ކުޅުދުއްފުށީގައި ނުނިމި ހުރި ފުލެޓްތައް ނިންމާ ވަރަށް އަވަހަށް ހަވާލުކުރާނަން
ކުޅުދުއްފުށީ ޖަލްސާގައި ރައީސް ވާހަކަފުޅުދައްކަވަނީ
ސަރުކާރުން ކުޅުދުއްފުށީގައި ތަރައްޤީ ކުރާ ޓަރޝަރީ ހޮސްޕިޓަލަށް އާ ޢިމާރާތެއް އަޅުއްވައިދެއްވާނެ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު އިޢުލާން ކުރައްވައިފިއެވެ.
ރައީސުލްޖުމްހޫރިއްޔާ މިކަން އިޢުލާން ކުރެއްވީ "އެޖެންޑާ 19 ރަށަށް: ކުޅުދުއްފުށި ސިޓީ" ގައި ބާއްވާ ޖަލްސާގައި ވާހަކަ ދައްކަވަމުންނެވެ. ރައީސް ވިދާޅުވީ އެމްޑީޕީގެ ވެރިކަމުގެ ކުޅުދުއްފުށީ ސިޓީ އަށް ގެންނަން ޖެހޭ ބައިވަރު ކަންކަން އެބަހުރި ކަމަށެވެ. އަދި ތިލަދުންމަތީގެ ތަރައްޤީއަށް ވެސް ކުރަންޖެހޭ ބައިވަރު ކަންކަން އެބަހުރި ކަމަށެވެ.
ރައީސް ވިދާޅުވީ ތިލަދުންމަތީގެ ތަރައްޤީއަށްޓަކައި ކުރާ މަސައްކަތުގައި މި ޞަރަޙައްދުގައި އިޤުތިޞާދީ މަރުކަޒެއްގެ ގޮތުގައި ތަރައްޤީކުރުމަށް ނިންމާފައި އޮތީ ކުޅުދުއްފުށީގައި ކަމަށާއި، އެ ޕްލޭނާ އެއްގޮތަށް މަސައްކަތް ކުރައްވަމުން ގެންދަވާ ކަމަށެވެ. އެގޮތުން އެ ޞަރަޙައްދުގައި ޞަރަޙައްދީ ބަނދަރެއް ހެދިގެން ދާއިރު އެ ޞަރަޙައްދުގެ ޓަރޝަރީ ހޮސްޕިޓަލް އެންމެ ޒަމާނީ ފެންވަރަށް ޚިދުމަތްތައް ލިބޭ ގޮތަށް ތަރައްޤީ ކުރައްވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ކުޅުދުއްފުށީގައި ބޯހިޔާވަހިކަމުގައި އެތައް މައްސަލަތައް އެބަހުރި ކަމަށެވެ. އަދި މީގެ ކުރިން ހަދަން ފަށާ ނުނިމި ހުރި ހައުސިން ޔުނިޓުތަކާއި އަދި ހަދަން ބުނެ ނުހަދާ ހުރި ހައުސިން ޔުނިޓްތައް އެބަހުރި ކަމަށާއި، ރަށުގެ މަގުތައް ޒަމާނީ ފެންވަރަށް ތަރައްޤީކުރަންޖެހޭ ކަމަށެވެ. އަދި މިއަހަރުގެ ބަޖެޓުގައި މަގުތައް ހެދުމަށް ނިންމާ ބަޖެޓު ކުރެވިފައިވާނެކަން ހާމަކުރައްވަމުން ރައީސް ވިދާޅުވީ ހައުސިން ޔުނިޓުތައް ނިންމާ ވީހާވެސް އަވަހަކަށް ރައްޔިތުންނާ ޙަވާލުކުރުމަށް ލަހެއް ނުވެ ފެށިގެންދާނެ ކަމަށެވެ.
