އެތުލެޓިކޯ މެޑްރިޑް ބަލިކޮށް، ސުޕަރ ކަޕްގެ ޗެމްޕިއަންކަން ރެއާލަށް

ވާދަވެރި އެތުލެޓިކޯ މެޑްރިޑް އަތުން ޕެނަލްޓީގައި މޮޅު،ވެ ސްޕެނިޝް ސުޕަރ ކަޕްގެ ޗެމްޕިއަންކަން ރެއާލުން ހޯދައިފިއެވެ.

ސައުދި އަރަބިއްޔާގެ ކިންގް އަބްދުﷲ ސްޕޯޓްސް ސިޓީ ސްޓޭޑިއަމްގައި ކުޅުނު މި މެޗު ރެއާލުން ކާމިޔާބުކުރީ ޕެނަލްޓީގައި 4-1 ގެ ނަތީޖާއަކުން އެތުލެޓިކޯ މެޑްރިޑް ބަލިކުރުމަށްފަހުގައެވެ. މެޗުގެ ފުރިހަމަ ވަގުތު ނިމުނީ 0-0 ގެ ނަތީޖާއަކުން ދެ ޓީމު އެއްވަރު ވެގެންނެވެ.

މި މެޗުގައި ރެއާލް މެޑްރިޑްގެ ކީޕަރު ތިބައޫ ކޯޓުއާ އާއި އެތުލެޓިކޯގެ ކީޕަރު ޔެން އޮބްމަޒް ވަނީ މުހިންމު ސޭވްތަކެއްކޮށްފައެވެ. މެޗުގެއި ލަނޑު ޖަހަން އެންމެ ރަނގަޅު ފުރުޞަތެއް ލިބިގެންދިޔައީ އިތުރު ވަގުތު ތެރޭގައި އަލްވާރޯ މޮރާޓާއަށެވެ. ނަމަވެސް މޮރާޓާ އެކަނިމާއެކަނި ބޯޅަ ހިފައިގެން އޭރިޔާ ތެރެއަށް ވަންނަނިކޮށް ފަހުތުން ރެއާލް މެޑްރިޑްގެ ފެޑެރިކޯ ވަލްވާޑޭ ޓެކެލް ޖަހައި މޮރާޓާ ވައްޓާލިއެވެ. މިއާއިއެކު ވަލްވާޑޭ އަށް ވަނީ ރަތް ކާޑު ދައްކާފައެވެ.

ޕެނަލްޓީ ޝޫޓްއައުޓްގައި އެތުލެޓިކޯގެ ފުރަތަމަ ޕެނަލްޓީ ސައުލް ނިގުއޭޒް އަތުން ނާކާމިޔާބުވީއިރު ތޯމަސްގެ ޕެނަލްޓީ ރެއާލުގެ ކީޕަރު ކޯޓުއާ ވަނީ ހުޝިޔާރުކަމާއެކު މަތަކޮށްފައެވެ. އެތްލެޓިކޯއިން ކާމިޔާބުކުރި ހަމައެކަނި ޕެނަލްޓީ ކާމިޔާބުކޮށްދިނީ ޑިފެންޑަރ ޖޯން ޓްރިފިއާއެވެ. ރެއާލް މެޑްރިޑްގެ ހުރިހާ ޕެނަލްޓީއެއް އެޓީމުން ކާމިޔާބުކުރިއެވެ.

މެޗަށްފަހު ވާހަކަ ދައްކަމުން ރެއާލްގެ ކޯޗު ޒިނެދިން ޒިދާން ބުނީ ކުޅުންތެރިއެއްގެ ގޮތުގައި އޭނާ ވަރަށް ގިނަ ކާމިޔާބުތައް ހޯދިން ކަމަށާއި މިހާރު ކޯޗެއްގެ ގޮތުގައި އެ ކާމިޔާބީތައް ހޯދާކަމަށެވެ. މި ކާމިޔާބީގައި ކުޅުންތެރިންނަށް މަރުޙަބާ ކިޔާ ކަމަށާއި ކުޅުންތެރިން އެވަރަށް މަސައްކަތް ކުރާނަމަ ކޮންމެ ކަމައް ވެސް ވާނެ ކަމަށް ޒިދާން ބުންޏެވެ.

ރެއާލްގެ ކޯޗު ކޯޗެއްގެ ގޮތުގައި ނިކުތް ހުރިހާ ފައިނަލެއް ވެސް ވަނީ ކާމިޔާބުކޮށްފައެވެ. އެގޮތުން ޔޫއެފާ ޗެމްޕިއަންސް ލީގު ތިން ފަހަރު، ފީފާ ވޯލްޑްކަޕް ދެ ފަހަރު ޔޫއެފާ ސުޕަރ ކަޕް ދެ ފަހަރު އޭނާ ވަނީ ކާމިޔާބުކޮށްފައެވެ.