އެ އުސޫލުން ބަދަލުކޮށްގެން މަޝްރޫއުތައް ހިންގަން ފެށުމުން މަޝްރޫއުތަކުގެ ފައިސާ، އައްޑޫ ސިޓީގައި މިހާރަށް ވުރެ ބޮޑަށް ހިފެހެއްޓޭނެ ކަމަށް
މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު
މަޝްރޫއުތައް ހިންގާ ފަރާތަކީ އެ ސިޓީގެ ކުންފުންޏެއްނަމަ އިތުރު ޕޮއިންޓު ލިބޭގޮތަށް ޓެންޑަރިން އުސޫލަށް ބަދަލުގެންނާނެކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހުކުރު ދުވަހުގެރޭ ފޭދޫ އެމްޑީޕީ ޖަގަހައިގައި އެ ދާއިރާގެ އެމްޑީޕީ މެމްބަރުންނާއި މުޚާތަބުކުރައްވާ ރައީސް ނަޝީދު ވިދާޅުވީ ސަރުކާރުގެ ފައިސާ ސިޓީ ކައުންސިލުން ހިފެހެއްޓޭގޮތަށް މަޝްރޫއުތަކުގެ ޚުލާސާ އެކުލަވާލާއިރު ބާރު އަޅުއްވާނެ ކަމަށެވެ. އަދި އެ މަޝްރޫއުތައް ހިންގާ ފަރާތްތަކަކީ އަދި ސަޕްލައިކުރާ ފަރާތްތަކަކީވެސް ސިޓީގެ ފަރާތްތަކަށްވާގޮތަށް ޓެންޑަރގެ އުސޫލުތަކަށް ބަދަލު ގެނެވޭނެ ކަމަށް ރައީސް ނަޝީދު ވިދާޅުވި އެވެ.
އެ އުސޫލުން ބަދަލުކޮށްގެން މަޝްރޫއުތައް ހިންގަން ފެށުމުން މަޝްރޫއުތަކުގެ ފައިސާ، އައްޑޫ ސިޓީގައި މިހާރަށްވުރެ ބޮޑަށް ހިފެހެއްޓޭނެ ކަމަށް ގަބޫލު ކުރައްވާ ކަމަށް އެމަނިކުފާނު ވިދާޅުވި އެވެ. އަދި ފައިސާ ހިފެހެއްޓޭނީ އެ މަޝްރޫއުތައް ހިންގުމަށް ބޭނުންވާ ކުންފުނިތަކަށް އެ މަޝްރޫއުތައް ހިންގުމުގެ ހުނަރާއި މާލީ ފެންވަރު ހުންނާނެގޮތަކަށް ކަންކަން ހަމަޖެހުމުންކަމަށް ރައީސް ނަޝީދު ވިދާޅުވިއެވެ.
ފޭދޫ އެމްޑީޕީ ޖަގަހައިގައި ބޭއްވުނު މި ބައްދަލުވުމުގައި ރައީސް ނަޝީދު ވަނީ އެ ބައްދަލުވުމަށް އައި މެމްބަރުންގެ ސުވާކުތަކަށް ޖަވާބު ދެއްވާފައެވެ.
