އެމްބީބީއޭ ގައުމީ ބަނޑުފިލާ ޗެލެންޖް 2019 ގެ ޗެމްޕިއަންކަން ކުޑަ އައްޔަ ހޯދައިފި

މޯލްޑިވްސް ބޮޑީ ބޯރޑިންގ އެސޯސިއޭޝަނުން ރާވައި އިންތިޒާމްކޮށްގެން ބޭއްވި ފުރަތަމަ ގައުމީ ބަނޑުފިލާ ޗެލެންޖްގެ ޗެމްޕިއަންކަން ރާއްޖޭގެ އެއްވަނަ ބޯޑީ ބޯރޑަރ އަލީ ޚުޝްރުވާން (ކުޑަ އައްޔަ) ހޯދައިފިއެވެ.

ވަރުނުލާ ރާޅުގަނޑު ސަރަހައްދުގައި ބޭއްވުނު މި މުބާރާތުގެ އެއްވަނަ ކުޑަ އައްޔަ ހޯދީ ފައިނަލް ހީޓުގައި އަލީ އާނިމް (ކިރިކާ) ބަލި ކުރުމަށްފަހުގައެވެ.

މި މުބާރާތުގެ ޕްރޯން ކެޓަގަރީގައި ޖުމްލަ 36 ބޮޑީ ބޯރޑަރުން ބައިވެރިވެފައިވާއިރު މުބާރާތުގައި ގިނަ އަދަދެއްގެ ޒުވާނުންވަނީ ބައިވެރިވެފައެވެ. އެގޮތުން ފިރިހެން ޕްރޯންސްގެ ދެވަނަ ހޯދި ކިރިކާ އަކީ އުމުރުން 19 އަހަރުގެ އުންމީދީ ޒުވާނެކެވެ.

ފިރިހެން ޕްރޯންސް ފައިނަލް އަލީ ޚުޝްރުވާން އަހްމްދު (ކުޑަ އައްޔަ) ކާމިޔާބުކުރީ ފައިނަލް ހީޓުގައި 13.6 ޕޮއިންޓް ހޯދައިގެންނެވެ. ދެވަނަ އަށްދިޔަ ކިރިކާ އަށް ހޯދުނީ 12.6 ޕޮއިންޓެވެ.

މި މުބާރާތުގެ ފަހުރުވެރި އެއްވަނަ ހޯދުމަށްފަހު ކުޑަ އައްޔަ ސޯޝަލް މީޑިއާގައި ބުނީ ރާއްޖޭގައި ގައުމީ ފެންވަރުގައި ބޭއްވުނު ފުރަތަމަ ބޮޑީ ބޯރޑިން މުބާރާތުގެ އެއްވަނަ ލިބުމުން އުފާވާކަމަށާއި މި މުބާރާތުގައި އެންމެ ބޮޑު ގޮންޖެހުމަކާއި ދިމާވީ މޫސުން ގޯސްވުމުގެ ސަބަބުން ކަމަށެވެ. މީގެއިތުރުން ކުޑަ އައްޔަ ބުނީ މި މުބާރާތުން ޒުވާން މޮޅު ބޮޑީ ބޯރޑަރުންތަކެއް ފެނިގެންދިޔަކަމަށެވެ.

މި މުބާރާތުގެ ޕްރޯން ޖޫނިއާ ފައިނަލް ހީޓް މުހައްމަދު ރީޝާން ރަޝީދު ކާމިޔާބު ކުރީ 11 ޕޮއިންޓް ހޯދައިގެންނެވެ. ދެވަނަ އަށްދިޔަ އަހްނަފް (ނަފްކޮ) އަށް ލިބުނީ 5.9 ޕޮއިންޓެވެ. މި ކެޓަގަރީގެ ތިންވަނަ އަށްދިޔައީ އިނާޝް ނައީމް އެވެ. މި ކެޓަގަރީގައި ޖުމްލަ 16 ބޮޑީ ބޯޑަރުން ބައިވެރިވެފައިވާއިރު އެންމެ ހަގު ބައިވެރިޔާގެ އުމުރަކީ އެންމެ 14 އަހަރެވެ.

މި މުބާރާތުގެ ފައިނަލް ބައްލަވައިލައްވަން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި ސަރުކާރުގެ މަތީ ފަންތީގެ ބޭފުޅުން ބައިވެރިވެ ވަޑައިގެންނެވިއެވެ.