ބާންލީ އަތުން ބަލިވެ ގަދަ ހަތަރަކަށް އެރުމަށް ޔުނައިޓެޑަށް ހުރަސްތަކެއް!

އިނގިރޭސި ޕްރިމިއަރ ލީގުގައި ބާންލީއިން ފުރަތަމަ ފަހަރަށް މެންޗެސްޓަރ ޔުނައިޓެޑް ދަނޑުގައި އެޓީމު ބަލިކޮށްފިއެވެ.

މެންޗެސްޓަރ ޔުނައިޓެޑް ދަނޑުގައި ކުޅުނު މި މެޗު ބާންލީއިން ކާމިޔާބު ކުރީ 2-0 ގެ ނަތީޖާއަކުންނެވެ.

މެޗު ފަށައިގެން ގިނަ ވަގުތު ބޯޅަ ކޮންޓްރޯލްކޮށް މޮޅަށް ކުޅެމުންއައީ ޔުނައިޓެޑުންނެވެ. އެގޮތުން އެޓީމު ވަނީ ފުލުފުލުގައި ބާންލީގެ ގޯލަށް ނުރައްކާ ކޮށްފައެވެ. މެޗުގެ 11 ވަނަ މިނެޓުގައި ޔުނައިޓެޑްގެ އެންދަރޭސް ޕެރޭރާ އަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. ނަމަވެސް އޭނާ އޭރިޔާ ތެރޭން ފޮނުވާލި ބޯޅަ ގޯލުގެ އަރިމަތީ ދަނޑިކައިރިން ދިޔައީ ބޭރަށެވެ. އޭގެ ފަހުން މެޗުގެ 23 ވަނަ މިނެޓުގައި ޔުނައިޓެޑުގެ ފްރެޑް ވަނީ ނުރައްކާތެރި ހަމަލާއެއް ބާންލީގެ ގޯލަށް ފޮނުވާލާފައެވެ. ނަމަވެސް ބާންލީގެ ކީޕަރު ވަނީ ހުޝިޔާރު ކަމާއއެކު މި ހަމަލާ ދިފާއު ކޮށްފައެވެ. މެޗުގެ 39 ވަނަ މިނެޓުގައި ބާންލީން ލަނޑު ޖަހާ ލީޑު ވަނީ ނަގާފައެވެ. މި ލަނޑު އެޓީމަށް ކާމިޔާބުކޮށް ދިނީ ކްރިސް ވޫޑް އެވެ.

މެޗުގެ ފުރަތަމަ ހާފު ނިމިގެންދިޔައީ 1-0 ގެ ނަތީޖާއަކުން ބާންލީ ކުރީގައި އޮވެގެންނެވެ.

ފުރަތަމަ ހާފެކޭ އެއްގޮތަށް ދެވަނަ ހާފުގައި ވެސް ޔުނައިޓެޑުން މޮޅު އެޓޭކިންގ ގޭމެއް ކުޅުނުއިރު ބާންލީއިން ކުޅުނީ ޑިފެންސަށް ވިސްނައި ޑިފެންސިވް ގޭމެކެވެ. މި ހާފުގައި ޔުނައިޓެޑުގެ މާޝިއަލް އަށް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ. މެޗުގައި ބާންލީން ކާމިޔާބުކުރި ދެވަނަ ލަނޑު އެޓީމަށް މެޗުގެ 56 ވަނަ މިނެޓުގައި ކާމިޔާބުކޮށް ދިނީ ޖޭ ރޮޑްރިގޭޒް އެވެ.

މި ނަތީޖާއާއެކު ޔުނައިޓެޑުން ލީގު ތާވަލުގެ ފަސް ވަނައިގައި އޮތީ ކުޅުނު 24 މެޗުން ލިބުނު 34 ޕޮއިންޓާއެކު އެވެ. އަދި މެޗުން މޮޅުވި ބާންލީ އޮތީ ކުޅުނު 24 މެޗުން ލިބުނު 30 ޕޮއިންޓާއެކުގައިއެވެ. ލީގު ތާވަލުގެ އެއްވަނައިގައި އޮތް ލިވަރޕޫލަށް 22 މެޗުން ލިބިފައިވަނީ 64 ޕޮއިންޓެވެ.