އަމާޒަކީ އޮފިސަރުންނަށް ގޯނާކުރާ ގައިދީން އިސްލާހު ކުރުން: މުނާޒް
ޖަލުގައި ގައިދީން ވަނީ ބޭސްފަރުވާ ނުދޭކަމަށް ބުނެ އިހުތިޖާޖްކޮށްފައި
ކޮމިޝަނަރ އޮފް ޕްރިޒަންސް އަބްދުﷲ މުނާޒް
ކަރެކްޝަނަލް ސަރވިސްގެ މުވައްޒަފުންނަށް އަނިޔާކުރާ ޤައިދީންނަށް ހެޔު ވިސްނައި ދިނުމަކީ މޯލްޑިވްސް ކަރެކްޝަނަލް ސަރވިސްގެ އަމާޒުކަމަށް ކޮމިޝަނަރ އޮފް ޕްރިޒަންސް އަބްދުﷲ މުނާޒް ވިދާޅުވެއްޖެއެވެ.
މާފުށީ ޖަލު ޔުނިޓް 4 ގައި ތިބި ރިމާންޑް ބަންދުމީހުން ގައިގައި ތަޅާ އަނިޔާކޮށް ޖަލުގައި ބޮޑެތި ހަމަނުޖެހުންތަކެއް ހިނގާފައިވާކަމަށް ޚަބަރުތައް ފެތުރިފައި ވަނިކޮށް މުނާޒް ކުރެއްވި ޓްވީޓެއްގައި ވިދާޅުވީ، ޖަލުތަކުގައި ބަންދު ކުރެވޭ މީހުންގެ ފަރާތުން އޮފިސަރުންނަށް އެކިއެކި ގޯނާ ކުރުމަކީ ދޭތެރެ ދޭތެރެއިން ހިނގާ ކަމެއް ކަމަށެވެ.
އަދި އެފަދަ ކަންކަން ކުރާ ފަރާތްތަކަށްވެސް ހެޔޮ ވިސްނައިދީ އިސްލާހުކޮށް، ރިހެބިލިޓޭޓްކޮށް މުޖުތަމައަށް ބޭނުންހިފޭ ބަޔަކަށް ހެދުމަކީ ކަރެކްޝަންސްގެ އޮފިސަރުންގެ އަމާޒު ކަމަށާއި، ކަރެކެޝަންސްގެ އޮފިސަރުންގެ ސަލާމަތާއި ރައްކާތެރިކަން ކަށަވަރު ކުރުމަށް ކުރަންޖެހޭ ކަންކަންވެސް ކުރަމުންދާކަމަށް މުނާޒް ވިދާޅުވިއެވެ.
ގައިދީންނަށް ދޭ ބޭސްފަރުވާގެ ޚިދުމަތާ މެދު ހިތްހަމަ ނުޖެހޭތީ ހެނދުނު ގައިދީން އިހުތިޖާޖުކޮށް އެތަނަށް ޖަލު އޮފިސަރުން ދިޔުމުން އޮފިސަރުންނާއި ޤައިދީންނާ ދެމެދު ހަމަނުޖެހުންތަކެއް ހިނގާފައިވާއިރު، އެކަން ކަށަވަރުކުރުމަށް އޭރު ރާއްޖެއެމްވީއިން ކަރެކްޝަންސްގެ މީޑިއާ އޮފިސަރަށް ގުޅާލުމުން ފޯނަށް ޖަވާބެއް ނުދެއްވައެވެ.
ރާއްޖޭގެ ޖަލުތައް ފުރި، ޖަލުތަކަށް އެކަށީގެންވާ ވަރަށް ވުރެ ގިނައިން ޤައިދީން ބޭތިއްބުމުގެ މައްސަލަތައް ފެންމަތިވެފައިވާއިރު، ޖަލުތަކުގެ ހާލަތު ބެލުމަށް ފަހު ޖަލު އޮޑިޓް ރިޕޯޓެއް ނެރެފައިވެއެވެ. އެގޮތުން ޖަލުތަކުގައި މީހުން ބޭތިއްބުމަށް ކަނޑައަޅާފައިވާ އަދަދަށް ވުރެ އިތުރަށް މީހުން ބަންދުގައި ބޭތިއްބުމާއި، އިންސާނީ އަދި އެހެނިހެން ވަޞީލަތްތައް އެކަށީގެންވާ ވަރަށް ނެތުން ޖަލުން އޮޑިޓް ރިޕޯޓުގައި ފާހަގަކޮށްފައިވެއެވެ
ޖަލުތަކުގައި ޤައިދީންނަށް ބޮޑެތި މައްސަލަތައް ހުރިކަމާއި، އެގޮތުން ޖަލުތަކުން މީހުން މިނިވަންވެގެން ދިއުމާއި ޖަލުތަކަށް ދެވޭ ޚިދުމަތުގައި ތަފާތުކުރުން ގެންގުޅޭކަމަށް ބައެއް ފަރާތްތަކުން ތުހުމަތު ކުރެއެވެ. އެގޮތުން ޕެރޯލް އަދި ކްލެމެންސީ ދިނުމުގައި ތަފާތުކުރުންތައް ގެންގުޅޭކަމަށް ގިނަ ބަޔަކު ތުހުމަތުކުރާއިރު، ރާއްޖޭގެ ޖަލުތަކުގެ ހާލަތު ރަނގަޅުކޮށް، ބޭނުންތެރި ބައެއްގެ ގޮތުގައި ޤައިދީން އަނބުރާ މުޖުތަމައަށް ނެރުމަކީ މި ސަރުކާރުގެ ރިޔާސީ ވައުދެކެވެ.
ރާއްޖޭގައި ގާއިމްކޮށްފައިވާ ޖަލުތަކަކީ ކަރެކްޝަނަލް ސާވިސް އިން ބަލަހައްޓަމުންދާ ހަތަރު ޖަލަކާއި މާލެ އާއި ރާއްޖޭގެ އެކި ރަަށްރަށުގައި ފުލުހުން ބަލަހައްޓަމުންދާ ކަސްޓޯޑިއަލް ޖަލުތަކެވެ. ކަރެކްޝަނަލް ސާވިސް އިން ބަލަހައްޓާ ހަތަރު ޖަލަކީ މާފުށީ ޖަލާއި، ހިންމަފުށީ އައްސޭރި ޖަލާއި، ހުޅުމާލެ ޖަލުގެ އިތުރުން މާލެ ޖަލެވެ.
