ކަރުދާހާއި ޕްލޭންކުރުން ބާއްވާފައި އަންނަ އަހަރު ނުކުންނާނީ ފުރޯއްޔާއި އުދަލި ހިފައިގެން ރާއްޖެ ބަދަލުކުރަން ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.

ހޯމަ ދުވަހުގެ ރޭ މޯލްޑިވްސް ބޯޓިންގް އެވޯޑު ހަފްލާ ޝަރަފުވެރިކޮށްދެއްވާ ވާހަކަ ދައްކަވަމުން މިނިސްޓަރު ވިދާޅުވީ މި ސަރުކާރުގެ ފުރަތަމަ އަހަރު އުޅެން ޖެހުނީ ކަންވާރުތަކުގެ ބޮޅުތައް ފިލުވުމަށް ކަމަށެވެ. އަދި ޓޫރިޒަމް މިނިސްޓްރީން މަސައްކަތް ކުރާނީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރުން ވި ވައުދުތައް ރައްޔިތުންނަށް ފުއްދުމަށް ކަމަށެވެ.

އެވޯޑު ހަފްލާގައި އިތުރަށް ވާހަކަ ދައްކަވަމުން އަލީ ވަހީދު ވިދާޅުވީ އަންނަ އަހަރުގެ މަސައްކަތްތެރިންގެ ދުވަހުގެ ކުރިން ފަތުރުވެރިކަމުގެ ހުރިހާ ޤަވާއިދުތައް މުރާޖާ ކުރެވިގެންދާނެ ކަމަށާއި ބޯޓިންގް އެސޯސިއޭޝަނާއި ގުޅުން ހުރި ޤާނޫނާއި ޤަވާއިދުތަކާއި ފަތުރުވެރިކަމުގެ ސިނާއަތުގައި ހަރަކާތްތެރިވާ ހުރިހާ ފަރާތްތަކާ އެއްކޮށް ޤަވާއިދުތައް މުރާޖާ ކުރުމުގެ މަސައްކަތްކޮށް ޖުމްލަ 20 ޤަވާއިދު މުރާޖާ ކުރާނެ ކަމަށް އަލީ ވަހީދު ވިދާޅުވިއެވެ.

މުރާޖާކޮށް, އިސްލާހު ކުރާ ގަވާއިދުތައް:

މި ދުވަސްވަރަކީ ރާއްޖެއަށް މޫސުން ގޯސް ދުވަސްވަރެއްކަން ފާހަގަކުރައްވާ އަލީ ވަހީދު ވިދާޅުވީ ބޯޓިންގް ދާއިރާގައި ހަރަކާތްތެރިވާ ފަރާތްތަކާއި އަދި އެހެނިހެން ފަރާތްތަކުން މޫސުމަށް އިތުރަށް ސަމާލުވާން ޖެހޭ ކަމަށެވެ. އަދި ދަތުރުފަތުރު ކުރުމުގައި މޫސުމަށް ސަމާލުވާން ޖެހޭނީ ހަމައެކަނި ބޯޓިންގް ދާއިރާގައި އުޅޭ ފަރާތްތައް އެކަނި ނޫން ކަމަށާއި އާންމު ރައްޔިތުން ވެސް މޫސުމަށް ސަމާލުވާން ޖެހޭނެ ކަމަށް އޭނާ ވިދާޅުވިއެވެ.

މޫސުމަށް ނުބަލާ ދަތުރުކުރުމުން ހަމައެކަނި ނުރައްކަލުގެ ތެރެއަށް ހުށަހެޅިގެންދަނީ ފަތުރުވެރިޔާ އެކަނި ނޫންކަން ފާހަގަކުރައްވާާ އަލީ ވަހީދު ވިދާޅުވީ، ކޯސްޓްގާޑާއި ފުލުހުންނާއި ސިފައިންނަށް ވެސް އެ ދައުވަތު ދެވެނީ އެކަމުގެ ނުރައްކަލުގެ ތެރެއަށް ކަމަށެވެ. އަދި ހަމައެކަނި ކަމާބެހޭ މުއައްސަސާތަކުން އިލްތިމާސް ކުރުމުން މޫސުމަށް ސަމާލުވާން ޖެހޭކަމަށް ނުދެކި އެމީހަކު އަމިއްލަ އަށް ވެސް ދަތުރު ކުރުމުގެ ކުރިން މޫސުމަށް ސަމާލުވުމަށް މިނިސްޓަރު ވަނީ އިލްތިމާސްކުރައްވާފައެވެ.