ބްރަމާސްތްރާގައި ރަންވީރާއި ދިޕިކާ ފެނިގެން ހިނގައިދާނެތަ؟!
ބްރަމާސްތްރާ ރިލީޒް ކުރުމަށް ހަމަޖެހިފައިވަނީ އަންނަ އަހަރު މެއި ގައި
ދިޕިކާ ޕަދުކޯން އާއި ރަންވީރު ސިންގް އަދި އާލިއާ ބަޓް އާއި ރަންބީރު ކަޕޫރު
ރަންބީރު ކަޕޫރާއި އާލިއާ ބަޓް އެކުގައި ފެނިގެންދާ ފުރަތަމަ ފިލްމް "ބްރަމާސްތްރާ" އަކީ ފޭނުން މިހާރު އެންމެ ބޮޑަށް އިންތިޒާރު ކުރަމުންދާ އެއް ފިލްމެވެ.
މި ދެލޯބިވެރިން އެކުގައި ފެނިގެންދާ މި ފިލްމު ބެލުމަށް ކެތްމަދުވެފައި ތިބި ފޭނުންނަށް މިވަނީ އިތުރު އުފާވެރި ޚަބަރެއް ދީފައެވެ.
އެންމެ ފަހުގެ ރިޕޯޓްތައް ބުނާގޮތުން ދިޕިކާ ޕަދުކޯން އާއި ރަންވީރު ސިންގް ވަނީ މި ފިލްމްގައި ޚާއްސަ ރޯލެއް ކުޅުމަށް އެއްބްސްވެފައެވެ. އެހެންކަމުން ކަރަން ޖޯހަރުގެ ދަރުމާ ޕްރޮޑަކްޝަނުން އުފައްދާ މި ފިލްމްގައި ދިޕިކާ އާއި ރަންވީރު ޚާއްސަ ފެނިލުމަކުން ފެނިގެން ދާނެއެވެ.
ކާމިޔާބު ފިލްމް "ގަލީ ބޯއީ" ގައި އާލިއާ އާއި ރަންވީރު ވަނީ އެކުގައި ފެނިގެންގޮސްފައެވެ. ދިޕިކާ އާއި ރަންބީރު އެކުގައި ވަނީ "ތަމާޝާ"، "ޔޭ ޖަވާނީ ހޭ ދިވާނީ" ގެ އިތުރުންވެސް ގިނަ ފިލްމްތަކަކުން ފެނިގެން ގޮސްފައެވެ.
"ބްރަމާސްތްރާ" ވެގެންދާނީ ބޮލީވުޑްގައި އެންމެ ކާމިޔާބު ދެ ޖޯޑު އެކުގައި ފެނިގެންދާ ފުރަތަމަ ފިލްމަށެވެ.
އަމީތާބް ބަޗަން އާއި މޮއިނީ ރޯއީވެސް ފެނިގެންދާ މި ފިލްމް ރިލީޒް ކުރުމަށް ހަމަޖެހިފައިވަނީ އަންނަ އަހަރުގެ މެއި މަހުގައެވެ.
