ވަޒީރު ގުޅައިގެން ކަންކުރާ އުސޫލު ބަދަލު ކުރަންޖެހޭ، ސީއެސްސީ މާބޮޑަށް ވެސް ސްލޯ
10 ފެބުރުއަރީ 2020 | ހޯމަ 08:52މިނިސްޓަރ ގުޅައިގެން ކަންކުރާ އުސޫލު ބަދަލު ކުރަންޖެހޭ ކަމަށް ވިދާޅުވި
ވަޒީރުން، މިނިވަން މުއައްސަސާތަކުގެ ކޮމިޓީގައި
ސިވިލް ސަރވިސްގެ މަަސައްކަތްތައް ހުންނަ ގޮތުން ގިނަ ގޮންޖެހުންތަކަކާ ކުރިމަތިލާން ޖެހޭ ކަމަށް ވިދާޅުވެ، ވަޒީރުން ކަންބޮޑުވުން ފާޅުކޮށްފިއެވެ.
ސިވިލް ސަރވިސް ކޮމިޝަން (ސީއެސްއީ) އާއި ގުޅޭގޮތުން ވަޒީރުންގެ ހުރި ކަންބޮޑުވުން ފާޅުކޮށްފައިވަނީ، ސަރުކާރުގެ ވުޒާރާތަކުގެ މަސްއޫލިއްޔަތުތައް އަދާ ކުރުމުގައި ސިވިލް ސަރވިސް ކޮމިޝަން (ސީއެސްސީ) ގެ އެއްބާރުލުން ލިބެމުންދާ މިންވަރާއި ގުޅޭ ގޮތުން މަޝްވަރާ ކުރެއްވުމަށް ވަޒީރުންނާއިއެކު ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީން ހޯމަ ދުވަހު ބޭއްވި ބައްދަލުވުމުގައެވެ.
އެގޮތުން މި ބައްދަލުވުމުގައި ވަޒީރުން ވަނީ ސިވިލް ސަރވިސްގެ މަސައްކަތްތައް ހުންނަ ގޮތުން ދިމާވާ ގޮންޖެހުންތައް ކޮމިޓީއާއި ހިއްސާކުރައްވާފައެވެ.
ކޮމެޓީގައި ވާހަކަ ދައްކަވަމުން މިނިސްޓަރ އަސްލަމް ވިދާޅުވީ ސީއެސްސީން މަސައްކަތް ކުރަމުންދަނީ 'ޓާސްކް އޮރިއެންޓެޑް' ކޮށް ކަމަށެވެ. އެގޮތުން ވަޒީރު އެ ކަމެއްގެ ތެރެއަށް ވަދެ، އެކަމެއް ކުރީމާ އެ ކޮމިޝަންގެ މަސައްކަތްތައް ވެސް އަވަސްވާ ތަން ފެންނަ ކަމަށެވެ.
ކޮމެޓީގައި ވާހަކަދައްކަވަމުން ހުރިހާ ވަޒީރުންވެސް ފާހަގަކުރެއްވި ވާހަކައަކީ ސީއެސްސީ 'ސްލޯ' ކަމުގެ ވާހަކައެވެ. އެކޮމިޝަނުގެ މަސައްކަތްތަށް ކުރުމަށް ލަސްވަމުންދާތީ އެ ވުޒާރާތަކުގެ ބައެއް މަސައްކަތްތައްވެސް ކުރުމަށް ދަތިވާ ވާހަކައެވެ. ކޮމިޝަނަށް ފޮނުވާ ސިޓީތަކުގެ ޖަވާބު ނުލިބި އެތައް މަހެއް ފާއިތުވާކަން ހުރިހާ ވަޒީރުންވެސް ފާހަގަކުރެއްވިއެވެ. އެ ކޮމިޝަނުގެ މަސައްކަތްތައް ސްލޯކަން ފާހަގަކުރައްވާ މިނިސްޓަރ އަލީ ވަހީދު ވިދާޅުވީ މަގާމުތައް ސިސްޓަމްތަކަސް އެންޓަރ ކުރުމުގައިވެސް ލަސްތަކެއް އުޅޭ ކަމަށެވެ.
