ފުލުހުންނަށް ފިސްތޯލަ ދޭން ހެޔޮނުވާނެ: ދީދީ
ރާއްޖޭގައި ތޫނު އެއްޗެހިން ހަމަލާދިނުން ވަނީ އާންމުވެފައި
ފުލުހުން އޮޕަރޭޝަނެއް ހިންގަނީ
ދިވެހި ފުލުހުންނަށް ފިސްތޯލަ ދޭން ހެޔޮނުވާނެ ކަމަށް ސިފައިންގެ ހިދުމަތުގައި ގިނަ ދުވަހު ހިދްމަތް ކުރެއްވި، އަދި ނިމިދިޔަ 18 ވަނަ ރައްޔިތުންގެ މަޖިލީހުގެ އައްޑޫ ސިޓީ ހިތަދޫ މެދުދާއިރާގެ މެމްބަރު އިބްރާހީމް މުހައްމަދު ދީދީ ވިދާޅުވެއްޖެ އެވެ.
ކުރީގެ ރައީސް މުހައްމަދު ނަޝީދުގެ ވެރިކަމުގައި އެމްއެންޑީއެފްގެ މާލޭ އޭރިއާގެ ކުރީގެ ކޮމާންޑަރު އިބްރާހީމް މުހައްމަދު ދީދީ ކުރެއްވި ޓްވީޓެއްގައި ވިދާޅުވީ، ދިވެހި ފުލުހުންނަށް ލީތަލް ހަތިޔާރު ހަވާލުކުރުމަކީ ސަރުކާރުން ހަދާނެ އެންމެ ބޮޑު ގޯސް ކަމަށެވެ.
ދީދީ ވިދާޅުވީ، ފިސްތޯލަ ހިފައިގެން ނިކުންނަންވީ ސިފައިން ކަމަށެވެ. އަދި ދިވެހިރާއްޖެއަކީ އެހެން ގައުމަކާ ހަނގުރާމައެއް ދުވަހަކުވެސް ކުރަންޖެހޭނެ ގައުމެއް ނޫން ކަމަށެވެ. އަދި ސަލާމަތީ ހިދްމަތްތައް ރޭވިފައިވާގޮތުން ލީތަލް ހަތިޔާރާއެކު ނުކުންނަންވާނީ ސިފައިން ކަމަށް ދީދީ ވިދާޅުވި އެވެ.
ދީދީ މިހެން ވިދާޅުވެފައި މިވަނީ، ކުރީގެ ކޮމިޝަނަރު އޮފް ޕޮލިސް، އަދި މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގެ ތިމަރަފުށި ދާއިރާގެ މެމްބަރު އަބްދުﷲ ރިޔާޒު ކުރެއްވި ޓްވިޓަކާ ގުޅިގެންނެވެ.
ފަތުވެރިޔަކަށާއި ރާއްޖޭގައި މަސައްކަތްކުރާ ބޭރު ދެ މީހަކަށް ވަޅިން ދިން ހަމަލާއާ ގުޅިގެން އަބްދުﷲ ރިޔާޒު ކުރެއްވީ ޓްވީޓެއްގައި ވަނީ ރައްޔިތުންނާއި ފަތުރުވެރިންގެ ރައްކާތެރިކަމަށް ވަގުތުން އަޅަންޖެހޭ ފިޔަވަޅުތައް އެޅުމަށް ސްވޮޓް ފުލުހުންނަށް ފިސްތޯލަ ހިފައިގެން ރަށުތެރޭގައި ހަރަކާތްތެރިވާންޖެހޭ ހާލަތު އަތުވެއްޖެ ކަމަށް ދެކިވަޑައިގަންނަވާ ކަމަށެވެ. އަދި ގައުމު އަމާން ކުރެވޭނީ ފުލުހުން ބާރުވެރި ކުރުވިގެން ކަމަށް ރިޔާޒު ވިދާޅުވެފައި ވެއެވެ.
ޗައިނާގެ ފަތުރުވެރިޔަކަށާއި ރާއްޖޭގައި މަސައްކަތްކުރާ ޗައިނާ އަދި އޮސްޓްރޭލިޔާގެ މީހަކަށް ދިން އެ ހަމަލާއާ ގުޅިގެން ފުލުހުން ހިންގި އޮޕަރޭޝަނެއްގައި ވަނީ ހަރުކަށު ފިކުރުގެ 6 މީހަކު ހައްޔަރުކޮށްފަ އެވެ. އެހަމަލާގެ ޒިންމާ ނަގާކަމަށްބުނެ ހަރުކަށި ފިކުރުގެ ބަޔަކު ވަނީ ސޯޝަލް މީޑިއާގައި ވީޑިއޯއެއް އާއްމުކޮށްފަ އެވެ.
އެޙަމަލާގެ ޒިންމާ ނެގުމަށް ފަހު، ސޯޝަލް މީޑިއާގައި ދައުރުވަމުންދާ ވީޑިއޯގައި މޫނު ނިވާކޮށްގެން ތިބި ބަޔަކު، ތިމަންނާމެންމީ އިސްލާމިކް ސްޓޭޓްގެ ދިވެހިރާއްޖޭގެ ގޮފިކަމަށް ބުނެފަ އެވެ. އެ ވީޑިއޯގެ ޞައްޙަކަން ކަށަވަރުކުރުމަށް ތަޙުޤީޤުތައް ކުރަމުންދާ ކަމަށްވެސް ފުލުހުން ވަނީ ބުނެފައެވެ.
މި ހަމަލާއި ގުޅިގެން ނެޝަނަލް ސެކިއުރިޓީ ކައުންސިލް (އެންއެސްސީ) ގެ ކުއްލި ބައްދަލުވުމެއް ބާއްވައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވީ ދިވެހި ރައްޔިތުންނާއި، މިޤައުމުގައި ދިރިއުޅޭ ބިދޭސީންނާއި، އަދި މިޤައުމަށް ޒިޔާރަތްކުރާ ފަތުރުވެރީންގެ ސަލާމަތާއި ރައްކާތެރިކަން ކަށަވަރުކުރުމަކީ ސަރުކާރުން އެންމެ ބޮޑު އިސްކަމެއް ދޭ އެއް ކަންތައް ކަމަށާއި ރާއްޖޭގެ ޞަރަޙައްދުގައި މިފަދަ ފިނޑި އަމަލުތައް ހިންގުމަށް މަސައްކަތްކުރާ، އަދި މިފަދަ ޢަމަލުތައް ހިންގާނެކަމުގެ އިންޒާރުދޭ ފަރާތްތަކާއި ދެކޮޅަށް، ވަގުތުން ވަގުތަށް ފިޔަވަޅު އަޅަމުންދާނެކަމަށެވެ.
