ގެއްލިގެން ހޯދަމުންދިޔަ ޗިލީގެ އަސްކަރީ މަތިންދާ ބޯޓުގެ ބައިތަކެއް ފެނިއްޖެއެވެ.

އަލްޖަޒީރާގައި ރިޕޯޓުކޮށްފައިވާ ގޮތުގައި، ފްލައިޓްގެ ބައިތައް ފެނިފައިވަނީ، ފްލައިޓްއާ އެންމެ ފަހުން ގުޅުނު ސަރަހައްދުގެ 30 ކިލޯމީޓަރު ދުރުންނެވެ.

އެއާފޯސް އިން ބުނީ، ފްލައިޓްގެ އިތުރު ބައިތައް ހޯދުމުގެ މަސައްކަތް އަދިވެސް ކުރިއަށްގެންދާ ކަމަށެވެ. ނަމަވެސް ފްލައިޓުން ދަތުރުކުރި އެއްވެސް މީހަކު ފެނިފައެއްނުވެއެވެ.

ފްލައިޓް ގެއްލުނު ސަރަހައްދުގެ ފުންމިނުގައި ގާތްގަނޑަކަށް 3500 މީޓަރު (11500 ފޫޓް) ހުރިއިރު، މިސަރަހައްދަކީ ގިނަ އަދަދެއްގެ ޕެންގިއިންތަކެއް ވަޒަންވެރިވެފައިވާ ސަރަހައްދެކެވެ.

ޗިލީގެ ޕުންޓަ އެރެނަސް މިމަހުގެ 11 ވަނަ ދުވަހު އެގައުމު ގަޑިން ހަވީރު 16:55 ފުރައިގެން އެންޓަރޓިކާގެ ބޭސްއަކަށް ދަތުރުކުރި ހާކިއުލެސް މަރުކާގެ ފްލައިޓާއި އޮޕަރޭޓަރާއި ދެމެދު މުއާސަލާތީ ގުޅުން ކެނޑުނީ ޗިލީ ގަޑިން ހަވީރު ހައެއް ޖެހިހާއިރުއެވެ.

އެއާފޯސް އިން ބުނީ، މިފްލައިޓްގައި17 ފަޅުވެރިންނާއި 21 ފަސެންޖަރުން ތިބި ކަމަށެވެ. ރެސްކިޔު ޓީމްތަކާއި ގުޅިގެން އެއާފޯސް އިން ދަނީ، ބައެއް މީހުން ސަލާމަތުން ތިބި ކަމުގެ އުއްމީދުގައި އެންމެ ފަހުން ފްލައިޓާއި ގުޅުން ކެނޑުނު ސަރަހައްދު ބަލަމުންނެވެ.

ޗިލީގެ ކާގޯ ފްލައިޓް ދަތުރުކުރީ އެންޓާޓިކާގައި ހުންނަ އެއާފޯސްގެ ބޭސްއަށް ލޮޖިސްޓިކް ސަޕޯޓުގެ އިތުރުން މެއިންޓަނެންސް ސަޕޯޓް ފޯރުކޮށް ދިނުމަށެވެ.