ކޯލިޝަން ހަދަން ޖެހި ސަލާން ހަނދުމަފުޅުނެތުނީތޯ ވިދާޅުވެ، ގާސިމްގެ ހުއްޓުމެއް ނެތް ސުވާލުތަކެއް ނަޝީދަށް

މި ސަރުކާރު ކޯލިޝަން ހަނދަންވެގެން އެމްޑީޕީން ޖެހި ސަލާމާއި ކުރީ އާދޭސްތައް ހަނދާން ނެތުނީ ކަމަށް ވިދާޅުވެ ސަރުކާރު ކޯލިޝަންގެ ޖުމްހޫރީ ޕާޓީގެ ލީޑަރު ގާސިމް އިބްރާހިމް އެމްޑީޕީގެ ރައީސް މުހައްމަދު ނަޝީދަށް ސުވާލުތަކެއް ކުރިމަތި ކުރައްވައިފިއެވެ.

ދާދި ފަހުން އެމްޑީޕީން ތިލަދުން މައްޗަށް ކުރި ދަތުރުގައި ވާހަކަ ދައްކަވަމުން ރައީސް ނަޝީދު ވިދާޅުވެފައިވަނީ، އެމްޑީޕީގެ މެމްބަރުންނަށް ހައްގު މިންވަރު ނުލިބިގެން އުޅެނީ ކޯލިޝަނާއި ހެދިގެން ކަމަށެވެ. އެކަމަކު ކޯލިޝަން ރޫލާޅުމުގެ ވިސްނުމެއް ގެންގުޅުއްވާ ކަމަށް ނަޝީދު ވިދާޅެއް ނުވެއެވެ.

ރައީސް އިބްރާހިމް މުހައްމަދު ސޯލިހް ވެރިކަމަށް ވަޑައިގެންނެވީ ކޯލިޝަން ސަރުކާރަކުންނެވެ. ކޯލިޝަންގެ ތެރޭގައި ހިމެނެނީ، އެމްޑީޕީ،ޖޭޕީ، އަދާލަތުގެ އިތުރުން ރައީސް މައުމޫންގެ އެމްއާރްއެމްއެވެ.

ޖުމްހޫރީ ޕާޓީއަށް އަލަށް ގުޅުނު މެމްބަރުން ސޮއިކުރުމަށް އަންގާރަ ދުވަހު މ. ކުނޫޒް ގައި ބޭއްވި ރަސްމިއްޔާތެއްގައި ވާހަކަ ދައްކަވަމުން ޕާޓީގެ ލީޑަރު ގާސިމް ވަނީ، ނަޝީދު ދެއްކެވި ވާހަކަތަކާއި ގުޅިގެން ފުލުފުލުގައި ސުވާލުތަކެއް ކުރައްވާފައެވެ.

އެގޮތުން ކޯލިޝަން ލިބުނު ގޮތް، ރައީސް ނަޝީދު ހަނދުމަފުޅު ނެތުނީތޯ ކަމަށް ސުވާލު އުފައްދެއްވިއެވެ. އަދި ނަޝީދުގެ މަގާމަކީ، ދިވެހި ރައްޔިތުންގެ ހައްގުތައް ''އޮއްވަޅު ގޮނޑިއެއްހެން'' ބަހާލަން ދެއްވާފައިހުރި މަގާމެއް ކަމަށް ހީފުޅުކުރައްވަނީ ކަމަށް ހީކޮށް ސުވާލު އުފައްދަމުން، ވިޔަފާރިވެރިޔާ ގާސިމް ވަނީ މަޖިލީހުގެ ރައީސްކަމުގައި ނަޝީދު ހުންނަވައިގެން ރައްޔިތުންގެ ހައްގުތަކަށް އަރައިގަންނައިރު އިންސާފު ކޮބައިތޯ ކަމަށް ވިދާޅުވެ އިތުރު ސުވާލުތަކެއް އުފައްދަވާފައެވެ.

މަޖިލީހުގެ މާމިގިލި ދާއިރާގެ މެމްބަރު ގާސިމް ވިދާޅުވީ، އޭނާ ކުރައްވާ މަސައްކަތުގެ ބޭނުމަކީ އޭނާ ފަދައިން ރާއްޖޭގެ ކޮންމެ ރައްޔިތަކީވެސް، އެމީހެއްގެ އަމިއްލަ ފުއްދުންތެރިކަމުން އުޅެވޭނެ ތަނަވަސް ބަޔަކަށްވުން ކަމަށެވެ. އެމްޑީޕީ އަށް ފާޑުކިޔަމުން ގާސިމް ވިދާޅުވީ، އެ ޕާޓީން ޑިމޮކްރަސީ އަށް ވާހަކަ ދައްކަން ވީމާ އެ ވާހަކަތައް ދެއްކޭ ކަމަށާއި، އެހެން ބަޔަކަށް ވާހަކަދައްކަން ފުރުސަތު ނުލިބޭ ކަމަށެވެ.

ގާސީމް ރައީސް ނަޝީދު އަށް ރައްދު ދެއްވާފައިވާއިރު، މަޖިލީސް އިންތިހާބާ ހިސާބުން ދެ ބޭފުޅުންގެ ދެމެދުގައި ދަނީ ބަހުގެ ހޫނު ހަމަލާތައް ރައްދުކުރައްމުންނެވެ. އެގޮތުން ގާސިމް އެމްޑީޕީގެ ސިޔާސަތުތަކަށް ފާޑު ވިދާޅުވަމުން ގެންދަވާއިރު ނަޝީދު ގެންދަވަނީ ގާސިމް އަށް އެކި ގޮތްގޮތުން ފާޑު ވިދާޅުވަމުންނެވެ. އެކަމަކު ކޯލިޝަން ރޫޅާލުމުގެ ވިސްނުމެއް ނުގެންގުޅުއްވާ ކަމަށް ރައީސް ސޯލިހު ގެންދަވަނީ ތަކުރާރުކޮށް ވިދާޅުވަމުންނެވެ.