ލޯ މެޑަލް ހޯދާ އަންހެން ފުޓުބޯޅަ ޓީމު ތާރީހުގެ ތެރެއަށް!

ނޭޕާލުގައި މިހާރު ކުރިޔަށްދާ 13 ވަނަ ސައުތު އޭޝިއަން ގޭމްސްގެ އަންހެން ފުޓުބޯޅަ އިވެންޓުން ލޯ މެޑަލް ހޯދާ ރާއްޖޭގެ ގައުމީ އަންހެން ފުޓުބޯޅަ ޓީމު ތާރީޚީ ކާމިޔާބެއް ހޯދައިފިއެވެ.

ޕޮކަހަރާ ސްޓޭޑިއަމްގައި މިއަދު ކުރިޔަށްދިޔަ ތިންވަނަ ހޮވި މެޗު ރާއްޖެއިން ލަންކާ އާއި ވާދަކޮށް ކާމިޔާބުކުރީ 2-1 ގެ ނަތީޖާ އަކުންނެވެ.

ހަތަރު ޓީމުގެ މެދުގައި ލީގު އުސޫލުން ކުޅުނު މި މުބާރާތުގެ ފައިނަލަށް މުބާރާތް ބާއްވާ ގައުމު ނޭޕާލުގެ އިތުރުން ސަރަހައްދުގެ ގަދަ ބާރު އިންޑިއާ ވަނީ ދަތުރުކޮށްފައެވެ. ތިންވަނަ ހޮވާ މެޗުގައި ބައްދަލުކުރި ރާއްޖެ އަދި އިންޑިއާ ވެސް ވަނީ ދެ މެޗުން ބަލިވެފައެވެ. މި މެޗުގައި ރާއްޖޭގެ ޓީމަށް ލަނޑުތައް ކާމިޔާބު ކޮށްދިނީ އައިމިނަތު ޝާމިލާ އާއި އައިޝަތު ފިރުޝާއެވެ.

މިއީ ކޯޗު އަހުމަދު ނާޝިދު (ނާދު) ގެ ކޯޗު ކަމުގެ ދަށުގައި ގައުމީ އަންހެން ފުޓުބޯޅަ ޓީމުން ކުޅުނު ފުރަތަމަ މުބާރާތެވެ. އަދި މިއީ ސައުތު އޭޝިއަން ގޭމްސްގައި އަންހެން ފުޓުބޯޅަ ޓީމަށް ލިބުނު އެންމެ ބޮޑު ކާމިޔާބީއެވެ.

ގައުމީ އަންހެން ފުޓުބޯޅަ ޓީމުން އެންމެ ފުރަތަމަ ސައުތު އޭޝިއަން ގޭމްސްގައި ވާދަކުރީ 2016 ވަނަ އަހަރުއެވެ. އެ އަހަރު އަންހެން ޓީމަށް ލިބުނީ ހަތަރު ވަނަ އެވެ.

އަންހެން ފުޓުބޯޅަ ޓީމުން ވަނީ މިދިޔަ އަހަރު ނޮވެންބަރު މަހު ސިންގަޕޫރުގައި އޮތް އިންޓަރނޭޝަނަލް ވިމެންސް ކުއަޑްރަންގިއުލާ މުބާރާތުގެ ތިން ވަނަ މަގާމުވެސް ހޯދައިފައެވެ.