ހިދުމަތުގެ ފެންވަރު ރަނގަޅު ކުރުމަށް, ބިޒްނަސް ސަޕޯޓު ސިސްޓަމް އަޕްގްރޭޑްގެ ދެވަނަ މަރުހަލާގެ މަސައްކަތްތަކެއް ކުރުމަށް ހަމަޖެހިފައި ވާތީ ދިރާގުން ދެމުންގެންދާ ބައެއް ޚިދުމަތްތަކަށް ބުރު އަރާނެކަމަށް އެކުންފުނިން ބުނެފި އެވެ.

ދިރާގުން ބުނީ މިމަހުގެ 10 ވާ ހޯމަ ދުވަހުގެ ރޭގަނޑު 11:00 އާ ހަމައަށް އެކުންފުނިން ދޭ ބައެއް ޚިދުމަތްތައް ނުލިބޭނެ ކަމަށެވެ. އެގޮތުން ފެބްރުއަރީ މަހުގެ 8 ވަނަ ދުވަހުގެ މެންދަމު 12:00 އިން ފެށިގެން ފެބްރުއަރީ މަހުގެ 10 ވަނަ ދުވަހުގެ ރޭގަނޑު 11:00 އާ ހަމައަށް ފިކްސްޑް ބްރޯޑްބޭންޑްގެ ހިދުމަތާއި ބިލް ދެއްކުމުގެ ހިދުމަތް މެދުކެނޑިގެންދާނެއެވެ.

މިކަމާއި ގުޅިގެން ދިރާގުން އިތުރަށް ބުނެފައިވަނީ މި މުއްދަތުގައި ބިލު ނުދައްކައިގެން އެއްވެސް ހިދުމަތެއް މަދުކަނޑާނުލާނެ ކަމަށެވެ. ބައެއް ހިދުމަތްތައް މެދުކެނޑުނު ނަމަވެސް، ގުޅުމާއި އިންޓަނެޓާއި ފިކްސްޑް ލައިން ބޭނުން ކުރުމުގައި އެއްވެސް ކަހަލަ ދަތިކަމެއް ކުރިމަތި ނުވާނެ ކަމަށް ދިރާގުން ބުނެ އެވެ.

ދިރާގުން ވަނީ މިކަމުގެ ސަބަބުން ކަސްޓަމަރުންނަށް ދިމާވެދާނެ ދަތިތަކަށް މައާފަށް އެދިފައެވެ.