ގްރީން އަތުން ޓީސީއަށް ފަސޭހަ މޮޅެއް

ދިރާގު ދިވެހި ޕްރިމިއާ ލީގުގައި އާދީއްތަ ދުވަހު ހަވީރު ކުޅުނު މެޗުން ކްލަބު ގްރީން ސްޓްރީޓްސް އަތުން ފަސޭހަކަމާއެކު ޓީސީ ސްޕޯޓްސް ކްލަބު މޮޅުވެއްޖެއެވެ.

އާދީއްތަ ދުވަހުގެ ހަވީރު ކުޅުނު މެޗުން ގްރީންގެ މައްޗަށް ޓީސީ ކުރިހޯދާފައިވަނީ 5-1 ގެ ނަތީޖާއަކުންނެވެ.

ގައުމީ ފުޓްބޯޅަ ދަނޑުގައި ކުޅުނު މެޗުގައި ޓީސީން ރަނގަޅު ކުޅުމެއް ދެއްކިއިރު، މެޗުގެ 17 ވަނަ މިނެޓުގައި އެޓީމުން ވަނީ ލީޑު ނަގާފައެވެ. އަލީ އަޝްފާގު (ދަގަނޑޭ) ދިން ޕާހަކުން މި ލަނޑު އެޓީމަށް ކާމިޔާބުކޮށްދިނީ އިޝާން އިބްރާހީމް (ސައްޓު) އެވެ.

ޓީސީގެ ދެވަނަ ލަނޑު ދަގަނޑޭ ކާމިޔާބުކުރީ 28 ވަނަ މިނެޓުގައި ލިބުނު ޕެނަލްޓީއަކުންނެވެ. މި ޕެނަލްޓީ ޓީސީއަށް ލިބުނީ އޭރިއާ ތެރެއިން ގްރީންގެ ޑިފެންޑަރު އާދިލް އަބްދުލް ރަހުމާން ދަގަނޑޭއަށް ފައުލް ކުރުމުންނެވެ. އޭގެ ފަހުން ގްރީންއިން މެޗުގައި ކުޅުން ރަނގަޅުކުރިއިރު، އެޓީމުން ވަނީ ޓީސީގެ ގޯލާ އަމާޒުކޮށް ނުރައްކާތެރި ހަމަލާތަކެއް އުފައްދާފައެވެ. އެކަމަކު މެޗުގައި މޮޅު ކުޅުމެއް ދެއްކި ޓީސީގެ ގޯލްކީޕަރު އާދަމް އިމްއާން ވަނީ ގްރީންގެ ހަތަރު ހަމަލާއެއް ހުށިޔާރުކަމާއެކު ދިފާއުކޮށްފައެވެ.

ފުރަތަމަ ހާފުގެ ފަހު ކޮޅު ދަގަނޑޭ ފޮނުވާލި ދެ ހަމަލާއެއް ގޯލުގެ ދަނޑިއަށް އަމާޒުވިއިރު، މި ހާފުގެ ފަހު މިނެޓުގައި ސައްޓު ދިން ޕާހަކުން މެލްކަމް ކަސިއަސް ސްޓެވާޓް ވަނީ ޓީސީގެ ތިންވަނަ ލަނޑު ކާމިޔާބުކޮށްފައެވެ.

ދެވަނަ ހާފުވެސް ޓީސީން ޑޮމިނޭޓކުރިއިރު، މެޗުގެ 78 ވަނަ މިނެޓުގައޮ ދަގަނޑޭ ދިން ޕާހަކުން ޓީސީގެ ހަތަރުވަނަ ލަނޑު ޖަހައިދިނީ އިސްމާއިލް އީސަ (މެސީ) އެވެ. އެކަމަކު މެޗުގެ 85 ވަނަ މިނެޓުގައި ލިބުނު ޕެނަލްޓީއަކުން މުހައްމަދު އާރިފް (ބަކާ) ވަނީ ގްރީންއިން މެޗުގައި ޖެހި ހަމައެކަނި ލަނޑު ކާމިޔާބުކޮށްދީފައެވެ. މި މެޗުގައި ޓީސީގެ ފަސްވަނަ ލަނޑު 89 ވަނަ މިނެޓުގައި ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަގާމުވެސް ހޯދި ދަގަނޑޭ އެވެ.

މެޗަށްފަހު ޓީސީގެ ކޯޗު މުހައްމަދު ޝާޒްލީ ބުނީ ޓީސީއާ ހަވާލުވީވެސް ޓީސީ އޮތް ހާލަތު ރަނގަޅު ކުރުމަށް ކަމަށާއި، އެކަން ލީގުގެ ފަހު މެޗުތަކުން ފެނިގެންގޮސްފައިވާ ކަމަށެވެ. އަދި މިހާރު އޮތް ޓީމުން ދައްކާ ކުޅުމާ ދޭތެރޭ ހިތްހަމަޖެހޭ ކަމަށާއި، ޓީސީއަށް ލީގު ނިމުމުން ދެން ތައްޔާރުވާނީ ކުރިއަށް އޮތް އޭއެފްސީ ކަޕަށް ކަމަށްވެސް ބުންޏެވެ.

ގްރީންގެ ކޯޗު އަލީ ސުޒޭން ބުނީ މިފަހަރުގެ ލީގު އެޓީމުން ފެށި ވަރަށް ބޮޑެތި އުންމީދުތަކަކާއެކު ކަމަށާއި އެކަމަކު ޓީމަށް ދިމާވި ހާލަތުގެ ސަބަބުން ޓީމު ބަލިކަށިވި ނަމަވެސް، ގަދަ ހަތަރެއްގެ ތެރެއަށް ވަދެވުމުން އެއީ ޓީމު އޮތް ހާލަތާ އަޅާބަލާއިރު ހިތްހަމަޖެހޭ ކަމެއް ކަމަށެވެ.

ގްރީން އަތުން އާދީއްތަ ދުވަހު ހަވީރު ޓީސީ ފަސޭހަ މޮޅެއް ހޯދިއިރު، ޓީސީ ތާވަލުގެ ތިންވަނައިގައި އޮތީ 21 މެޗުން 41 ޕޮއިންޓާއެކު އެވެ. އަދި ގްރީން ތާވަލުގެ ހަތަރުވަނައިގައި އޮތީ 21 މެޗުން ލިބުނު 29 ޕޮއިންޓާއެކު އެވެ.