ގައުމީ ފައިނަލުގައި ދީމާ އަދި ރަފާގެ ފޯރިގަދަ މެޗު މާދަމާ!

ގައުމީ 59 ވަނަ ޓޭބަލް ޓެނިސް މުބާރާތުގެ ފައިނަލުގައި ފާތިމަތު ދީމާ އަލީ އަދި އައިމިނަތު ރަފާ ނާޒިމްގެ މެޗު މާދަމާ އޮންނާނެއެވެ.

ރާއްޖޭގައި މިވަގުތު ތިބި އެންމެ މޮޅު ދެ ކުޅުންތެރިން ފައިނަލަށް ދަތުރުކުރީ މި މުބާރާތުގައި ކުޅުނު ހުރިހާ މެޗެއް ކާމިޔާބުކޮށްގެންނެވެ.

އެންމެ ފަހުގެ ގައުމީ ފައިނަލް ދީމާ ކާމިޔާބުކުރީ ރަފާ ބަލިކުރުމަށްފަހުއެވެ. މި ދެކުޅުންތެރިންވަނީ އެންމެ ފަހުން ބޭއްވުނު އިންޑިއަން އޯޝަން އައިލޭންޑް ގޭމްސްގެ ޓީޓީ ސިންގަލްސް ފައިނަލުގައިވެސް ވާދަކޮށްފައެވެ. އެ ފަހަރުގެ ފައިނަލްވެސް ދީމާ ވަނީ ފޯރިގަދަ މެޗަކަށްފަހު ކާމިޔާބުކޮށްފައެވެ. މި މެޗުގެ ފައިނަލް ދީމާ ކާމިޔާބުކުރީ މެޗުގެ ފުރަތަމަ ސެޓު 6-11 އިން ރަފާ ކާމިޔާބު ކޮށްފައިވަނިކޮށް ފަހަތުން އަރައި ޖެހިގެން އައި ހަތަރު ސެޓު ކާމިޔާބުކޮށްގެންނެވެ. ދީމާ ސެޓްތައް ގެންދިޔައީ 7-11، 5-11، 7-11 އަދި 4-11 އިންނެވެ.

މި އަހަރުގެ ގައުމީ މުބާރާތުގައި 12 އަހަރުން ދަށުގެ އުމުރުފުރާގެ އަންހެން އަދި ފިރިހެން، 16 އަހަރުން ދަށުގެ އަންހެން، ފިރިހެން އަދި ފުރަތަމަ ޑިވިޝަނުގެ އަންހެން އަދި ފިރިހެން ކުޅުންތެރިން ކުޅުމަށް ހަމަޖެހިފައިވާއިރު މި މުބާރާތުގައި ވެޓެރެންސް ޑިވިޝަނުގައި ފިރިހެން ކުޅުންތެރިން ކުޅޭނެއެވެ. އަދި މީގެ އިތުރުން ޓީމް އިވެންޓްގައި ވެސް ކުޅުންތެރިން ވާދަކުރާނެއެވެ. މި މުބާރާތުގައި 15 އަންހެން ކުޅުންތެރިން ބައިވެރިވެފައިވާއިރު ފިރިހެން 32 ކުޅުންތެރިން ވަނީ ބައިވެރިވެފައެވެ.