ލީޑު ފުޅާކުރަން ލިބުނު ފުރުސަތު ބަޔާނުން ނަގާލައިފި

އާރުބީ ލެއިޕްޒީގްއާ އެއްވަރުވެ ޖަރުމަން ލީގުގެ އެއްވަނައިގައި ލީޑު ފުޅާކުރަން ލިބުނު ފުރުސަތު އެންމެ ފަހުގެ ޗެމްޕިއަން ބަޔާން މިއުނިކުން ނަގާލައިފި އެވެ.

ބަޔާންގެ ދަނޑުގައި އާދީއްތަ ދުވަހުގެރޭ ކުޅުނު މެޗު ނިމުނީ ދެ ޓީމުންކުރެ ޓީމަކަށް ލަނޑެއް ކާމިޔާބުނުކުރެވި އެވެ.

އާދީއްތަ ދުވަހުގެރޭގެ މެޗުން މޮޅުވެ ތާވަލުގެ އެއްވަނައިގައި ހަތަރު ޕޮއިންޓުގެ ލީޑެއް ނެގުމުގެ ފުރުސަތު ބަޔާނަށް އޮތް ނަމަވެސް، މި މެޗު އެއްވަރުވުމުން ބަޔާން އެއްވަނައިގައި އޮތީ އެންމެ ޕޮއިންޓެއްގެ ފަރަގަކާއެކު އެވެ. ބަޔާނަށް 21 މެޗުން 43 ޕޮއިންޓު ލިބިފައިވާއިރު، ލެއިޕްޒީގްއަށް 21 މެޗުން ލިބިފައިވަނީ 42 ޕޮއިންތެވެ.

ބަޔާންގެ ދަނޑުގައި ކުޅުނު މި މެޗު ޑޮމިނޭޓުކޮށްގެން ކުޅުނީ އެޓީމުންނެވެ. އެގޮތުން ފުރަތަމަ ހާފުގައި ތިއާގޯ އަލްކަންޓްރާ އާއި ލިއޯން ގޮރެޓްޒްކާ ވަނީ ދެ ހަމާލާއެއް ފޮނުވާލާފައެވެ. އެކަމަކު ދެވަނަ ހާފުގައި ލެއިޕްޒީގްގެ މިޑްފީލްޑަރު މާސެލް ސަބިޓްޒާއަށް ވަނީ ލީޑު ނަގަން ރަނގަޅު ފުރުސަތެއް ލިބި ބޭކާރުވެފައެވެ. ގޯލު ކުރިމަތީހުރެ އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެ ބޭރަށެވެ. އަދި މެޗުގެ ފަހުކޮޅު ބަޔާންގެ ގޮރެޓްޒްކާ ނުރައްކާތެރި ހަމަލާއެއް އުފެއްދި ނަމަވެސް، ލެއިޕްޒީގްގެ ގޯލްކީޕަރު ގުލާކްސ ވަނީ އެ ހަމަލާ ހުޝިޔާރުކަމާއެކު ދިފާއުކޮށްފައެވެ.

މި މެޗުން މޮޅުވެ އެއްވަނައިގައި ލީޑު ފުޅާކުރަން ލިބުނު ފުރުސަތު ބަޔާނުން ނަގާލިއިރު، ލީގުގައި ދެން ބަޔާން މެޗެއް ކުޅޭނީ އަންނަ ހަފުތާގެ އާދީއްތަ ދުވަހު އެވެ. އެ ދުވަހު ބަޔާން ނުކުންނާނީ އެފްސީ ކޮލޯންއާ ދެކޮޅަށެވެ.