އެގްރިގޭޓުން ކުރިހޯދާ ސިޓީ ފައިނަލަށް

އިނގިރޭސި ލީގު ކަޕްގެ ސެމީ ފައިނަލުގެ ދެވަނަ ލެގުގައި މެންޗެސްޓާ ސިޓީގެ މައްޗަށް މެންޗެސްޓާ ޔުނައިޓެޑް ކުރިހޯދި ނަމަވެސް، އެގްރިގޭޓުން ކުރިހޯދާ ފައިނަލުގެ ފަހު ޖާގަ ސިޓީ ހޯދައިފި އެވެ.

ސެމީ ފައިނަލުގެ ފުރަތަމަ ލެގުން އަމިއްލަ ދަނޑުގައި 3-1 އިން ސިޓީ އަތުން ޔުނައިޓެޑް ބަލިވިއިރު، ބުދަ ދުވަހުގެރޭ ސިޓީގެ ދަނޑުގައި ކުޅުނު ދެވަނަ ލެގުގެ މެޗުން ޔުނައިޓެޑް ކުރިހޯދީ 1-0 ގެ ނަތީޖާއަކުންނެވެ. އެހެންކަމުން 3-2 އިން އެގްރިގޭޓުން ކުރިލިބެނީ ސިޓީއަށެވެ.

ބުދަ ދުވަހުގެރޭ ކުޅުނު މެޗުގައި ދެޓީމުގެ ފަރާތުންވެސް ފެނިގެންދިޔައީ ހަމަހަމަ ކުޅުމެކެވެ. އެކަމަކު މެޗުގެ ފުރަތަމަ ހާފުގައި ޔުނައިޓެޑުން ވަނީ ލީޑު ނަގާފައެވެ. 35 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ނެމަންޖާ މަޓިޗް އެވެ.

އެކަމަކު މެޗުގެ ދެވަނަ ހާފުގައި މަޓިޗްއަށް ރެފްރީ ވަނީ ދެވަނަ ރީނދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލާފައެވެ.

ސެމީގައި އެގްރިގޭޓުން ޔުނައިޓެޑްގެ މައްޗަށް ކުރިހޯދާ ފައިނަލަށް ސިޓީ ދަތުރުކުރިއިރު، މިއީ މި މުބާރާތުގެ ފައިނަލަށް ޖެހިޖެހިގެން ސިޓީ ދަތުރުކުރި ތިންވަނަ ފަހަރެވެ. އެގޮތުން އެންމެ ފަހުން ކުޅުނު ދެ އަހަރުވެސް މި މުބާރާތުގެ ޗެމްޕިއަންކަން ހޯދާފައިވަނީ ސިޓީންނެވެ.

މިއަހަރުގެ މުބާރާތުގެ ފައިނަލްގައި ސިޓީ ބައްދަލުކުރާނީ އެސްޓަން ވިލާ އާއެވެ. އެސްޓަން ވިލާ ފައިނަލަށް ދަތުރުކުރީ ސެމީގައި ލެސްޓާ ސިޓީ ބަލިކުރުމަށްފަހު އެވެ. މުބާރާތުގެ ފައިނަލް މެޗު ކުޅޭނީ އަންނަ މާޗު މަހުގެ އެއްވަނަ ދުވަހު އެވެ.