އިސްކަންދަރު ސްކޫލްގެ ހެނދުނު ދަންފަޅިއަށް ގްރޭޑް 1 ގެ ކުލާހެއް އުފެއްދުމުން، އެކަމުގެ އިނގިލި ގާސިމަށް!
އިސްކަންދަރުގައި ވަނީ ގްރޭޑް 1 އެއް ކްލާސް އިތުރަށް އުފައްދާފަ
ސަރުކާރު ކޯލިޝަންގެ ޖުމްހޫރީ ޕާޓީގެ ލީޑަރު ގާސިމް އިބްރާހީމް
މާލޭގެ ގިނަ ބަޔަކު އެ ސްކޫލަކުން ޖާގަ ބޭނުންވާ އިސްކަންދަރު ސްކޫލްގެ ގްރޭޑް އެކަކަށް އިތުރު ކްލާހެއް އުފެއްދުމުން އެކަމުގެ ނުރުހުން ގިނަ ބަޔަކު ފާޅުކޮށް، ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު އަދި މަޝްހޫރު ވިޔަފާރިވެރިޔާ ޤާސިމް އިބްރާހީމްގެ އަށް އިނގިލި ދިއްކުރަން ފަށައިފި އެވެ.
އިސްކަންދަރު ސްކޫލްގެ ބައެއް ބެލެނިވެރިން "ރާއްޖެއެމްވީ" މަޢުލޫމާތު ދެމުން ބުނީ، އިސްކަންދަރު ސްކޫލްގައި ފެށުނީއްސުރެން ގްރޭޑް އެކަކަށް ކިޔަވާދެމުން ދިޔައީ މެންދުރުފަހު ސެޝަންގައި ކަމަށެވެ. ނަމަވެސް މިއަހަރުގެ ކިޔެވުން ފެށުނުއިރު، ގްރޭޑް އެކެއްގެ އިތުރު ކްލާހެއް އުފައްދައި، އެ ކްލާހުގެ ކިޔެވުން ހެނދުނު ސެޝަނަށް ހަމަޖައްސާފައިވާ ކަމަށެވެ.
މަޢުލޫމާތު ދިން ބައެއް ފަރާތްތަކުން ބުނީ، އިސްކަންދަރު ސްކޫލްގައި ގްރޭޑް އެކެއްގެ އިތުރު ކްލާހެއް އުފެއްދީ، ޤާސިމާއި، ސަރުކާރުގެ އިސް ބައެއް ފަރާތްތަކުގެ ނުފޫޒުން އެބޭފުޅުންގެ ދަރިން އެ ސްކޫލަށް ވެއްދުމަށެވެ.
މިކަމާ ގުޅޭގޮތުން، އެޑިއުކޭޝަން މިނިސްޓްރީގެ އިސްވެރިއެއް "ރާއްޖެއެމްވީ"އަށް ވަނީ އިސްކަންދަރު ސްކޫލްގައި ގްރޭޑް އެކެއްގެ އިތުރު ކްލާހެއް އުފައްދާފައިވާކަން ކަށަވަރު ކޮށްދެއްވާފަ އެވެ. އަދި އެ ކްލާހުގެ ކިޔެވުން ހެނދުނު ދަންފަޅީގައި ކުރިއަށްދާ ގޮތަށް ނިންމާފައިވާ ކަމަށެވެ.
އޮފިޝަލް ވިދާޅުވީ، އެ ކްލާސް އުފެއްދީ ހެނދުނު ދަންފަޅީގައި އެއް ކްލާސް ހުސްކޮށް ހުރުމުން، އެ ކްލާސް ރޫމް ބޭނުން ކުރުމުގެ ގޮތުން، އިސްކަންދަރު ސްކޫލްގެ ގްރޭޑް އެކަކަށް ވަންނަން އެދިފައިވާ ފަރާތްތަކުގެ ތަރުތީބުން، އޮންނަ އުޞޫލުގެ ތެރެއިން، އިސްކަންދަރު ސްކޫލުން އެކަމަށް އެދުމުން ކަމަށެވެ.
އޮފިޝަލް ވިދާޅުވީ އެކަމުގައި، މަޤަމުގެ ނުފޫޒެއް، ނުވަތަ އެފަދަ އެއްވެސް ނުފޫޒެއް ނެތި، ސްކޫލްގައި އިތުރު ކްލާހެއް އުފެއްދުމުގެ ޖާގަ އޮތުމުން އެ އޮންނަ އުޞޫލުގެ ދަށުން އުފެއްދި ކްލާހެއް ކަމަށެވެ.
އެ ކްލާހުގައި ޤާސިމްގެ ދަރިފުޅެއް ހިމެނޭތޯ ސުވާލު ކުރުމުން، އޮފިޝަލް ވިދާޅުވީ، އިސްކަންދަރު ސްކޫލްގައި ޤާސިމްގެ އިތުރު ތިނެއް ނުވަތަ ހަތަރު ބޭފުޅުން ތިއްބަވާކަން އެނގޭ ކަމަށާއި އެގޮތުން، ގްރޭޑް އެކަކުން ޖާގަ ބޭނުންވާ ޤާސިމުގެ ދަރިފުޅެއް ހުރިނަމަ، އޮންނަ އުޞޫލުގެ ދަށުން އެކަން ހަމަޖެހިގެން ދިއުމަކީ މައްސަލައެއް ނޫން ކަމަށެވެ.
އިސްކަންދަރު ސްކޫލްގައި ވެސް އެހެން ސްކޫލްތަކެކޭ އެއްފަދައިން މަތީ ގްރޭޑްތަކަށް ކިޔަވައިދެމުން ގެންދަނީ ހެނދުނު ދަންފަޅީގަ އެވެ. ދަށް ގްރޭޑް ތަކުގެ ކްލާސްތައް ގެންދަނީ މެންދުރުފަހު އެވެ.
