ފަހު މެޗުގައި ޕޮލިސް އަތުން ބަލިވިކަމުގައި ވިޔަސް ގައުމީ ވޮލީބޯޅަ ލީގުގެ ޗެމްޕިއަންކަން ދިވެހި ސިފައިންގެ ކްލަބުން ހޯދައިފިއެވެ.

ސޯޝަލް ސެންޓަރު އެތެރޭ ކޯޓުގައި ކުޅުނު މި މެޗުން ސިފައިން ބަލިވީ ތިން ސެޓު ދެ ސެޓުންނެވެ. މިއާއިއެކު ސިފައިންނަށް ވަނީ ސެޓުގެ ތަފާތުން މި މުބާރާތުގެ ޗެމްޕިއަންކަން ހޯދައިފައެވެ.

ވާދަވެރި ކުޅުމެއް ފެނިގެންދިޔަ މި މެޗުގެ ސެޓުތައް ޕޮލިހުން ގެންދިޔައީ 25-23، 26-24، 24-26، 28-26 އަދި 11-15 އިންނެވެ.

ދެޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މި މެޗުގައި ޕޮލިސް ޓީމުގެ ހުސެއިން ރަޒާން އާއި އިސްމާއިލް ސާޖިދު (ކުޑަ ކާއްޓޭ) އަދި އަލީ ހުޒާމް (ހުޒަންޓެ) ގެ ފަރާތުން ތަފާތު މޮޅު ކުޅުމެއް ފެނިގެން ގޮސްފައިވެއެވެ.

މި މެޗުގައި ސިފައިންގެ ފަރާތުން އެންމެ މޮޅު ކުޅުމެއް ފެނިގެންދިޔައީ އާދަމް ނަސީމް (އެޑަމް) އާއި އަހުމަދު އަބްދުލް ކަރީމް (ލޯންގޭ) އަދި ބިދޭސީ ދެ ކުޅުންތެރިންގެ ފަރާތުންނެވެ.

މެޗަށްފަހު ވާހަކަ ދައްކަމުން ޕޮލިސް ޓީމުގެ ކޯޗު ބުނީ މި މެޗަކީ ތިން ސެޓު އެއްސެޓުން ކާމިޔާބު ކުރެވޭނެ މެޗެއް ކަމަށާއި ނަމަވެސް ސިފައިން މި މުބާރާތް ކާމިޔާބުކުރީ ޓީމެއްގެ ގޮތުގައި ކުޅެގެން ކަމަށެވެ. މީގެ އިތުރުން ކޯޗު ބުނީ މި މުބާރާތުގައި ޕޮލިސް ޓީމަށް ދިމާވި އެންމެ ބޮޑު މައްސަލައަކީ ސެޓުތައް ނިންމައި ނުލެވުންކަމަށެވެ.

ދިވެހި ސިފައިންގެ ޓީމުގެ ކޯޗު ބުނީ މި މުބާރާތާއި ސިފައިން ކުރިމަތިލީ މި މުބާރާތް ކާމިޔާބު ކުރުމަށް ކަމަށާއި އެކަން ވެއްޖެ ކަމަށެވެ. މީގެ އިތުރުން ކޯޗު ބުނީ މިއީ ޓީމެއްގެ ގޮތުގައި ކުޅުންތެރިން ކުރި ބުރަ މަސައްކަތް ކަމަށެވެ.

މި މުބާރާތުގެ އެންމެ މޮޅު އައުޓް ސައިޑް އެޓޭކަރަކަށް ހޮވިގެންދިޔައީ ޕޮލިސް ކްލަބްގެ އިސްމާއިލް ސާޖިދް (ކުޑަ ކާއްޓޭ) އާއި އަލީ ހުޒާމް (ހުޒަންޓޭ) އެވެ. އެންމެ މޮޅު މިޑިލް ޕްލޭޔަރަކަށް ހޮވުނީ ޕޮލިހުގެ ހުސެއިން ޔޫސުފް އާއި ގުޑީސްގެ އާދަމް ފައިރޫޒްއެވެ. އެންމެ މޮޅު އޮޕަސިޓް ޕްލޭޔަރަކަށް ސިފައިންގެ އަހުމަދު އަބްދުލް ކަރީމް (ލޯންގޭ) ހޮވުނުއިރު އެންމެ މޮޅު ސެޓަރަކަށް ހޮވިގެންދިޔައީ ހަމަ އެކްލަބުގެ ހުސެއިން ޝާހިދެވެ. މުބާރާތުގެ އެންމެ އުންމީދީ ކުޅުންތެރިޔަކަށް ގުޑީސްގެ ޝަމާއިލް ހުސެއިން ހޮވުނުއިރު އެންމެ މޮޅު ލިބަރޯ އަކަށް ހޮވިގެންދިޔައީ ސިފައިންގެ އަހުމަދު ނަބީލެވެ. އަދި އެންމެ މޮޅު ކޯޗަކަށް ސިފައިންގެ ޓީމުގެ ކޯޗު މުމްތާޒް އަލީ ހޮވުނުއިރު މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ އާދަމް ނަސީމްއެވެ.

މި ފަހަރުގެ ގައުމީ ވޮލީބޯޅަ ލީގު މި ބޭއްވީ އަހަރެއްގެ މެދުކެނޑުމަކަށްފަހު އެވެ. މީގެ ކުރިން އަންހެން އަދި ފިރިހެން ޑިވިޝަނަށް ހުޅުވައިލައިގެން ބާއްވާ މި މުބާރާތުގެ މިއަހަރު ބޭއްވީ ފިރިހެން ޑިވިޝަން އެކަނިއެވެ.