ހުކުރު 25 ސެޕްޓެންބަރ 2020
05 އަތަ
1442 ސަފަރު 07
ފަތިސް 04:42
އިރުއަރާ 05:53
މެންދުރު 12:02
އަސްރު 15:07
އިރުއޮއްސޭ 18:03
އިޝާ 19:14
އިނގިރޭސި ޕްރިމިއާ ލީގު

ނޯވިޗް ބަލިކޮށް ޓޮޓެންހަމުން ގަދަ ހަތަރަކަށް އެރުމުގެ އުންމީދު އާކޮށްފި

  • މި މެޗު ޓޮޓެންހަމުން ކާމިޔާބުކުރީ 2-1 ގެ ނަތީޖާއަކުން

ކ. މާލެ | 23 ޖެނުއަރީ 2020 | ބުރާސްފަތި 17:40 | 2,082

ޓޮޓެންހަމް އަދި ނޯވިޗް ބައްދަލުކުރި މެޗުގެ ތެރެއިން - ގެޓީ އިމޭޖާސް

އިނގިރޭސި ޕްރިމިއަރ ލީގުގެ ތާވަލުގެ ފުލުގައި އޮތް ނޯވިޗް ސިޓީ އަތުން މޮޅުވެ މޮރީނިއޯގެ ޓޮޓެންހަމްއިން ގަދަ ހަތަރަކަށް އެރުމުގެ އުންމީދު އާކޮށްފިއެވެ.

ޓޮޓެންހަމް ދަނޑުގައި ކުޅުނު މި މެޗު އެޓީމުން ކާމިޔާބު ކުރީ 2-1 ގެ ނަތީޖާއަކުންނެވެ. މިއީ 2020 ވަނަ އަހަރު ލީގު މެޗަކުން ޓޮޓެންހަމް މޮޅުވި ފުރަތަމަ މެޗެވެ.

މެޗު ފަށައިގެން ގިނަ ވަގުތު ބޯޅަ ކޮންޓްރޯލްކޮށް ގިނަ އެޓޭކްތައް އުފައްދާފައިވަނީ ޓޮޓެންހަމްއިންނެވެ. އެގޮތުން ޓޮޓެންހަމްއިން ވަނީ ފުލުފުލުގައި ނޯވިޗްގެ ގޯލަށް ޙަމަލާތައް އުފައްދައިފައެވެ. މެޗުގެ 38 ވަނަ މިނެޓުގައި ޓޮޓެންހަމްއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބު ކޮށްދިނީ ޑެލި އެލީ އެވެ. މި ލަނޑަށްފަހު ވެސް ޓޮޓެންހަމް އިން ވަނީ ލަނޑު ޖެހުމަށް ފުރުސަތުތަކެއް ތަނަވަސް ކޮށްފައެވެ. އެގޮތުން ޓޮޓެންހަމްގެ ކޮރެއާ ފޯވަރޑް ސޮން އަށް ވަނީ ލަނޑު ޖެހުމަށް ރަނުގެ ދެ ފުރުސަތު ލިބި ބޭކާރު ކޮށްލައިފައެވެ.

މެޗުގެ ފުރަތަމަ ހާފު ނިމިގެންދިޔައީ 1-0 ގެ ނަތީޖާ އަކުން ޓޮޓެންހަމް ކުރީގައި އޮވެގެންނެވެ.

މެޗުގެ ދެވަނަ ހާފު ފަށައިގެންވެސް ޓޮޓެންހަމްއިން ވަނީ މޮޅު އެޓޭކިންގ ގޭމެއް ކުޅެފައެވެ. ނަމަވެސް މި ހާފުތާގައި ނޯވިޗް އިން ވަނީ އެޓީމުގެ ކުޅުން ރަނގަޅުކޮށް ޓޮޓެންހަމްގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 70 ވަނަ މިނެޓުގައި ޓޮޓެންހަމްއިން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ޓީމޫ ޕުއްކި އެވެ. މިއީ ލިބުނު ޕެނަލްޓީއަކުން އޭނާ ކާމިޔާބު ކުރި ލަނޑެކެވެ. ނަމަވެސް އޭގެ ނުވަ މިނެޓު ފަހުން ޓޮޓެންހަމް އިން ވަނީ އިތުރު ލަނޑެއްޖަހާ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށް ދިނީ އިތުބާރު ފޯވަރޑް ސޮން އެވެ.

މެޗަށް ފަހު ވާހަކަ ދައްކަމުން ޓޮޓެންހަމްގެ ކޯޗު މޮރީނިއޯ ބުނީ އޭނާގެ ޓީމުން ދެއްކި ކުޅުމާއި މެދު ހިތްހަމަ ޖެހޭ ކަމަށާއި މިވަގުތު ޓީމުގައި އަނިޔާގެ މައްސަލަ ބޮޑު ކަމަށެވެ. އަދި މިހާރުގެ ޓާގެޓަކީ ގަދަ ހަތަރަކަށް އެރުން ކަމަށް ވެސް މޮރީނިއޯ ބުންޏެވެ.

ޓޮޓެންހަމް އިން މިވަގުތު އޮތީ ލީގު ތާވަލުގެ ހަވަނައިގައި ކުޅުނު 24 މެޗުން ލިބުނު 34 ޕޮއިންޓާއެކުގައެވެ. ފަސްވަނައިގައި އޮތް މެންޗެސްޓަރ ޔުނައިޓެޑަށް ވެސް 24 މެޗުން ލިބިފައިވަނީ 34 ޕޮއިންޓެވެ. ތާވަލުގެ ހަތަރު ވަނައިގައި ޗެލްސީން އޮތީ ކުޅުނު 24 މެޗުން ލިބުނު 40 ޕޮއިންޓާއެކުގައެވެ.

އެންމެ ފަހުން އަޕްޑޭޓް ކުރީ: 6 މަސް ކުރިން | ރިވިއު ކުރީ: ޒިހްނަތު ހަސަން

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.