ދޮންފަނު ކައިރިން އެކްސިޑެންޓްވެ އަޑިއަށްދިޔަ ޑިންގީ ނަގައިފި

ބ. ދޮންފަނު ކައިރިން ލޯންޗަކާއި ޑިންގީއެއް ޖެހި ހިނގި އެކްސިޑެންޓުގައި އަޑިއަށްދިޔަ ޑިންގީ އެމްއެންޑީއެފުން ނަގައިފިއެވެ.

އެމްއެންޑީއެފުން ބުނީ މި އެކްސިޑެންޓުގަ, ގެއްލުނު ޑިންގީ ބ. ދޮންފަނުގެ ހުޅަނގުން 0.5 ނޯޓިކަލް މޭލު ބޭރުން 46 މީޓަރު އަޑިން އެމްއެންޑީއެފްގެ ނޮދަރން އޭރިއާގެ ކޯސްޓްގާޑު ސްކޮޑްރަންގެ ޑައިވަރުން ނަގާފައިވާ ކަމަށެވެ.

އެމްއެންޑީއެފުން ބުނީ މި ޑިންގީ ނަގައިގެން ބ. ދަރަވަންދޫ އަށް މިއަދު ގެންދެވިފައިވާ ކަމަށެވެ.

މި މަހުގެ 2 ވަނަ ދުވަހުގެ ރޭ ބ. ދޮންފަނު ކައިރިން ޑިންގީއަކާއި ލޯންޗެއް ޖެހި ހިނގި އެކްސިޑެންޓުގައި ޑިންގީން ދަތުރުކުރި 4 މީހުންގެ ތެރެއިން އެކަކު ގެއްލިފައިވާ އިރު، އޭނާ ހޯދުމުގެ މަސައްކަތް އެމްއެންޑީއެފުން ދަނީ ކުރަމުންނެވެ. ގެއްލިގެން ހޯދަމުންދަނީ ބ. އޭދަފުއްޓަށް ނިޞްބަތްވާ އުމުރުން 41 އަހަރުގެ ނަޞްރުﷲ ޢަބްދުﷲ އެވެ. އޭނާ ގެއްލިގެން ހޯދަމުންދާތާ 6 ދުވަސްވެފައިވާ އިރު، އެމްއެންޑީއެފުން ދަނީ ހުރިހާ ވަޞީލަތެއްގެ ބޭނުން ކުރަމުންނެވެ.

ބުރާސްފަތި ދުވަހުގެ ރޭ 7:07 ކަން ހާއިރު، ބ. ދޮންފަނު ކައިރިން ލޯންޗަކާއި ޑިންގީއެއް ޖެހިގެން ހިނގި އެކްސިޑެންޓުގަ ގެއްލިގެން ހޯދަމުންދާ ނަޞްރުގެ އިތުރުން އެ ޑިންގީގައި އިތުރު 3 މީހުން ތިއްބެވެ. ނަމަވެސް އެކްސިޑެންޓުވި ލޯންޗުން ވަނީ، އެ 3 މީހުން ލޯންޗަށް ނަގާފައެވެ.

ފުލުހުން ބުނީ އެކްސިޑެންޓު ވެފައިވަނީ ބ. ދަރަވަންދޫން ފުރައިގެން ދިޔަ ޑިންޑީއަކާއި އެ އަތޮޅު އޭދަފުށީ ލޯންޗެއް ޖެހިގެން ކަމަށެވެ.