އިސްލާމިކް މިނިސްޓަރުގެ އިތުބާރު ނެތްކަމުގެ ވޯޓެއް ނުނަގާނެ: މެންބަރު ހުސައިން ޝަހީމް

އަދާލަތު ޕާޓީގެ ސްލޮޓްގައި އިސްލާމިކް މިނިސްޓަރު ކަމުގައި ހުންނެވި ޑރ. އަޙްމަދު ޒާހިރު އަލީގެ އިތުބާރު ނެތްކަމުގެ ވޯޓެއް ނުނަގާނެކަމަށް ހެންވޭރު ދެކުނު ދާއިރާގެ އެމްޑީޕީގެ މެންބަރު ޙުސައިން ޝަހީމް (އަނދުން ހުސެއިން) ވިދާޅުވެއްޖެއެވެ.

ރާއްޖެ ޓީވީގެ ފަލަ ސުރުޚީގައި ވާހަކަ ދައްކަވަމުން ޝަހީމް ވިދާޅުވީ އެމްޑީޕީގެ ޕާލަމެންޓްރީ ގްރޫޕުގައި ރައީސް އިބްރާހިމް މުޙައްމަދު ޞާލިޙުގެ ފުލް ކެބިނެޓަށް ފުރިހަމަ ތާޢީދު އެބައޮތް ކަމަށެވެ. އެގޮތުން ތާޢީދު އޮތީ ވަކި ބޭފުޅަކަށް ނޫން ކަމަށާއި، ރައީސްގެ ފުލް ކެބިނެޓަށް އެމްޑީޕީގެ ޕީޖީގެ ފުރިަހަމަ ތާޢީދު އޮންނާނެ ކަމަށެވެ.

ނަމަވެސް ކަމެއް ދިމާވާ ފަހަރަކު ހިތްހަމަ ނުޖެހޭ ބޭފުޅަކު އެއްޗެއް ވިދާޅުވުމަކީ ޑިމޮކްރަޓިކް ޕާޓީއެއްގެ ތެރޭގައި ކަމެއް އޮވެދާނެ ގޮތް ކަމަށާއި، ނަމަވެސް އެއީއެންމެ ޒިންމާދާރު ގޮތެއް ނޫން ކަމަށް ދެކެވަޑައިގަންނަވާ ކަމަށް ޝަހީމް ވިދާޅުވިއެވެ.

އިސްލާމިކް މިނިސްޓަރު ޑރ. އަޙްމަދު ޒާހިރުގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށަހަޅުއްވާނެ ކަމަށް ވިދާޅުވީ ބިލަތްދޫ ދާއިރާގެ މެންބަރު އަޙްމަދު ހަލީމެވެ.

"ރާއްޖެއެމްވީ" އަށް މަޢުލޫމާތު ދެއްވަމުން މެންބަރު ވިދާޅުވީ އިސްލާމިކް މިނިސްޓަރުގެ އިތުބާރު ނެތްކަމަށް ހުށަހެޅުމަށް ނިންމީ އަމިއްލަ ހައިޞިއްޔަތުން ކަމަށާއި، އެއީ ޕާޓީން ނިންމައިގެން ކުރާކަމެއް ނޫންކަމަށެވެ. އަދި އިސްލާމިކް މިނިސްޓަރ މަޤާމުން ދުރުކުރުމުގެ މައްސަލަ މަޖިލީހަށް ހުށަހެޅުމަށް ނިންމެވީ، ހަރުކަށި ފިކުރާއި ދެކޮޅަށް މަސައްކަތް ކުރަމުންގެންދާ ޝައިޚުންނާއި ދެކޮޅަށް މިނިސްޓަރ މަސައްކަތް ކުރައްވަމުން ގެންދަވާތީ ކަމަށް މެންބަރުން ވިދާޅުވިއެވެ.