ބަޅިނދުގެ ޝޫޓިން މި މަހު 15 ގަ ފަށަނީ
1 ޖެނުއަރީ 2020 | ބުދަ 10:57ގިނަ ކާސްޓުންތަކެއް ފެނިގެންދާނެ
ބަޅިނދުގެ ޕޯސްޓަރު
ރާއްޖޭގެ އެންމެ ކާމިޔާބު އެއް ޕްރޮޑަކްޝަން ހައުސް ކަމަށްވާ ޑާކްރެއިން އެންޓަޓައިންމެންޓް (ޑީއާރްއީ) ގެ ''ބަޅިނދު''ގެ ޝޫޓިން މި މަހުގެ 15 ވަނަ ދުވަހު ފަށާގޮތަށް ހަމަޖެހިއްޖެ އެވެ.
ބަޅިނދު މި ފިލްމަކީ ބިރުވެރި ހާދިސާއެއްގެ މައްޗަށް ބިނާކޮށް ހަދާ ފިލްމެކެވެ. ފިލްމާއި ބެހޭ ގޮތުން ރާއްޖެ.އެމްވީއާ ވާހަކަ ދައްކަމުން ޑާކްރެއިންގެ ޕްރޮޑިއުސަރ މުހައްމަދު އަލީ (މޮގާ) ބުނީ، ކުރިން ނިންމާފައި އޮތީ ''ނޮވެންބަރ''އާ އެކު ބަޅިނދުގެ ޝޫޓިން ފެށުމަށް ކަމަށެވެ.
އެކަމަކު ދެ ފިލްމު އެއްކޮށް ޝޫޓް ކުރުމަކީ އެހާ ފަސޭހަކަމަކަށް ނުވާތީވެ މި މަހުގެ 15 އަށް ފިލްމުގެ ޝޫޓިން ފަސްކޮށްފައިވާ ކަމަށެވެ. މޮގާ ބުނީ، އެ ފިލްމުގެ މަސައްކަތް ދެ މަސް ދުވަހުގެ ތެރޭގައި ނިންމާލެވޭނެ ކަމަށެވެ.
ހޫދް އިބްރާޙިމް ލިޔެ އަޙްމަދު ސިނާން ޑައިރެކްޓް ކޮށްފައިވާ މި ފިލްމުގެ ގިނަ ކާސްޓުންތަކެއް ހިމެނެއެވެ. ބަޅިނދު މި ފިލްމަކީ ޑާކްރެއިންގެ 14 ވަނަ ފިލްމެވެ.
