ފަހަތުން އަރައި މިލާން ބަލިކޮށް އިންޓަ އެއްވަނައަށް
އޭސީ މިލާންގެ މައްޗަށް އިންޓަ މިލާން ކުރިހޯދީ 4-2 އިން
އިންޓަ އާއި މިލާން ބައްދަލުކުރި މެޗުގެ ތެރެއިން
އިޓާލިއަން ލީގުގައި އާދީއްތަ ދުވަހުގެރޭ ފަހަތުން އަރައި އޭސީ މިލާންގެ މައްޗަށް ކުރިހޯދާ ތާވަލުގެ އެއްވަނައަށް އިންޓަ މިލާން ޖެހިލައިފި އެވެ.
އިންޓަގެ ޖުސެއްޕެ މެއާއްޒާ ދަނޑުގައި އާދީއްތަ ދުވަހުގެރޭ ކުޅުނު މެޗުން މިލާންގެ މައްޗަށް އިންޓަ ކުރހޯދީ 4-2 ގެ ނަތީޖާއަކުންނެވެ.
މި މޮޅާއެކު އިންޓަ ތާވަލުގެ އެއްވަނައަށް ޖެހިލީ ކުޅުނު 23 މެޗުން 54 ޕޮއިންޓު ހަމަކޮށްގެންނެވެ. ތާވަލުގެ ދެވަނައިގައި އޮތް އެންމެ ފަހުގެ ޗެމްޕިއަން ޔުވެންޓަސްއަށްވެސް 23 މެޗުން ލިބިފައިވަނީ 54 ޕޮއިންޓެވެ. އިންޓައަށް ކުރިލިބެނީ ގޯލުގެ ތަފާތުންނެވެ. ތިންވަނައިގައި އޮތް ލާޒިއޯއަށް 23 މެޗުން 53 ޕޮއިންޓު ލިބިފައިވާއިރު، އިންޓަ އަތުން ބަލިވި މިލާން އޮތީ ދިހަވަނައިގައި 23 މެޗުން 32 ޕޮއިންޓާއެކު އެވެ.
އާދީއްތަ ދުވަހުގެރޭ ކުޅުނު މިލާން ޑާބީ މެޗުގެ ފުރަތަމަ ހާފުގައި މިލާނުން މޮޅު ކުޅުމެއް ދެއްކިއިރު، އެޓީމުން ވަނީ މި ހާފުގައި ދެ ގޯލުގެ ލީޑެއް ނަގާފައެވެ. އެގޮތުން 40 ވަނަ މިނެޓުގައި ޒްލަޓާން އިބްރާހިމޮވިޗްގެ އެހީއާއެކު އެ ލަނޑު މިލާނަށް ކާމިޔާބުކޮށްދިނީ އަންޓެ ރެބިޗެވެ. އަދި ފުރަތަމަ ހާފުގެ އިތުރުވަގުތުގައި މިލާނަށް ލީޑު ފުޅާކޮށްދިނީ މީގެ ކުރިން އިންޓައަށްވެސް ކުޅެފައިވާ އިބްރަހިމޮވިޗެވެ.
އެކަމަކު ދެވަނަ ހާފުގައި އިންޓައިން ކުޅުން ރަނގަޅުކުރިއިރު، މި ހާފު ފަށައިގެން 8 މިނެޓު ތެރޭ އެޓީމުން ވަނީ ދެ ލަނޑު ޖަހާ ނަތީޖާ އެއްވަރުކޮށްފައެވެ. 51 ވަނަ މިނެޓުގައި މާސެލޯ ބްރޮޒޮވިން އިންޓަގެ ފުރަތަމަ ލަނޑު ކާމިޔާބުކޮށްދިންއިރު، އޭގެ ދެ މިނެޓު ފަހުން އިންޓައަށް ނަތީޖާ އެއްވަރުކޮށްދިނީ މަޓިއަސް ވެޗީނޯ އެވެ.
މި މެޗުގައި ފަހަތުން އަރައި އިންޓައިން ލީޑު ނެގީ މެޗުގެ 70 ވަނަ މިނެޓުގައެވެ. އެންޓޯނިއޯ ކަންޑްރޭވާގެ އެހީއާއެކު ސްޓެފަން އިންޓައަށް ލީޑު ނަގައިދިންއިރު، ފަހު މިނެޓުގައި ރެމެލޫ ލުކާކޫ ވަނީ އިންޓައަށް ލީޑު ފުޅާކޮށްދީފައެވެ.
މިލާން ޑާބީ މެޗުން އޭސީ މިލާންގެ މައްޗަށް އިންޓަ މިލާން އާދީއްތަ ދުވަހުގެރޭ ކުރިހޯދިއިރު، އިޓާލިއަން ލީގުގައި އެންމެ ފަހުން އިންޓަ އަތުން މިލާން މޮޅުވެފައިވަނީ 2017 ވަނަ އަހަރު އެވެ.
