ޖެނުއަރީ މަހުގެ އާމްދަނީ 1.6 ބިލިއަން ރުފިޔާ، ޚަރަދު 1.4 ބިލިއަން ރުފިޔާ!
ޚަރަދަށް ވުރެން ލިބުނު އާމްދަނީ 113 މިލިއަން ރުފިޔާ އިތުރު
ދައުލަތަށް ޓެކްސްއާއި ފީ ދައްކަންޖެހޭ ފައިސާ ބަލައިގަންނަމުންދާ މައި އިދާރާ މީރާ-
ޖެނުއަރީ މަސް ނިމުނުއިރު އާމްދަނީގެ ގޮތުގައި ދައުލަތަށް 1.6 ބިލިއަން ރުފިޔާ ލިބިފައިވާކަމަށް ފިނޭންސް މިނިސްޓްރީން ހާމަކޮށްފި އެވެ.
ފިނޭންސް މިނިސްޓްރީން އާއްމުކޮށްފައިވާ ތަފާސް ހިސާބުތަކަށް ބަލާއިރު ޖެނުއަރީ މަހުގެ ނިޔަލަށް ދައުލަތަށް 1.6 ބިލިއަން ރުފިޔާގެ އާމްދަނީއެއް ލިބިފައިވާއިރު، އޭގެ ތެރޭގައި ޓެކްސް އާމްދަނީގެ ގޮތުގައި ލިބިފައިވާ 1.4 ބިލިއަން ރުފިޔާއާއި ޓެކްސް ނޫން އާމްދަނީގެ ގޮތުގައި ލިބިފައިވާ 180 މިލިއަން ރުފިޔާ ހިމެނެއެވެ.
ޓެކްސްގެ ގޮތުގައި ދައުލަތަށް އެންމެބޮޑު އާމްދަނީއެއް ލިބިފައިވަނީ، މުދަލާއި ހިދުމަތުގެ އަގުން ނެގޭ ޓެކްސް (ޖީއެސްޓީ)އިން ލިބުނު 725 މިލިއަން ރުފިޔާއާއި، ވިޔަފާރީގެ ފައިދާއިން ނެގޭ ޓެކްސް (ބީޕީޓީ) އިން ލިބުނު 541 މިލިއަން ރުފިޔާ އެވެ. ގްރީން ޓެކްސްގެ ގޮތުގައި 81 މިލިއަން ރުފިޔާ ލިބިފައިވާއިރު، އެއާރޕޯޓް ސަރވިސް ޗާރޖުގެ ގޮތުގައި 65 މިލިއަން ރުފިޔާ ލިބިފައިވެއެވެ.
ޓެކްސް ނޫން އާމްދަނީގެ ގޮތުގައި 180 މިލިއަން ރުފިޔާ ލިބިފައިވާއިރު، އެންމެބޮޑު އާމްދަނީއެއް ލިބިފައިވަނީ، އެކިއެކި ފީތަކާއި ޗާރޖުތަކުގެ ގޮތުގައި ލިބުނު 98 މިލިއަން ރުފިޔާ އެވެ. ކުލީގެ ގޮތުގައި 54 މިލިއަން ރުފިޔާ ލިބިފައިވާއިރު، ރެޖިސްޓްރޭޝަނާއި ލައިސަންސް ފީގެ ގޮތުގައި 10 މިލިއަން ރުފިޔާ ލިބިފައި ވެއެވެ. އަދި އެހެނިހެން އާމްދަނީގެ ގޮތުގައި 4.3 މިލިއަން ރުފިޔާ ލިބިފައި ވެއެވެ.
މި އަހަރުގެ ފުރަތަމަ މަހު، ދައުލަތުގެ ޚަރަދުތައް ހުރީ 1.4 ބިލިއަން ރުފިޔާގައެވެ. އެހެންކަމުން މިއަހަރުގެ ފުރަތަމަ މަހުގެ ޚަރަދުތަކަށްވުރެ ދައުލަތަށް ލިބުނު އާމްދަނީ ވަނީ 113 މިލިއަން ރުފިޔާ އިތުރުވެފައެވެ.
