އަމިއްލަ ބޭނުމަށް އެމްބަސީގެ ކާރު ބޭނުންކޮށްފައެއް ނުވާނެ: މިނިސްޓަރ ޝިދާތާ

އަމިއްލަ އެއްވެސް ބޭނުންފުޅަކަށް މެލޭޝިއާ އެމްބަސީގެ ކާރުކޮޅު ބޭނުންކުރައްވާފައި ނުވާނެ ކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޝިދާތާ ޝަރީފު ވިދާޅުވެއްޖެއެވެ.

މިނިސްޓަރ އެހެން ވިދާޅުވީ، ޗުއްޓީއަށް މެލޭޝިއާއަށް ކުރެއްވި ދަތުރުފުޅެއްގައި ދައުލަތުގެ ވަަސީލަތްތައް އެކަމަނާ ބޭނުންކުރެއްވިކަމަށް ބުނެ އަމިއްލަ ފަރާތަކުން އޭސީސީއަށް މައްސަލައެއް ހުށައަޅާފައިވާ ދަނޑިވަޅެއްގައެވެ.

އެގޮތުން އެކަމަނާގެ ފޭސްބުކްގައި ލިއުއްވި ޕޯސްޓެއްގައި ވިދާޅުވީ، މެލޭޝިއާ އެމްބަސީގެ ކާރު ބޭނުންކޮށްފައި ނުވާނެ ކަމަށާއި، އެކަން ކަމާބެހޭ ފަރާތްތަކުން ބެއްލެވި ނަމަވެސް އެނގިލައްވާނެ ކަމަށެވެ.

މިނިސްޓަރ އިތުރަށް ވިދާޅުވީ، މިހާރު ފެންނަމުން މިދަނީ ސަރުކާރުގެ ވަޒީރަކާމެދުވެސް ތުހުމަތެއް ކުރެވިއްޖެނަމަ އެކަން ކަމާބެހޭ މުއައްސަސާތަކަށް ހުށައަޅައިގެން ކުރިއަށް ދިއުމުގެ ފުރުސަތު އޮތްްކަން ކަމަށެވެ.

މިނިސްޓަރ ޝިދާތާގެ މައްސަލައެއް އަމިއްލަ ފަރާތަކުން އޭސީސީއަށް ހުށައަޅާފައިވަނީ އަންގާރަ ދުވަހުއެވެ. އެގޮތުން އޭސީސީން ބުނީ، އެ މައްސަލައަކީ މިނިސްޓަރ ޗުއްޓީއަށް މެލޭޝިއާއަށް ކުރެއްވި ދަތުރުފުޅެއްގައި ދައުލަތުގެ ވަަސީލަތްތައް ބޭނުންކުރެއްވިކަމަށް ބުނެ ހުށައަޅާފައިވާ މައްސަލައެއް ކަމަށާއި، އަމިއްލަ ދަތުރުފުޅެއްގައި އެމްބަސީގެ ކާރުކޮޅު ބޭނުންކުރައްވާފައިވާކަމަށް އެ މައްސަލާގައި ބުނެފައިވާ ކަމަށެވެ.