އޮސްޓްރޭލިއަން އޯޕަން: ފެޑެރާ ބަލިކޮށް ޖޮކޮވިޗް ފައިނަލަށް

ދުނިޔޭގެ ތިންވަނައަށް ރޭންކް ކޮށްފައިވާ ސްވިޓްޒަލެންޑުގެ ރޮޖާ ފެޑެރާ ބަލިކޮށް އޮސްޓްރޭލިއަން އޯޕަން ޓެނިސް މުބާރާތުގެ ފައިނަލަށް ދުނިޔޭގެ ދެވަނައަށް ރޭންކް ކޮށްފައިވާ ސާބިއާގެ ނޮވަކް ޖޮކޮވިޗް ދަތުރުކޮށްފިއެވެ.

މިހާރު ކުރިއަށްދާ އިސްޓްރޭލިއަން އޯޕަންގެ ފައިނަލުން ޖޮކޮވިޗް ޖާގަ ހޯދީ ސެމީ ފައިނަލް ފުރަތަމަ މެޗުގައި މިއަދު ފެޑެރާގެ މައްޗަށް ފަސޭހަކަމާއެކު ސީދާ ތިން ސެޓުން ކުރިހޯދައިގެންނެވެ.

މި މެޗުގެ ފުރަތަމަ ސެޓުގައި ދެ ޓީމުގެ ފަރާތުން ވަނީ ވާދަވެރި ކުޅުމެއް ފެނިގެން ގޮސްފައެވެ. އެގޮތުން މި ސެޓު ޖޮކޮވިޗް ކާމިޔާބުކުރީ ޓައި ބްރޭކުގައި 7-6 އިންނެވެ. އެކަމަކު އޭގެ އަނެއް ދެ ސެޓު ޖޮކޮވިޗް ވަނީ ފަސޭހަކަމާއެކު ކާމިޔާބުކޮށްފައެވެ. އެގޮތުން އެ ދެ ސެޓު ފެޑެރާ ގެންދިޔައީ 6-4 އަދި 6-3 އިންނެވެ.

މިއަހަރުގެ އޮސްޓްރޭލިއަން އޯޕަންގެ ފައިނަލަށް ޖޮކޮވިޗް ދަތުރުކުރިއިރު، އޭނާ މީގެ ކުރިން ވަނީ މި މުބާރާތް 7 ފަހަރު ކާމިޔާބުކޮށްފައެވެ. އަދި އޭނާއަކީ މި މުބާރާތުގެ އެންމެ ކާމިޔާބު ކުޅުންތެރިޔާއެވެ. ޖޮކޮވިޗްގެ އަމާޒަކީ މިއަހަރުގެ މުބާރާތް ކާމިޔާބުކޮށް 17 ވަނަ ގްރޭންޑް ސްލޭމް މުބާރާތް ކާމިޔާބުކުރުމެވެ.

އަންނަ ހޮނިހިރު ދުވަހު ކުޅޭ ފައިނަލް މެޗުގައި ޖޮކޮވިޗް ވާދަކުރާނީ މާދަމާ އެލެގްޒަންޑާ ޒްވެރެވް އާއި ޑޮމިނިކް ތިއެމް ބައްދަލުކުރާ ސެމީ ފައިނަލް ދެވަނަ މެޗުން މޮޅުވާ ކުޅުންތެރިއަކާ އެވެ. މާދަމާގެ ސެމީ ފައިނަލް މެޗު ކުޅޭނީ ރާއްޖެ ގަޑިން 13:30 ގައެވެ.