މަނީ ހެއިސްޓްގެ ހަތަރު ވަނަ ސީޒަން އޭޕްރިލް 3 ގައި!

ދިވެހިންގެ ތެރޭގައި މަގުބޫލުކަމުން ހޯދާފައިވާ ސްޕެނިޝް ސީރީޒް "މަނީ ހެއިސްޓް" ގެ ހަތަރު ވަނަ ސީޒަން އަންނަ އަހަރުގެ އޭޕްރިލް މަހުގެ 3 ގައި ނިކުތުމަށް ހަމަޖެހިފައިވާކަމަށް ނެޓްފިލްކްސް އިން އިއުލާންކޮށްފިއެވެ.

މަނީ ހެއިސްޓްގެ ފުރަތަމަ ސީޒަނާއި، ދެވަނަ ސީޒަން ދައްކާފައިވަނީ 2017 ވަނަ އަހަރު އެވެ. މީގެ ތިންވަނަ ސީޒަން ނެޓްފްލިކްސްއިން ދައްކަން ފެށީ މިއަހަރުގެ ޖުލައި މަހުގެ ތެރޭގައެވެ. ނެޓްފްލިކްސްއިން ބުނެފައިވަނީ މި ސީރީޒް ދުނިޔޭގެ އެކިކަންކޮޅުތަކުން 34 މިލިއަނަށް ވުރެ ގިނަ މީހުން ބަލާފައިވާ ކަމުގައެވެ.

2018 ވަނަ އަހަރު ނެޓްފްލިކްސްއިން ދައްކާ ނޮން އިންގްލިޝް ސީރީޒްތަކުގެ ތެރެއިން އެންމެ ގިނަ އަދަދެއްގެ މީހުން ބެލި ސީރިޒްގެ ލަގަބުވެސް ލިބިފައިވަނީ މި ސީރީޒަށެވެ.

މަނީ ހެއިސްޓް އިން ދައްކުވައިދެނީ މެޑްރިޑްގައި ހުންނަ ބޭންކެއް ކަމަށްވާ ރޯޔަލް މިންޓް އޮފް ސްޕެއިން އިން ވައްކަން ކުރުމަށްޓަކައި ގްރޫޕެއް ހަރަކާތްތެރިވެ، ދިމާވާ ގޮންޖެހުންތަކުން އަރައިގަނެ ކާމިޔާބުވާ މަންޒަރެވެ. އެ ބޭންކްގައި މީހުން ރަހީނުކޮށް، ބޭތިއްބުމަށްފަހު އެމީހުން ލައްވާ 2.4 ބިލިއަން ޔޫރޯ ނޫޓުތައް ޗާޕުކުރުވައިގެން އެމީހުންގެ ވައްކަމުގެ ޕްލޭން ކާމިޔާބުވެއެވެ.

މި ވައްކަމުގެ ތެރޭގައި ރަހީނުކޮށްފައި ތިބި މީހުންނާއި ގްރޫޕުގައި ހިމެނޭ ބައެއް މީހުންނާއި ދެމެދު ހިނގާ ލޯބީގެ ތަފާތު ހާދިސާތައް ވެސް ދައްކުވައިދެއެވެ. މި ފްލޭން ކާމިޔާބުކޮށް އެމީހުންނަށް ބޭންކުގެ ބޭރުން އެހީތެރިކަން ފޯރުކޮށްދިނުމަށްޓަކައި ހަރަކާތްތެރިވަނީ ފްރޮފެސަރެވެ. މި ފިލްމުގައި އެންމެ ތަފާތުކަމެއްގެ ގޮތުގައި ފާހަގަކުރެވުނީ ވައްކަމުގެ ކުރިން ގްރޫޕުތައް ބައްދަލުވާއިރު އެމީހެއްގެ އަސްލު ނަން ބުނުމުގެ ބަދަލުގައި ކޮންމެ މީހަކަށްވެސް އެމީހަކު ބޭނުން ސިޓީއެއްގެ ނަން އިޚުތިޔާރުކުރުމުގެ ފުރުސަތު ލިބިގެން ދިޔުމެވެ.

ބޭންކުގެ ވައްކަން ނިމޭއިރު ގްރޫޕުގައި ހަރަކާތްތެރިވާ ތިން މީހުން މަރުވެއެވެ. އަދި އެއަށްފަހު ދެ އަހަރަށްވުރެ ގިނަ ދުވަހު އެމީހުންގެ ފިލައިގެން އުޅެއެވެ. އެއަށްފަހު ފުލުހުންނަށް އެމީހުންގެ ތެރެއިން އެކަކު އަތުލައިގަނެވުނީ ގްރޫޕުގައި ހިމެނޭ ރިއޯ އޭނާގެ ލޯބިވެރިޔާ ޓޯކިޔޯއަށް ގުޅަން ސެޓަލައިޓް ފޯނެއް ބޭނުންކުރުމުންނެވެ. ރިއޯގެ ފުރާނަ ސަލާމަތް ކުރުމަށްޓަކައި ފްރޮފެސަރ އަނެއްކާވެސް ގްރޫޕުގެ މެންބަރުންތައް އެއްތަންކޮށް އެހެން ބޮޑު ވައްކަމެއް ކުރެއެވެ. ސީޒަން ތިނެއް ނިމެނީ އެ ވައްކަމުގެ ތެރޭގައި އެ ގްރޫޕުން ހަރަކާތްތެރިވަމުންދަނިކޮށެވެ. ތިން ވަނަ ސީޒަން ނިމިގެންދިޔައީ ނައިރޯބީ، މަރާ ހަނގުރާމަ ކުރަމުންދަނިކޮށެވެ. އަދި ރަޚޭލް ފުލުހުންގެ ބެލުމުގެ ދަށަށް ގެންދެއެވެ. އެހެންކަމުން މިމީހުންނަށް ދެން ކަން ވާނެ ގޮތަކާއި، ޕްރޮފެސަރގެ ޕްލޭން ކާމިޔާބު ކުރުމަށް ކުރެވިދާނެ ކަންތައްތައް އެނގިގެންދާނީ ހަތަރު ވަނަ ސީޒަނުންނެވެ. މީޑިޔާ ރިޕޯޓްތައް ބުނާގޮތުން މިއީ މިސީރީޒްގެ އެންމެ ފަހު ސީޒަނެވެ.

2018 ވަނަ އަހަރު މަނީ ހެއިސްޓްއަށް ވަނީ އައުޓްސްޓޭންޑިންގް ޑްރާމާ ސީރީޒްއަށް 46 ވަނަ އިންޓަރނޭޝަނަލް އެމީ އެވޯޑްސް ވެސް ލިބިފައެވެ.

މަނީ ހެއިސްޓްގެ މަޤްބޫލުކަން ދިވެހިންގެ މެދުގައި ވެސް އިތުރުވެފައިވާއިރު، ދާދި ފަހުން ބޭއްވި އީދު ކުޅިވަރުތަކުގެތެރެއިން ރާއްޖޭގެ ރަށެއްގައި ވަނީ މަނީ ހެއިސްޓް ސީރީޒްގައި ބޭނުންކުރާ ރަތް ސޫޓާއި، ޑަލީ މާސްކު އީދު ޕެރޭޑުގައި ބޭނުންކޮށްފައެވެ.