ގައުމީ ޓީމުތަކާއި ބައިނަލްއަގުވާމީ މުބާރާތްތަކުގައި ބައިވެރިވާ ކުޅުންތެރިންނާއި އޮފިޝަލުންނަށް މެޑިކަލް އިންޝުއަރެންސް ފޯރުކޮށްދޭނެ ބަޔަކު ހޯދަން އިއުލާނުކޮށްފި އެވެ.

ކުޅިވަރާ ބެހޭ ވުޒާރާއިން ކުރި އިއުލާނެއްގައި ބުނެފައިވަނީ މެޑިކަލް އިންޝުއަރެންސް ދޭނެ ބަޔަކު ހޯދުމަށް މިދިޔަ ޖެނުއަރީ މަހުގެ 12 ވަނަ ދުވަހު ކުރި އިއުލާނަށް އެކަށީގެންވާ ތަރުހީބެއް ލިބިފައި ނުވާތީ, އަލުން އިއުލާނުކުރާ ކަމަށެވެ. އެގޮތުން މި މަހުގެ ނުވަވަނަ ދުވަހުގެ ނިޔަލަށް އެ ފުރުސަތު އަލުން ހުޅުވާލާފައިވާ ކަމަށްވެސް ވަނީ ބުނެފައެވެ.

ގައުމީ ޓީމުގެ ކުޅުންތެރިންގެ މެޑިކަލް އިންޝުއަރެންސް ފޯރުކޮށްދޭނެ ބަޔަކު ހޯދަން އިއުލާނުކުރިއިރު، ރައްޔިތުންގެ މަޖިލީހުގެ މިއަހަރުގެ ފުރަތަމަ ޖަލްސާގައި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އިއްވެވި ރިޔާސީ ބަޔާނުގައި ވިދާޅުވެފައިވަނީ، ގައުމީ ޓީމުތަކުގެ ކުޅުންތެރިންނަށް އިންޝުއަރެންސް ޕެކޭޖެއް ތައާރަފުކުރުމުގެ ޚިޔާލު ގެންގުޅުއްވާ ކަމަށާއި މިއަހަރުގެ ތެރޭގައި އޭގެ ޚިދުމަތް ލިބެން ފަށާނެވެ.

ގައުމީ ޓީމަށް މިހާރު ކުޅެމުން އަންނަ ކުޅުންތެރިންގެ އިތުރަށް، ގައުމީ ޓީމުން ރިޓަޔަރ ކުރާ ކުޅުންތެރިންނަށްވެސް ވަކިން ޚާއްސަ ލޯން ސްކީމެއް ތައާރަފުކުރުމަށް މަސައްކަތް ކުރަމުން އަންނަ ކަމަށްވެސް ރައީސް ވިދާޅުވި އެވެ. އެގޮތުން ރައީސް ވިދާޅުވީ، ގައުމީ ޓީމަކަށް މަދުވެގެން 5 އަހަރު ކުޅެފައިވާ ކުޅުންތެރިން ރިޓަޔަރ ކުރުމުން، ދިރިއުޅުމަށްޓަކައި އެހެން މަސައްކަތެއް ފެށުމަށް އެހީތެރިވެދިނުމުގެ ގޮތުން، މިއަހަރުގެ ތެރޭގައި ލޯން ސްކީމެއް ތައާރަފުކުރުމަށް މަސައްކަތްކުރައްވަމުން ގެންދަވާ ކަމަށެވެ.