ޓީއެމްއޭގެ މިހާރުގެ ޓާމިނަލާއި އެއްވަރުގެ ޖާގައެއް އައު ޓާމިނަލުންވެސް ދިނުމަށް ނިންމައިފި
ސަރުކާރުން އައު ސީޕްލޭން ޓާމިނަލާއި ގުޅެގޮތުން ފަސް ނިންމުމެއް ނިންމާފައިވޭ
އައު ސީޕްލޭން ޓާމިނަލް
ޓްރާންސް މޯލްޑިވިއަން އެއަރވޭސް (ޓީއެމްއޭ) އިން މިހާރުވެސް ބޭނުންކުރަމުންދާ ޖާގައިގެ ބޮޑު މިނާއި އެއްވަރަށް، އައު ސީޕްލޭން ޓާރމިނަލުން، 2 އަހަރު ދުވަހުގެ މުއްދަތަށް ޖާގަ ކުއްޔަށް ދިނުމަށް ސަރުކާރުން ނިންމައިފި އެވެ.
ފިނޭންސް މިނިސްޓްރީން ބުނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން ތަރައްޤީކުރަމުންގެންދާ ވެލާނާ އިންޓަރނޭޝަނަލް އެއަރޕޯޓްގެ ސީޕްލޭން ޓަރމިނަލްއަކީ ސަރުކާރުން ސޮވެރިން ގެރެންޓީދީގެން ކުރިއަށް ގެންދާ މަޝްރޫއެއް ކަމަށެވެ. އަދި މި މަޝްރޫޢު ކުރިއަށް ގެންދިއުމަކީ އެއަރޕޯޓް ބޮޑުކުރުމުގެ މަޝްރޫޢު ފުރިހަމަ ކުރުމަށާއި އަދި ޕަސެންޖަރ ޓްރެފިކް މެނޭޖްކުރުމަށް ކޮންމެހެން މުހިއްމު މަޝްރޫޢެއް ކަމަށާއި، ސީޕްލޭން އޮޕަރޭޓަރުންނަކީ ދިވެހިރާއްޖޭގެ ފަތުރުވެރިކަމުގެ ސިނާއަތް ދެމެހެއްޓުމުގައި އަދި ތަރައްޤީކުރުމުގައި މުހިއްމު ރޯލެއް އަދާކުރާ ބަޔަކަށްވާއިރު، އެއަރޕޯޓް ބޮޑުކުރުމުގެ މަޝްރޫޢުގެ ތެރެއިން ސަރުކާރުން ސީޕްލޭން އޮޕަރޭޓްކުރުމަށް ބޭނުންވާ އިންފްރާސްޓްރަކްޗަރ ތަރައްޤީކޮށް ހުރިހާ އޮޕަރޭޓަރުންނަށް ބޭނުންކުރެވޭގޮތަށް އޮތުމަކީ މި ސިނާއަތުގެ ކުރިއެރުމަށާއި އަދި އިންވެސްޓަރުންގެ އިތުބާރުހޯދުމަށް މުހިއްމުކަމެއްކަމަށް ފިނޭންސް މިނިސްޓްރީން ބުންޏެވެ
އެކަން ހާޞިލްކުރުމަށްޓަކައި އެމް.އޭ.ސީ.އެލްއިން ލޯން ނަގައިގެން ތަރައްޤީކޮށްފައިވާ ސީޕްލޭން ޓަރމިނަލް ބޭނުންކުރުމާގުޅޭގޮތުން ސަރުކާރުންވަނީ ގޮތްތަކެއް ނިންމާފައިކަން ހާމަކޮށް ފިނޭންސް މިނިސްޓްރީން ބުނީ، ސަރުކާރުން ވާނީ، މި ނިންމުންތައް އެމް.އޭ.ސީ.އެލް ގެ ބޯޑް ހިއްސާކޮށްފައިކަމަށެވެ. އެގޮތުން ސަރުކާރުން ނިންމުންތައް ނިންމުމުގައި ބަލާފައިވާނީ އެމް.އޭ.ސީ.އެލްއަށް ލިބެންއޮތް އާމްދަނީ އިތުރުކުރެވޭނެ ގޮތަކަށް އަމަލުކުރުމާއެކު ފަތުރުވެރިކަމުގެ ސިނާއަތުގެ ކުރިއެރުމަށް ސީޕްލޭން އޮޕަރޭޓަރުން މިހާރުވެސް ކުރަމުން ގެންދާ މަސައްކަތަށް މަގުފަހިވާނެ ގޮތަކަށް އަމަލުކުރުމަށާއި އަދި ކުރިއަށް އޮތްތަނުގައި އިތުރު ސީޕްލޭން އޮޕަރޭޓަރުންނަށް މި ސިނާއަތުގައި ހަރަކާތްތެރިވުމުގެ ފުރުސަތު ފަހިވެގެންދާނެ ގޮތަކަށްއަމަލުކުރުމަށް ފިނޭންސް މިނިސްޓްރީން ބުންޏެވެ.
