވާފައި އޮންނަ މަގާމެއް ކަމަށާއި, މިހާރު ޑީއާރުޕީގެ ޒައީމަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކަމަށް ޑީއާރުޕީގެ ލީޑަރު އަދި ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެ އެވެ.
ޖާބިރު މިހެންވިދާޅުވީ، ރާއްޖެޓީވީގެ "ފަށާއިރު" ޕްރޮގްރާމްގައި ބުރާސްފަތި ދުވަހު ބައިވެރިވެވަޑައިގެން ޑީއާރުޕީއާ ގުޅިގެން ދެއްކެވި ވާހަކަތަކާއި ގުޅިގެންނެވެ.
ޖާބިރު ވިދާޅުވީ ޑީއާރުޕީ އުފެއްދުމުގައި އުޅުއްވާފައިވާނެ ކަމަށާއި، އަދި ޑީއާރުޕީގެ ޒައީމްގެ މަގާމަށް ހަމަޖައްސަވާފައި ވަނީ އޭރު ރައީސުލްޖުމްހޫރިއްޔާގެ މަގާމުގައި ހުންނެވި ކުރީގެ ރައީސް މައުމޫން އަބްދުލްގައްޔޫމް ކަމަށެވެ.
ޖާބިރު ވިދާޅުވީ ޑީއާރުޕީގެ ލީޑަރުކަމާ ހަވާލުވެވަޑައިގެންނެވިފަހުން، ޑީއާރުޕީއަށް ވަރަށް ބިޑެތި ބަދަލުތަކެއް އަންނަމުންދާ ކަމަށެވެ. މިހާރު ޑީއާރުޕީ ހިންގަނީ މީހުންނަށް ފުރުސަތު ލިބިދޭ ގޮތަށް ކަމަށް ވެސް ޖާބިރު ވިދާޅުވި އެވެ.
އެގޮތުން އަންނަ އޭޕްރީލް މަހު ބާއްވާ ލޯކަލް ކައުންސިލްތަކުގެ އިންތިހާބުގައި ހުރިހާ ދާއިރާތަކަށް ވާދަކުރައްވާނެ ކަމަށެވެ. ޖާބިރު ވިދާޅުވީ ޑީއާރުޕީން ޕްރައިމަރީ ނުބާއްވާނެ ކަމަށާއި ޑީއާރުޕީން ވާދަކުރާ ކެންޑިޑޭޓުންނަށް ޓިކެޓާއި ބަޖެޓް ދެއްވާނެ ކަމަށެވެ.
ޖާބިރު ވިދާޅުވީ ލޯކަލް ކައުންސިލް އިންތިހާބުގައި އެމްޑީޕީއަށް ވުރެ ކުޑަތަންކޮޅެއް ގިނަ ގޮނޑި ޑީއާރުޕީން ކާމިޔާބު ކުރާނެ ކަމަށެވެ.
