އުތުރު ކޮރެއާގެ ނިއުކްލިއާ ހަތިޔާރުގެ މައްސަލައިގެ މަޝްވަރާއަށް އައުމަށް އެމެރިކާއިން އަނެއްކާ ވެސް ދައުވަތުދީފި
16 ޑިސެމްބަރު 2019 | ހޯމަ 14:53މަޝްވަރާތައް ނިންމުމަށް ވަކި މުއްދަތެއް ނެތް
އެމެރިކާގެ ރައީސް ޑޮނާލްޑް ޓްރަމްޕް (މ) އުތުރު ކޮރެޔާއަށް ހުރަސް ކުރައްވަނީ | އޭއެފްޕީ
އުތުރުކޮރެއާގެ ނިއުކްލިއަރ ހަތިޔާރުގެ މައްސަލައިގައި މަޝްވަރާއަށް އައުމަށް އެމެރިކާއިން އެޤައުމަށް ދައުވަތުދީފިއެވެ.
އެމެރިކާގެ ޚާރިޖީ ވަޒީރު މައިކް ޕޮމްޕޭއޯ ވެސް ވަނީ މީގެ ކުރިން ކުޑަ ދުވަސްކޮޅެއް ނުވަތަ މަދު ހަފުތާ ކޮޅެއްގެ ތެރޭގައި މަޝްވަރާތައް ފެށިގެން ހިނގައިދާނެ ކަމަށް އުއްމީދުކުރައްވާ ކަމަށް ވިދާޅުވެފައެވެ.
ޕޮމްޕޭއޯ ވިދާޅުވީ، ނިއުކްލިއަރ ހަތިޔާރުގެ ބާރުވެރިކަން ނައްތާލުމަށް އުތުރު ކޮރެއާގެ ލީޑަރު ކިމް ޖޮންގް އުން އެއްބާރުލުން ދެއްވަމުން ގެންދަވާކަން އެނގިވަޑައިގަންނަވާ ކަމަށެވެ. އަދި ވަރަށް އަވަހަށް މަޝްވަރާގެ މޭޒަށް ހާޒިރުވެވޭނެ ކަމުގެ ބޮޑު އުއްމީދެއް އެބައޮތް ކަމަށެވެ.
އުތުރު ކޮރެއާއިން ނިއުކްލިއަރ ހަތިޔާރު ނައްތާލާ، އެ ޤައުމުގެ މިސައިލް މަޝްރޫއު ހުއްޓުމަކަށް ގެނައުމަށް މިދިޔަ އަހަރު އެމެރިކާއާއިއެކު ފެށި މަޝްވަރާތައް މަޑުޖެހިފައިވަނީ މިއަހަރުގެ ފެބުރުއަރީ މަހު ވިއެޓްނާމުގައި ބޭއްވި ބައްދަލުވުމަށް ފަހުގައެވެ. އަދި އެމެރިކާގެ ރައީސް ޑޮނާލްޑް ޓްރަމްޕާއި އުތުރު ކޮރެއާގެ ލީޑަރު ކިމް ވަނީ ވަނީ ދެކޮރެއާ ގުޅޭ ޞަރަޙައްދީ އިމުގައި، މިއަހަރުގެ ޖޫން މަހު ބައްދަލު ވެސް ކުރައްވާފައެވެ. އަދި މަޝްވަރާތައް އަލުން ފެއްޓެވުމަށް 2 ލީޑަރުންވެސް އެއިރު އެއްބަސްވެވަޑައިގެންނެވިއެވެ.
އުތުރު ކޮރެއާއާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކަށް ލުއި ދެވޭނެ ގޮތަކަށް ދެ ޤައުމުން އެއްބަސްވުމަކަށް އައުމަށް އުތުރު ކޮރެއާ އިން އެމެރިކާއަށް ފުރުޞަތު ދިނީ މި އަހަރުގެ ނިޔަލަށެވެ. އަދި އެކަން ނުކޮށްފި ނަމަ ނުސީދާ އިންޒާރެއް ވެސް އުތުރު ކޮރެއާއިން އޮތީ މީގެ ކުރިން ދީފައެވެ.
އުތުރު ކޮރެއާއަށް އެމެރިކާއިން ކަނޑައެޅި ޚާއްޞަ މަންދޫބު ސްޓެފަން ބިގަން ވިދާޅުވީ ނިއުކްލިއަރ ހަތިޔާރުގެ މައްސަލާގައި އެމެރިކާ އޮތީ ތައްޔާރަށް ކަމަށާއި، މިކަމުގައި ވަކި މުއްދަތެއް ނެތް ކަމަށެވެ.
ނިއުކްލިއަރ ހަތިޔާރުގެ މައްސަލާގައި އެމެރިކާގެ ރައީސް ޑޮނާލްޑް ޓްރަމްޕާއި އުތުރު ކޮރެއާގެ ލީޑަރު ކިމް ޖޮންގް އުން ދެ ފަހަރެއްގެ މަތިން ބައްދަލު ކުރައްވައި، މަޝްވަރާ ކުރެއްވިޔަސް، ދެ ޤައުމުގެ ދެމެދުގައި މިހާތަނަށް އެއްބަސްވުމަކަށް އާދެވިފައެއް ނުވެއެވެ.
