މޮރީނިއޯގެ ޓޮޓެންހަމް ބަލިކޮށް ޗެލްސީއިން ހަތަރުވަނައިގައި ހަމަޖެހިލައިފި

އިނގިރޭސި ޕްރިމިއާ ލީގުގައި ޓޮޓެންހަމް ހޮޓްސްޕަރ އަދި ޗެލްސީ ބައްދަލުކުރި މެޗު ޗެލްސީއިން ކާމިޔާބުކޮށް ތާވަލުގެ ހަތަރުވަނައިގައި ހަމަޖެހިލައިފިއެވެ.

ޓޮޓެންހަމްގެ ކޯޗު ހޯސޭ މޮރީނިއޯ އިރުޝާދު ދިން ކުޅުންތެރިއެއް ކަމަށްވާ ފްރޭންކް ލަމްޕާޑްގެ އިރުޝާދުގެ ދަށުން ކުޅުނު ޗެލްސީއިން ޓޮޓެންހަމް ބަލިކުރީ 2-0 ގެ ނަތީޖާއަކުންނެވެ.

މެޗު ފަށައިގެން ޗެލްސީއިން ޓޮޓެންހަމްގެ ގޯލަށް ފުލުފުލުގައި ހަމަލާތައް ފޮނުވައިލައިފައިވާއިރު މި މެޗުގެ 12 ވަނަ މިނެޓުގައި ޗެލްސީއިން ވަނީ ލަނޑުޖަހައި ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ މިޑްފިލްޑަރ ވިލިއަން އެވެ. މި ލަނޑާއިއެކު ޓޮޓެންހަމްއިން އެޓީމުގެ ކުޅުން ރަނގަޅުކޮށް ޗެލްސީގެ ގޯލަށް ނުރައްކާކޮށްފައިވެއެވެ. އެގޮތުން މެޗުގެ 28 ވަނަ މިނެޓުގައި ޓޮޓެންހަމްގެ ކެޕްޓަން ހެރީ ކޭން އަށް ވަނީ ލަނޑުޖަހަން ރަނުގެ ފުރުސަތެއްލިބި ބޭކާރުވެފައެވެ. ޗެލްސީއިން ވަނީ މެޗުގެ ފުރަތަމަ ހާފު ނިމުމުގެކުރިން އިތުރު ލަނޑެއްޖަހާ ލީޑު ފުޅާ ކޮށްފައެވެ. މި ލަނޑުވެސް އެޓީމަށް ކާމިޔާބުކޮށްދިނީ ފުރަތަމަ ލަނޑު ކާމިޔާބުކޮށްދިން ވިލިއަންއެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ދެވަނަ ހާފުގައި ޗެލްސީއަށް ވަނީ ލީޑު ފުޅާކުރުމަށް ރަނުގެ ފުރުސަތުތަކެއް ލިބި ބޭކާރުވެފައެވެ. މި މެޗުގެ 62 ވަނަ މިނެޓުގައި ޓޮޓެންހަމްގެ ފޯވާޑް ސޮންއަށް ވަނީ ކުރި ނުރައްކާތެރި ފައުލަކާއި ގުޅިގެން ރަތްކާޑު ދައްކައި ދަނޑުން ފޮނުވައިލައިފައެވެ.

މި ނަތީޖާއިއެކު ޗެލްސީއިން ލީގު ތާވަލުގެ ހަތަރުވަނައިގައި އޮތީ ލިބުނު 32 ޕޮއިންޓާއިއެކުގައެވެ. ލީގު ތާވަލުގެ އެއްވަނައިގައި ލިވަރޕޫލުން އިން އޮތީ އެއްމެޗު މަދުންކުޅެ ލިބުނު 49 ޕޮއިންޓާއި އެކުގައެވެ. އަދި ދެވަނައިގައި އޮތް ލެސްޓާ ސިޓީ އަށް ލިބިފައިވަނީ 39 ޕޮއިންޓެވެ. މި މެޗުން ބަލިވި ޓޮޓެންހަމް ލީގު ތާވަލުގެ ހަތް ވަނައިގައި އޮތީ ލިބުނު 26 ޕޮއިންޓާއިއެކުގައެވެ.