ނައިޖީރިއާގެ ފޯވާޑް އޮޑިއޮން އިގާލޯ ލޯނު އެއްބަސްވުމެއްގެ ދަށުން މެންޗެސްޓާ ޔުނައިޓެޑަށް ބަދަލުވެއްޖެ އެވެ.

ލޯނު އެއްބަސްވުމެއްގެ ދަށުން އުމުރުން 30 އަހަރުގެ އިގާލޯ ޔުނައިޓެޑަށް ބަދަލުވިއިރު، މި ސީޒަނުގައި އޭނާ ކުޅެމުން އައި ޗައިނާގެ ކްލަބެއް ކަމަށްވާ ޝަންހާއީ ޝެންހުއާ އާއެކު ހެދި އެއްބަސްވުމުގައިވާ ގޮޔުން ޔުނައިޓެޑުން ފަހުން ބޭނުންވި ނަމަވެސް އިގާލޯ ގަތުމުގެ ފުރުސަތެއް ނޯންނާނެއެވެ.

މީގެ ކުރިން އިނގިރޭސި ޕްރިމިއާ ލީގުގައި ވަޓްފޯޑަށްވެސް ކުޅުނު އިގާލޯ އަކީ މިދިޔަ އަހަރު އޮތް އެފްރިކާ ކަޕް އޮފް ނޭޝަންސްގައި އެންމެ ގިނަ ގޯލް ޖެހި ކުޅުންތެރިޔާއެވެ. 2014 އިން 2017 އަށް ވަޓްފޯޑުގެ ޖާޒީގައި އިގާލޯ ފެނިގެންދިޔައިރު، އޭނާ ވަނީ އެޓީމަށް 99 މެޗު ކުޅެދީ 39 ލަނޑު ކާމިޔާބުކޮށްދީފައެވެ. އޭގެ ފަހުން އިގާލޯ ފެނިގެންދިޔައީ ޗައިނީސް ސުޕަ ލީގުންނެވެ. އެގޮތުން އިގާލޯ ވަނީ ޝަންހާއީ ޝެންހުއާއާއެކު މިދިޔަ އަހަރު ޗައިނީސް އެފްއޭ ކަޕް ކާމިޔާބުކޮށްފައެވެ.

ޖެނުއަރީ ޓްރާންސްފާ ބާޒާރު ރޭ ބަންދުވިއިރު، ޔުނައިޓެޑުން ވަނީ ތިން ކުޅުންތެރިއަކު އެޓީމަށް ގެނެސްފައެވެ. އެއީ އިގާލޯގެ އިތުރުން ސައުތެންޑް ޔުނައިޓެޑަށް ކުޅެމުން އައި 20 އަހަރު ގޯލްކީޕަރު ނަތަން ބިޝޮޕް އާއި ޕޯޗްގަލްގެ ސްޕޯޓިންގް ލިސްބަން އަށް ކުޅެމުން އައި 25 އަހަރުގެ މިޑްފީލްޑަރު ބްރޫނޯ ފެނާންޑެސް އެވެ.