އޭގެއިތުރުން މިހާރު ސީޕްލޭން އޮޕަރޭޓް ކުރަމުންދާ ބައެއް ފަރާތްތަކުން އެފަރާތްތަކުން އަމިއްލަ އަށް އިންވެސްޓްކޮށްގެން މިހާރު ހަދާފައިވާ ޓާރމިނަލްތައް ހުސްކުރަންޖެހިފައިވުމާ އަދި އެކަމާ ގުޅިގެން އެފަރާތްތަކަށް އެމް.އޭ.ސީ.އެލުން ދީފައިވާ ކޮމިޓްމަންޓްތަކަށް ރިއާޔަތްކޮށް، އެފަރާތްތަކާމެދު އިންސާފުވެރިކަމާއެކު އަމަލު ކުރުމުގެއިތުރުން، އެފަރާތްތަކަކީ ފޮރިން އިންވެސްޓްމަންޓްތަކެއްކަމަށްވުމާއެކު، ބޭރުފަރާތްތަކުން ރާއްޖޭގައި އިންވެސްޓް ކުރުމަށް އޮތް އިތުބާރާއި ޔަޤީންކަން ދެމެހެއްޓޭނެ ފަދަގޮތަކަށް ނިންމުންތައް ބައްޓަންކުރުމަށްވެސް ސަރުކާރުގެ މި ނިންމުމުގައި ރިޔާއަތްކޮށްފައިވާނެކަމަށް ފިނޭންސް މިނިސްޓްރީން ބުންޏެވެ.
އޭގެއިތުރުން އޮޑިޓަރ ޖެނެރަލްގެ އޮފީހުން މިކަމާގުޅިގެން ތައްޔާރުކޮށްފައިވާ ރިޕޯޓްގައި ޓީ.އެމް.އޭއިން މިހާރު ބޭނުންކުރަމުންދާ ސީޕްލޭން ޓަރމިނަލްއަކީ އެފަރާތުން އަމިއްލައަށް އިންވެސްޓްކޮށްގެން ތަރައްޤީކޮށްފައިވާ ސީޕްލޭން ޓަރމިނަލްއަކަށްވެފައި އެފަރާތުން ރިލޮކޭޓްކުރާއިރު އިތުރު ޚަރަދުތަކެއް ހިނގާނެތީއާއި އެފަރާތުން މިހާރުދެމުންގެންދާ ޚިދުމަތް ދިނުމަށް އެއާ އެއްވަރުގެ ޖާގައެއް އައު ސީޕްލޭން ޓަރމިނަލްއިން ހަމަޖެއްސުމަކީ އެ އޮޕަރޭޓަރަށް އިންސާފުވެރިގޮތެއްކަމަށް ބަޔާންކޮށްފައިވާކަންވެސް ފިނޭންސް މިނިސްޓްރީގެ ބަޔާނުގައި ފާހަގަކޮށްފައިވެއެވެ. އަދި ސީޕްލޭން ޓަރމިނަލް އޮޕަރޭޓްކުރުން ކުރިއަށް ގެންދިއުމުން ސީޕްލޭން އޮޕަރޭޝަންސް ވާދަވެރިކަން މިހާރަށްވުރެ އިތުރުކުރަން ފުރުސަތު ލިބި އަދި މިހާރުވެސް ސީޕްލޭން އޮޕަރޭޝަންސް ހިންގާ ފަރާތްތަކުގެ އިތުބާރާއެކު ސީޕްލޭން ޓަރމިނަލް ކުރިއަށް ގެންގޮސް، އެމް.އޭ.ސީ.އެލްއަށް ސީޕްލޭން ޓަރމިނަލުން ބޮޑު އާމްދަނީއެއް ލިބިގެންދާނެކަމަށާއި، ސީޕްލޭން ޓަރމިނަލް އަވަހަށް ހުޅުވާ ޚިދުމަތް ދޭންފެށުމަކީ އައު ރަންވޭ ބޭނުންކުރުމަށްކޮންމެހެން ކުރަންޖެހޭ ކަމެއްކަމަށްވެސް ފިނޭންސް މިނިސްޓްރީގެ ބަޔާނުގައި ބުނެފައިވެއެވެ.
