ކައުންސިލް އިންތިހާބަށް ހޭލުންތެރިކުރުވުމަށް މި ފަހަރު 300 ސުވާލާއި ޖަވާބު ހިމެނޭ ލީފްލެޓެއް ބަހާނެ

އަންނަ އޭޕްރިލް މަހުގެ 4 ވަނަ ދުވަހު އޮންނަ ލޯކަލް ކައުންސިލް އިންތިހާބަށް އާއްމުން ހޭލުންތެރިކުރުވުމަށް އާމުންގެ ހިތްތަކުގައި އުފެދިދާނެ 300 އެއްހާ ސުވާލާއި ޖަވާބު ހިމެނޭ ލީފްލެޓެއް ތައްޔާރުކޮށް، ބެހުމަށް ރާވާފައިވާ ކަމަށް އިލެކްޝަން ކޮމިޝަންގެ ރައީސް އަހުމަދު ޝަރީފް ވިދާޅުވެއްޖެއެވެ.

ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބު 2020ގެ ގައުމީ ލަފާދެ ކޮމިޓީ ބައްދަލުވުމުގައި ރާއްޖޭގެ ހުރިހާ ރަށެއްގައި ހޭލުންތެރިކުރުވުމުގެ ޕްރޮގްރާމްތަކެއް ހިންގުމާއި ގުޅިގެން ވާހަކަދައްކަވަމުން ޝަރީފް ވިދާޅުވީ އިންތިހާބާއި ގުޅިގެން 300 އެއްހާ ސުވާލާއި ޖަވާބު ހިމެނޭ ގޮތަށް ލީފްލެޓެއް ތައްޔާރު ކުރުމަށްފަހު ކޮންމެ ރަށެއްގައި ހުންނަ ފޯކަލް ޕޮއިންޓު މެދުވެރިކޮށް ގޭގެއަށް ބަހާނެ ކަމަށެވެ. އަދި އެ ލީފްލެޓުތައް ސަރުކާރުގެ ވުޒާރާތަކަށާއި އެ އޮފީސްތަކުން ޚިދުމަތް ހޯދަން އަންނަ ފަރާތްތަކަށްވެސް ބެހުމަށް ފެންނަކަމަށެވެ. ޝަރީފް ވިދާޅުވީ މި ލީފްލެޓުތައް ތައްޔާރު ކުރާއިރު މައުލޫމާތުގެ ފުށުއެރުންތަކަށް ސަމާލުކަންދޭނެ ކަމަށެވެ.

މީގެއިތުރުން ޝަރީފް ވިދާޅުވީ މާލޭގައި އެކި ފަރާތްތަކަށް ހޭލުންތެރިކުރުމުގެ ޕްރޮގްރާމްތަކެއް ހިންގުމަށްވެސް ހަމަޖެހިފައިވާ ކަމަށެވެ. އެގޮތުން ސިޔާސީ ޕާޓީތަކަށާއި މީޑިއާގެ އިތުރުން މިނިވަން މުއައްސަސާތަކުގެ އިސްވެރިންނާއި ސަރުކާރުގެ ކުންފުނިތަކުގެ އިސްވެރިންނަށް ވެސް ހޭލުންތެރިކުރުވުމުގެ ޕްރޮގްރާމް ހިންގުމަށް ރާވާފައިވާ ކަމަށް ޝަރީފް ވިިދާޅުވިއެވެ.

ޝަރީފް ވިދާޅުވީ އިލެކްޝަން ކޮމިޝަންގެ ހުރިހާ މުވައްޒަފުންގެ އިތުރުން އެ ޕްރޮގްރާމްތަކަށް މާލެ އާދެވޭ ކެންޑިޑޭޓުންނަށް ވެސް ހޭލުންތެރިކުރުވުމުގެ ޕްރޮގްރާމްތައް ހިންގޭނެ ކަމަށެވެ. އަދި ހިލޭ ސާބަހަށް މަސައްކަތްކުރާ ޖަމިއްޔާތަކަށްވެސް ހޭލުންތެރިކުރުވުމަށް ހަމަޖެހިފައިވާ ކަމަށް ވިދާޅުވިއެވެ.