ބުދަ ދުވަހުގެ މަޖިލީހުގެ ޖަލްސާއަށް މިނިސްޓަރ އޮފް ފިނޭންސް އެންޑް ޓްރެޝަރީ އިބްރާހިމް އަމީރު ހާޒިރުކޮށް، ސުވާލު އެޖެންޑާ ކޮށްފިއެވެ.

މިނިސްޓަރ މަޖިލީހަށް ހާޒިރު ކުރުމަށް ހުށަހެޅުއްވީ ކާށިދޫ ދާއިރާގެ މެންބަރު ޢަބްދުﷲ ޖާބިރެވެ. މެމްބަރު މިނިސްޓަރާއި ކުރައްވާ ސުވާލަކީ ނޫމަޑި ރިޒޯޓްސް އެންޑް ރެސިޑެންސީޒް އިން ދިވެހި ސަރުކާރުގެ މައްޗަށް ހުށަހެޅި މައްސަލަ ނެދަރލޭންޑްސްގެ ދަ ހޭގަންގައި ހުންނަ ޕާމަނަންޓް ކޯޓު އޮފް އާބިޓްރޭޝަނުން ގޮތަކަށް ނުނިމެނީސް، ދިވެހި ރައްޔިތުންގެ ފައިސާއިން އެތައް މިލިޔަން ޑޮލަރު ބަދަލުގެ ގޮތުގައި ދިނީ ކޮން ޤާނޫނީ ހައިސިއްޔަތަކުންތޯއެވެ. އަދި އާބިޓްރޭޝަނުން ނިންމާނީ ބަދަލުދޭންޖެހޭ ގޮތަށްކަން މިނިސްޓަރަށް އެނގިވަޑައިގަތީ ކޮންގޮތަކުންތޯއާއި އާބިޓްރޭޝަނުން ނުނިމެނީސް ނޫމަޑި ކުންފުންޏަށް ބަދަލުގެގޮތުގައި ކިހާ ފައިސާއެއް ދެއްވައިފިންތޯއެވެ.

ނޫމަޑި މައްސަލައިގައި މިނިސްޓަރ މަޖިލީހަށް ހާޒިރު ކުރާއިރު، ނޫމަޑި ރިސޯޓްސް އެންޑް ރެސިޑެންސަސް އަންސްތާލްތްއަށް ދައުލަތުން ބަދަލު ދޭންޖެހުނު މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީން ބަލާފައިވެއެވެ. އެގޮތުން އެ މައްސަލައިގައި ކުރީގެ ހައުސިންގ މިނިސްޓަރު ޑރ. މުޙައްމަދު މުއިއްޒުގެ މައްޗަށް ތަހުގީގު ހިންގާދިނުމަށް އެދި ފުލުހުންނަށް ހުށަހެޅުމަށް ރައްޔިތުންގެ މަޖިލީހުން ވަނީ ފާސްކޮށްފައެވެ.

ރައީސް ޔާމީނުގެ ސަރުކާރުން ބާޠިލުކުރި ދެ އެއްބަސްވުމެއްގެ މައްސަލަ ނޫމަޑިން ވަނީ ނެދަލޭންޑްސްގެ ދަ ހޭގަންގައި ހުންނަ ޕާރމަނަންޓް ކޯޓް އޮފް އާބިޓްރޭޝަނަށް ހުށަހަޅާފައެވެ. އެމައްސަލަތަކުގެ ގެއްލުމުގެ ބަދަލުގެ ގޮތުގައި ދައުލަތުން ނޫމަޑިއަށް 55 މިލިއަން ޑޮލަރު (849،750،000ރ) ދައްކަން ޖެހުނެވެ. އެފައިސާ މިސަރުކާރުން ވަނީ ދައްކާފައެވެ.

އެއްބަސްވުން އުވާލި މައްސަލަތަކުގައި ނޫމަޑިން، އާބިޓްރޭޝަނަށް ހުށަހެޅީ 155 މިލިއަން ޑޮލަރު (2.3 ބިލިއަން ރުފިޔާ) ހޯދުމަށެވެ. ކޯޓުގައި މި މައްސަލަ ހިނގަމުން ދަނިކޮށް އެ ކުންފުންޏާ ވާހަކަ ދައްކައި ބަދަލުގެ ގޮތުގައި 55 މިލިއަން ޑޮލަރު ދިނީ، ރައީސް އޮފީހުގައި އޮންނަ ސެޓްލްމެންޓް ކޮމިޓީން ނިންމައިގެންނެވެ.