ފޯކައިދޫ ބަލިކޮށް މާޒިޔާއިން ލީގު ތައްޓާއި ގާތަށް

ދިރާގު ދިވެހި ޕްރިމިއާ ލީގުގައި މާޒިޔާ އަދި ފޯކައިދޫ ބައްދަލުކުރި މެޗު މާޒިޔާއިން ކާމިޔާބުކޮށް ލީގު ތައްޓާއި ގާތަށް ޖެހިލައިފިއެވެ.

ގައުމީ ފުޓުބޯޅަ ދަނޑުގައި ކުޅުނު މި މެޗު މާޒިޔާއިން ކާމިޔާބުކުރީ 2-3 ގެ ނަތީޖާއަކުންނެވެ.

މި މެޗު ފަށައިގެން މާޒިޔާއިން ރަނގަޅަށް ކުޅުނުއިރު މާޒިޔާއިން ވަނީ ފޯކައިދޫގެ ހާފަށް ބާރުބޮޑު ކޮށްފައެވެ. އެގޮތުން މެޗުގެ ވަރަށް ކުރީ ކޮޅު މާޒިޔާގެ ކެޕްޓަން އަސަދުﷲ އަބްދުﷲ އަށް ވަނީ ހުސް ފުރުސަތެއްލިބި ބޭކާރުވެފައެވެ. އަދި އޭގެ ކުޑައިރުކޮޅެއް ފަހުން މާޒިޔާގެ ބިދޭސީ ފޯވާޑް ސްޓެވާޓް ދިން ބޯޅައަކުން ނާއިޒް ހަސަން (ދާދު) ފޮނުވާލި ނުރައްކާތެރި ހަމަލާ ފޯކައިދޫގފެ ކީޕަރު ވަނީ ހުށިޔާރު ކަމާއި އެކު ދިފާއުކޮށްފައެވެ. މެޗުގައި މާޒިޔާއިން ލީޑު ނެގީ މެޗުގެ 15 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ސްޓެވާޓްއެވެ.

މެޗުގެ ދެވަނަ ހާފުގައި ވެސް މާޒިޔާއިން އެޓޭކިންގ ގޭމެއް ކުޅުނުއިރު މެޗުގެ 49 ވަނަ މިނެޓުގައި ދާދު ވަނީ ނުރައްކާތެރި ހަމަލާއެއް ފޮނުވައިލައިފައެވެ. އޭނާ ފޮނުވައިލި ބޯޅަ ހުރަސްދަނޑި ކައިރިން ދިޔައީ ބޭރަށެވެ. މެޗުގެ 57 ވަނަ މިނެޓުގައި ފޯކައިދޫއިން ވަނީ ލަނޑު ޖަހައި ނަތީޖާ ހަމަހަމ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ހުސެއިން ފަޒީލެވެ. އޭގެ ފަހުން މެޗުގެ 68 ވަނަ މިނެޓުގައި ކެޕްޓަން އަސަދުﷲ އަބްދުﷲ ވަނީ ލަނޑު ޖަހައި މާޒިޔާއަށް ލީޑު ނަގައިދީފައެވެ. އަދި މެޗުގައި ބަދަލުކުޅުންތެރިޔެއްގެ ގޮތުގައި ކުޅެންއެރި އިބްރާހީމް ވަހީދު (އިއްބެ)

ވަނީ އިތުރު ލަނޑެއްޖަހާ މާޒިޔާއަށް ލީޑު ފުޅާ ކޮށްދީފައެވެ. ނަމަވެސް އޭގެ މިނެޓެއްފަހުން މާޒިޔާގެ ކީޕަރު އަތުން ވަނީ ބައިކޮޅަށް ލަނޑެއް ވަދެފައެވެ.

މި ނަތީޖާ އާއި އެކު މާޒިޔާއިން އޮތީ 16 މެޗުން ލިބުނު 41 ޕޮއިންޓާއެކު ލީގު ތާވަލުގެ އެއްވަނައިގައެވެ. ދެވަނައިގައި އޮތް އީގަލްސްއަށް 14 މެޗުން 27 ޕޮއިންޓް ލިބިފައިވެއެވެ.