ޔޫކްރެއިންގެ ފްލައިޓް ވެއްޓުނު ޙާދިސާގަ މަރުވި މީހުންގެ ޖަނާޒާ ބާއްވައިފި

ޔޫކްރެއިންގެ ފްލައިޓް ވެއްޓުނު ޙާދިސާގައި މަރުވި މީހުންގެ ޖަނާޒާ ބާއްވައިފިއެވެ.

އަލްޖަޒީރާގައި ރިޕޯޓުކޮށްފައިވާ ގޮތުގައި އީރާނުގެ ވެރިރަށް ތެހެރާނަށް ޔޫކްރެއިންގެ ފްލައިޓް ވެއްޓުނު ޙާދިސާގައި މަރުވި 176 މީހުންގެ ޖަނާޒާ ބުދަ ދުވަހުވަނީ ބާއްވާފައެވެ. އަދި މިޙާދިސާގައި މަރުވި ބައެއް މީހުން ތެހަރާންގެ ސަހަރާގައި ވަޅުލާފައިވާއިރު، އަނެއްބައި މީހުންގެ ހަށިގަނޑު އެބަޔަކު ނިޞްބަތްވާ ޤައުމަކަށް ފޮނުވަން ނިންމާފައިވާ ކަމަށް އީރާނުގެ މީޑިއާއިން ރިޕޯޓުކޮށްފައިވެއެވެ.

އިރާނުން ފޮނުވާލި މިސައިލެއް އަރާ ތެހެރާނަށް ވެއްޓުނު މި ފްލައިޓުން ގިނަ ބަޔަކު މަރުވުމާއި ގުޅިގެން އީރާނުގެ ރައްޔިތުން ވަނީ ސަރުކާރާ ދެކޮޅަށް ނުރުހުންފާޅުކޮށް މުޒާހަރާކޮށްފައެވެ. މުޒާހަރާ ކޮންޓްރޯލް ކުރުމަށް ފުލުހުން ކުރި މަސައްކަތުން ޢާންމުންނާ ވަނީ ކުރިމަތިލުންތަކެއް ވެސް ހިނގާފައެވެ.

އިރާންގެ އަސްކަރިއްޔާއިން ބުނެފައިވަނީ އޮޅުމަކުން ޙަމަލާ ދެވުނީ އެމެރިކާއާއެކު އުފެދިފައިވާ ނުތަނަވަސްކަމުގެ ސަބަބުން އަސްކަރިއްޔާވެސް ކުއްލި ޙާލަތުގައި އޮތުމުން ކަމަށެވެ.

ޔޫކްރެއިންގެ ފްލައިޓް އަސްކަރީ ޞަރަޙައްދެއްގެ މަތިން ދަތުރުކޮށްފައިވާ ކަމަށްވެސް އިރާންގެ އަސްކަރިއްޔާގެ ޖެނެރަލް ސްޓާފް މަޢުލޫމާތު ދެއްވި ކަމަށް ބައެއް މީޑިއާތަކުން ރިޕޯޓްކޮށްފައިވެއެވެ.

ކުރިޔަށް އޮތް ތަނުގައި މިކަހަލަ ޙާދިސާއެއް ހިނގުމުގެ ފުރުޞަތު ކުޑަކުރުމުގެ ގޮތުން އެ ޤައުމުގެ އަސްކަރިއްޔާއިން ބޭނުން ކުރަމުން އަންނަ ނިޒާމުތައް އިތުރަށް ވަރުގަދަ ކުރަން މަސައްކަތް ކުރާނެ ކަމަށްވެސް އަސްކަރިއްޔާއިން ވަނީ ބުނެފައެވެ.

އިރާނުގެ އަސްކަރިއްޔާގެ މި ޢަމަލާ ގުޅިގެން، ރައީސް ޙަސަން ރޫޙާނީ ވަނީ މަޢަފަށް ވެސް އެދިވަޑައިގެންފައެވެ. އަދި މި ޙާދިސާއާ ގުޅިގެން ކުރަން ޖެހޭ އިތުރު ތަޙުޤީޤިތައް ކުރިޔަށްދާ ކަމުގެ ޔަޤީންކަން ވެސް ރޫޙާނީ ވަނީ އަރުވާފައެވެ. މިއީ "މަޢާފުނުކުރެވޭނެ" ވަރުގެ ކުށެއް ކަމަށްވެސް ރޫޙާނީ ވިދާޅުވެފައިވެއެވެ.

މިސައިލް އެރުމާއި ގުޅިގެން ވެއްޓުނު ފްލައިޓް ދަތުރުކުރަމުން ދިޔައީ އިރާނުގެ ވެރިރަށް ތެހެރާނުން، ޔޫކްރެއިންގެ ވެރިރަށް ކީވްއަށް ދަތުރުކުރުމަށެވެ. ފަޅުވެރިންނާއި، ފަސިންޖަރުން ހިމެނޭގޮތަށް 176 މީހަކާއެކު ދަތުރުކުރަމުން ދިޔަ ފްލައިޓްގައި ތިބި އެންމެން ވަނީ މި ހާދިސާގައި މަރުވެފައެވެ. މަރުވި މީހުންގެ ތެރޭގައި އިރާނުގެ 87 މީހަކާއި، ކެނެޑާގެ 57 މީހަކާއި ޔޫކްރެއިންގެ 11 މީހަކު ހިމެނެއެވެ.