އަންނަ އަހަރުގެ ބަޖެޓުގައި ވިލިފުށްޓަށް ގިނަ ކަންތައްތަކެއް ހިމަނާފައިވާނެ: ރައީސް
ގޮނޑުދޮށް ޙިމާޔަތް ކުރުމަށްޓަކައި ކުރިއަށް އޮތް އަހަރުގެ ބަޖެޓުގައި 4.4 މިލިއަން ރުފިޔާގެ މަޝްރޫޢެއް
އެއްބައިވަންތަކަމުގެ ދުވަހުގެ ޖަލްސާގައި ރައީސް ވާހަކަފުޅުދައްކަވަނީ
2004 ވަނަ އަހަރުގެ ސުނާމީގެ ކާރިޘާގަ ބޮޑެތި ގެއްލުން ލިބުނު ރަށްތަކުގެ ތެރެއިން ވިލިފުށްޓަށް އަންނަ އަހަރުގެ ބަޖެޓުގެ ތެރެއިން މުހިންމު ގިނަ ކަންތައްތަކެއް ކުރުމަށް ހިމަނާފައިވާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.
ދިވެހިންގެ އެއްބައިވަންތަކަމުގެ ދުވަސް ފާހަގަކުރުމަށް ވިލިފުށީގަ ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ވިލުފުށްޓަކީވެސް، ދިރިނޫޅެވޭ ވަރަށް ބޮޑެތި ގެއްލުންތަކެއް ލިބުނު ރަށެއް ކަމަށާއި، ސުނާމީގައި ލިބުނު ގެއްލުންތަކުގެ ސަބަބުން، އެރަށް އެއްކޮށް ހުސްކޮށް، އަހަރުތަކެއް ވަންދެން އެރަށުގެ ރަށްވެހިން ދިރިއުޅުނީ އެހެން ރަށްރަށުގައި ކަމަށެވެ.
އަދި ފަސް އަހަރަށްފަހު ރަށަށް އެނބުރި އާދެވުނީ، "ސޭފް އައިލެންޑް ކޮންސެޕްޓް"ގެ ދަށުން ބިން ހިއްކައިގެން ރަށުގެ ފަސްގަނޑު އުސްކޮށް، ވަށައިގެން ރިވެޓްމަންޓް ޖަހާ، އެންމެ މިޒަމާނުގެ ވަޞީލަތްތަކާއެކު، މުޅިން އެހެން ރަށެއްގެ ގޮތުގައި ތަރައްޤީ ކުރެވިގެން ކަމަށް ރައީސް ވިދާޅުވިއެވެ.
އެހެން ނަމަވެސް، އަދިވެސް ވިލިފުށީގެ ޙިމާޔަތަށް ކުރަންޖެހޭ ބައެއް ކަންތައްތައް އެބަހުރި ކަން ފާހަގަ ކުރައްވަމުން ރައީސް ވިދާޅުވީ، އެ ރަށުގެ ގޮނޑުދޮށް ޙިމާޔަތް ކުރުމަށްޓަކައި ކުރިއަށް އޮތް އަހަރުގެ ބަޖެޓުގައި 4.4 މިލިއަން ރުފިޔާގެ މަޝްރޫޢެއް ކަނޑައަޅާފައިވާނެ ކަމަށެވެ. އަދި ވިލިފުށީގައި ފަށާފައިވާ 56 ހައުސިންގ ޔުނިޓުގެ މަސައްކަތް ނިންމުމަށް ވެސް، އަންނަ އަހަރުގެ ބަޖެޓުގައި ވަނީ ހިމަނާފައިވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ ސުނާމީގައި ގެދޮރު ހަލާކުވުމުގެ ސަބަބުން، ފަނަރަ ހާހަށްވުރެ ގިނަ މީހުން، ވަގުތީ ހިޔާތަކުގައި، އެތައް އަހަރެއް ވަންދެން އުޅެންޖެހުނު ކަމަށެވެ. އަދި ދިވެހިންނަކީ، ޤުދުރަތީ ގޮތުން ކުރިމަތިވާ، މޫސުމީ ނުރައްކާތަކާ އަބަދުވެސް ކުރިމަތިލާން ޖެހިފައިވާ ބައެއް ކަމަށާއި، މޫސުމީ ވިއްސާރައިގައި ގަދަވަޔާއި ބޯ ވާރޭގެ ސަބަބުން ރަށްރަށަށް ކޮންމެ އަހަރަކު އެތައް ގެއްލުންތަކެއް ކުރިމަތިވާ ކަމަށެވެ. އަދި ރާއްޖެއާ ކައިރި ޞަރަޙައްދުގައި އުފެދޭ ޠޫފާންތަކުގެ ނުސީދާ އަސަރު، މަދުން ނަމަވެސް ރާއްޖެއަށް ފޯރާ އިރު، އުދައެރުމަކީ ވެސް ކޮންމެ އަހަރަކު ދިމާވާ މައްސަލައެއް ކަމަށާއި، މޫސުން ގޯސް ދުވަސްވަރު ހިނގާ ކަނޑުމަތީގެ ޙާދިސާތައްވެސް މަދެއް ނޫން ކަމަށެވެ.
ރައީސް ވިދާޅުވީ ސުނާމީގައި ކުރިމަތިވި ގެއްލުމަކީ، ރަށްރަށަށް ރާޅު އެރުން އެކަންޏެއް ނޫން ކަމަށާއި، ސުނާމީގައި ގޯތި ގެދޮރު ހަލާކުވެ، ދަނޑުބިންތައް ހަލާކުވެ، ގަސްގަހާގެހި މަރުވެ، ރަށްރަށުގެ އިންޖީނުގެތައް ހަލާކުވެ، މުޅި ޤައުމުގެ މުވާޞަލާތީ ޚިދުމަތް އެތައް ގަޑިއިރަކަށް ކެނޑިގެންދިޔަ ކަމަށެވެ. އަދި ހޮސްޕިޓަލްތަކާއި ޞިއްޙީ މަރުކަޒުތަކުން ދޭ ޚިދުމަތްތަކަށް ބުރޫ އަރާ ފުރާދުއްވާ އުޅަނދުފަހަރަށް ބޮޑެތި ގެއްލުންތައް ލިބުނު ކަމަށެވެ. އަދި ރަށްރަށުގެ ބަނދަރުތަކާއި ފާލަންތައް ހަލާކުވެ ގުނާ ޢަދަދު ނުކުރެވޭހައި ބޮޑެތި ގެއްލުންތައް ލިބުނު ކަމަށް ރައީސް ވިދާޅުވިއެވެ.
ސުނާމީގެ އަސަރު ރާއްޖެއަށް ކުރި ގޮތާއި ކުރި މިންވަރަށް ބެލުމުން، ކަނޑުގެ ލޮނުގަނޑު އުފުލުމަކީ، ރާއްޖެއަށް ކިހާ ނުރައްކާތެރި ކަމެއްކަން ވަޒަންކޮށްލެވޭނެކަމަށެވެ. ސުނާމީ އުފެދުނީ ރާއްޖެއާ 2500 ކިލޯމީޓަރު ދުރުގައެވެ. އަދި އެހާ ދުރުގައި އުފެދުނު ސުނާމީއެއްގެ އަސަރު ރާއްޖެއަށް ކުރިއިރު، ރާއްޖޭގެ ބައެއް ރަށްރަށަށް، ބިމުން ފެށިގެން 14 ފޫޓު އުސްމިނަށް ލޮނުގަނޑު އުފުލިގެންދިޔައެވެ.
