އަހަރު ނިމިނުއިރު، ނުނިމި ތިން އަހަރުވެފައިވާ 255 މައްސަލަ އެއް
10 ޖެނުއަރީ 2020 | ހުކުރު 07:20ހުސްވި އަހަރު 978 މައްސަލައެއް ހުށައެޅިފައިވޭ: ކްރިމިނަލް ކޯޓު
ކްރިމިނަލް ކޯޓުގެ ޝަރީއަތުގެ މާލަމެއް
2019 ވަނަ އަހަރަށް ކްރިމިނަލް ކޯޓުގެ މަސައްކަތް ނިންމާލިއިރު، ތިން އަހަރަށްވުގެ ގިނަ ދުވަސްވެފައިވާ 255 މައްސަލައެއް ނުނިމި ހުރިކަން ހާމަވެއްޖެއެވެ.
ކްރިމިނަލް ކޯޓުގެ 2019 ވަނަ އަހަރުގެ ތަފާސް ހިސާބުތައް ދައްކާ ގޮތުން ހުސްވި އަހަރު އެ ކޯޓަށް 978 މައްސަލަ އެއް ހުށައެޅިފައިވެއެވެ. ނިމިގެން ދިޔަ އަހަރު ކްރިމިނަލް ކޯޓުން 1،339 މައްސަލައެއް ބަލާފައިވާއިރު، އަހަރުގެ މަސައްކަތްތައް ނިންމާލިއިރު ބާކިހުރި މައްސަލަތަކުގެ އަދަދަކީ 1،661 އެވެ.
ކްރިމިނަލް ކޯޓުގެ ތަފާސް ހިސާބުތައް ދައްކާ ގޮތުން އަހަރު ނިމުނުއިރު ނުނިމި ފަސް އަހަރުވެފައިވާ މައްސަލަ ތަކުގެ އަދަދަކީ 27 އެވެ. އަދި ނުނިމި ތިން އަހަރުވެ، ފަސް އަހަރުނުވާ މައްސަލަ ތަކުގެ އަދަދަކީ 228 އެވެ. އެއް އަހަރުވެ ތިން އަހަރު ނުވާ 744 މައްސަލަ އެއް އޮތްއިރު އެއް އަހަރު ނުވާ މައްސަލަ ތަކުގެ އަދަދަކީ 662 އެވެ.
ކްރިމިނަލް ކޯޓުން ބުނީ، ނުނިމި ގިނަދުވަސްވީ މައްސަލަތައް ގިނަވަނީ ސަބަބުތަކެއް ދިމާވުމުން. އެގޮތުން އެންމެ ބޮޑު ސަބަބެއް ގޮތުގައި ފާހަގަކޮށްފައިވަނީ ފާއިތުވި އަހަރުތަކުގައި ކޯޓުގެ ގާޒީންގެ ޢަދަދު މަދުވުމެވެ.
ކްރިމިނަލް ކޯޓުގައި މިވަގުތު ތިއްބެވީ ނުވަ ގާޒީންނެވެ. ކޯޓުގެ ތަފާސް ހިސާބުގެ ބަޔާނުގައި ވާ ގޮތުން ވަރަށް އަވަހަށް އެ ކޯޓަށް ގާޒީއަކު ހަމަޖެހިގެންދާނެ ކަމަށް ލަފާކުރެވޭ ކަމަށެވެ. ކްރިމިނަލް ކޯޓުގައި މިވަގުތު ތިބި ނުވަ ގާޒީންގެ ތެރެއިން ފަސް ގާޒީންނަކީ މިދިޔަ އަހަރު ތެރޭގައި އެކި ކޯޓުތަކުން ކްރިމިނަލް ކޯޓަށް ބަދަލު ކުރެވުނު ގާޒީންނެވެ.
މި އަހަރު އެ ކޯޓުން އަމާޒު ހިފާފައިވަނީ މާރޗް މަސް ނިމުމުގެ ކުރިން ނުނިމި ތިން އަހަރު ވެފައިވާ މައްސަލަތައް ނިންމުމަށާއި، ޖޫން މަހުގެ ނިޔަލަށް ނުނިމި ދެ އަހަރުވެފައިވާ މައްސަލަތައް ނިންމުމަށާއި، ސެޕްޓެމްބަރު މަހުގެ ނިޔަލަށް ކޯޓުގައި އެއްއަހަރުވީ މައްސަލައެއް ނުބޭވުމަށް މަސައްކަތް ކުރުމަށް ގާޒީންގެ ޢާންމު މަޖިލީހުން ނިންމުމުގެ އިތުރަށް އެ މަސައްކަތް ކުރިއަށް ގެންދާނެ ގޮތް ރޭވުމެވެ.
އެގޮތުން މާޗް މަހުގެ 31 ގެ ނިޔަލަށް ނުނިމި ތިން އަހަރުވާނެ 352 މައްސަލަ ކޯޓުގެ ޝަރީޢަތް ކުރާ 10 ސެކްޝަނަށް ވީހާވެސް ހަމަހަމަ ވާގޮތަށް ބަހާލުމުގެ މަސައްކަތް މިހާރު ނިންމާފައިވާ ކަމަށް އެ ކޯޓުން މައުލޫމާތުދޭއެވެ.