ސިވިލް ސަރވެންޓުންނަށް މަގާމުގައި ކުރިއެރުން ނުލިބޭ ވާހަކަ ވަޒީރުން ކޮމިޓީގައި ފާހަގަކުރައްވާފައިވެއެވެ. އެގޮތުން މިހާރު ނިޒާމު އޮތް ގޮތުން ތަޖުރިބާއަށް ނުބެލޭ ކަމަށް ޓުއަރިޒަމް މިނިސްޓަރ ވިދާޅުވެފައިވެއެވެ.
މީގެ އިތުރުން ޕްލޭނިންގް މިނިސްޓަރ ވިދާޅުވީ ދިވެހި ސިވިލް ސަރވިސް ކޮމިޝަންގެ އޮނިގަނޑު އޮންނަ ގޮތުން ރަނގަޅަށް މަސައްކަތް ކުރާ މުވައްޒަފެކޭ ރަނގަޅަށް މަސައްކަތް ނުކުރާ މުވައްޒަފަކާއި ތަފާތެއް ނެތް ކަމަށެވެ. އެގޮތުން މަސައްކަތަށް ފަރުވާ ކުޑަ ކުރި ނަމަވެސް އެމީހެއްގެ ޕަރފޯމެންސުން އެ ގޯސްކޮށް ފެންނަ ގޮތެއް ނޯންނަ ކަމަށެވެ.
ކޮމެޓީގައި ވާހަކަދައްކަވަމުން ހުރިހާ ވަޒީރުންވެސް ފާހަގަކުރެއްވި އަނެއް ނުކުތާއަކީ މުސާރާގައި ބޮޑެތި ފަރަގުތަކެއް ހުރުމެވެ. އެގޮތުން ސިވިލް ސަރުވެންޓުން ކުރާ މަސައްކަތާއި ލިބޭ މުސާރަ އެކަށީގެންނުވާކަމަށް ވަޒީރުން އިއްތިފާގުވެއެވެ. އަދި ލިބޭ މަދު މުސާރައިގެ ސަބަބުން މަގާމަށް އެންމެ ގާބިލު މީހުން ހޯދުމަށް ދަތިވާކަމަށް ވިދާޅުވެފައިވެއެވެ.
ހުރިހާ ވަޒީރުންވެސް ކޮމިޓީގައި ވަނީ ނިޒާމު ހަރުދަނާ ކުރަންޖެހޭ ކަން ފާހަގަކުރައްވާފައެވެ. ކޮމިޓީގެ ބާކީ ބައި ކުރިއަށް ގެންގޮސްފައިވަނީ ސިއްރުކޮށްގެންނެވެ.
މި ބައްދަލުވުމުގައި މިނިސްޓަރ އޮފް ހޯމް އެފެއާޒް އައްޝައިޚް ޢިމްރާން ޢަބްދުﷲ އާއި މިނިސްޓަރ އޮފް ފިނޭންސް އިބްރާހީމް އަމީރު އާއި މިނިސްޓަރ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ މުޙައްމަދު އަސްލަމްގެ އިތުރުން މިނިސްޓަރ އޮފް ހަޔަރ އެޑިޔުކޭޝަން ޑރ އިބްރާހީމް ޙަސަން ބައިވެރިވެވަޑައިގެންފައިވެއެވެ. މީގެއިތުރުން މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މުޙައްމަދު މަލީޙް ޖަމާލް އާއި މިނިސްޓަރ އޮފް ހެލްތް ޢަބްދުﷲ އަމީން އާއި މިނިސްޓަރ އޮފް އެޑިޔުކޭޝަން ޑރ ޢާއިޝަތު ޢަލީގެ އިތުރުން މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން ވެސް ބައިވެރިވެވަޑައިތެވެ.
