ޕާރމާ އަތުން މޮޅުވެ ޔުވެންޓަރސްއަށް ތާވަލުގެ އެއްވަނައިގައި ހަތަރު ޕޮއިންޓްގެ ލީޑެއް!

އިޓާލިއަން ލީގުގައި ޔުވެންޓަރސް އަދި ޕާރމާ ބައްދަލުކުރި މެޗު ޔުވެންޓަރސް ކާމިޔާބުކޮށް ލީގު ތާވަލުގެ އެއްވަނައިގައި ހަތަރު ޕޮއިންޓުގެ ލީޑެއް ނަގައިފިއެވެ.

ޔުވެންޓަރސް ދަނޑުގަ ކުޅުނު މި މެޗު އެޓީމުން ކާމިޔާބު ކުރީ 2-1 ގެ ނަތީޖާއަކުންނެވެ.

މެޗު ފަށައިގެން ޔުވެންޓަރސްގެ ފަރާތުން މޮޅު އެޓޭކިންގ ގޭމެއް ފެނިގެންދިޔައިރު މެޗުގެ ފުރަތަމަ ހާފުގައި ޔުވެންޓަރސްއަށް ވަނީ ލަނޑު ޖެހުމަށް ގިނަ ފުރުޞަތުތަކެއް ލިބި ބޭކާރުވެފައެވެ. އެގޮތުން މެޗުގެ 24 ވަނަ މިނެޓުގައި ކްރިސްޓިއާނޯ ރޮނާލްޑޯ އަށް ވަނީ ލަނޑު ޖެހުމަށް ފުރުޞަތެއް ލިބި ބޭކާރުވެފައެވެ. އޭނާ އޭރިޔާ ތެރެއިން ފޮނުވާލި ހަމަލާ ޕާރމާގެ ކީޕަރު ވަނީ ހުޝިޔާރުކަމާއެކު ދިފާއު ކޮށްފައެވެ.

މީގެ އިތުރުން މެޗުގެ 40 ވަނަ މިނެޓުގައި ޔުވެންޓަރސްގެ ޑިބޭލާ ވަނީ ޕާރމާގެ ގޯލަށް ނުރައްކާތެރި ހަމަލާއެއް ފޮނުވާލާފައެވެ. މި ހަމަލާގެ ހުރަހަކަށްވެސް ވެގެންދިޔައީ ޕާރމާގެ ކީޕަރެވެ. މެޗުގެ 43 ވަނަ މިނެޓުގައި ޔުވެންޓަރސްއިން ވަނީ ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ކްރިސްޓިއާނޯ ރޮނާލްޑޯއެވެ. އޭނާ މި ލަނޑު ކާމިޔާބު ކުރީ ޕާރމާގެ ދެ ކުޅުންތެރިން ކައިރިން ނައްޓާލުމަށްފަހުއެވެ. މެޗުގެ ފުރަތަމަ ހާފު ނިމިގެންދިޔައީ 1-0 ގެ ނަތީޖާއަކުން ޔުވެންޓަރސް ކުރީގައި އޮވެގެންނެވެ.

ދެވަނަ ހާފު ފަށައިގެން ދެޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މިހާފުގައި ޕާރމާއިން އެޓީމުގެ އެޓޭކްތައް ވަނީ ވަރުގަދަ ކޮށްފައެވެ. އެގޮތުން މެޗުގެ 55 ވަނަ މިނެޓުގައި ޕާރމާގެ އެންދަރޭސް ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. ނަމަވެސް އޭގެ ތިން މިނެޓު ފަހުން ޔުވެންޓަރސްއިން ވަނީ ލަނޑު ޖަހާ ލީޑު ދެވަނަ ފަހަރަށް ނަގާފައެވެ. މި ލަނޑު ވެސް އެޓީމަށް ކާމިޔާބު ކޮށްދިނީ ރޮނާލްޑޯއެވެ. މިއީ މިއަހަރު ރޮނާލްޑޯ ކާމިޔާބުކުރި ހަވަނަ ލަނޑުވެސްމެއެވެ.

މި ނަތީޖާއާއި އެކު ޔުވެންޓަރސް ލީގު ތާވަލުގެ އެއްވަނައިގައި އޮތީ ކުޅުނު 20 މެޗުން ލިބުނު 51 ޕޮއިންޓާއެކުގައެވެ. ދެވަނައިގައި އޮތް އިންޓަރ މިލާނަށް 20 މެޗުން 47 ޕޮއިންޓް ލިބިފައިވާއިރު، ތިން ވަނައިގައި އޮތް ލާޒިއޯ އަށް 19 މެޗުން ލިބިފައިވަނީ 45 ޕޮއިންޓެވެ.